1 Kings 18:36-46

³⁶Ma aubigai pulo apuna ana mara i ḡetai, Elijah i babara-ḡae pulo aniapuna au ririvana ma i raupari i pa, “Oo Bada, Abraham, Isaac ma Jacob ai God, amadodo rava ma viatataiei da tam God au Israel ma tau am taunola, ma anatapuna u ririwei a kauei.

³⁷Bada ma paribeleu, Oo Bada ma paribeleu da rava ina aramei da tam, au Bada, tam anina God, ma marina rava orai e taitaina-melei awarim.”

³⁸Maratagogi Bada ana ai marei i ḡairai ma pulo bull, ai, ḡaima ma doa i aragibui. Ma waira i ʼwaiwaḡia i ḡuḡuva-pai.

³⁹Maranai rava wei i ʼnanai taui i mae-ḡaira au doa da i matave-taitaina ma i garara Bada awarina, “Bada anina God! Bada ainelana anina God!”

⁴⁰Ma Elijah rava i egari, “Baal ana peroveta ona vojijini; Eḡa tagogi ona voterei da ina ruba!” Peroveta anatapui i vojijini ma Elijah taui i riwei da i ḡairei au Kishon gaugaubana ma anatapui i viraḡeni.

⁴¹Ma Elijah gulau Ahab i riwei, “Ma nae da ma am ma garewa ḡaeḡaena gugurana a nononori.”

⁴²Ma Ahab i nae da ita am ma Elijah i ḡae ola Carmel au tepana, ma i mae-ḡaira au doa ma kolana au ae-tutuna ma i raupari.

⁴³Ma ana taunola i riwei, “Ma nae ma au bogei ma inana.” Ana taunola i nae da i nememei Elijah awarina ma i riwei, “Eḡa aiwai ata inanai.” Anatapuna mara 7 i paritawanei da inana.

⁴⁴Ma mara vi-7-na i nememei ma i riwa, “Apau aburuna ana rata me oroto urana a inanai bogei i ḡeḡae.” Ma Elijah i riwa, “Ma nae ma Ahab ma riwei, ‘Am chariot ma gerui ma ma ḡaira muriai da garewa ina rautomenim.”

⁴⁵Ma aburuna ava ma lada i ḡei ma dobu i waguvarei ma ivena i ruba ma garewa ḡaeḡae otana i toi. Ahab ana chariot i gerui ma i ruba au Jesreel.

⁴⁶Ma Bada ana rewapana i rui Elijah awarina; ma ana gara giana i taini da ana au jigoraḡita i raḡita-jijini ma i lavui da Ahab i votani da i aiḡeta au Jesreel.