1Mahabet he menge vahi he kenà menge Israilihanen is mibmahal ni Hadì Solomon. Gawas duen te anak te hadì te Ehipto, duen pa menge esawa ni Solomon he menge Moabitanhen, Amunihanen, Edomanhen, Sidunhanen, wey menge Hitihanen.
2Daan en he migkeǥiyan te Nengazen is menge Israilihanen he kenè dan mebpengesawa etawa mebpeesawa te ebpuun keniyan he menge nasyun, su ebpekeuwit kandan is menge esawa zan wey zan mekaazap te zuma he menge ed-ezapen. Piru mibmahal gihapun ni Solomon heini he menge vahi.
3Duen 700 he lavew he menge esawa ni Solomon wey zuen pa 300 he menge esawa zin he kenà lavew. Is menge esawa zin nekeǥuyud kandin wey sikandin mekeziyù te Megbevayà.
4Hein meǥurang en sikandin neuwit sikandin te menge esawa zin te ked-azap te zuma he menge ed-ezapen. Kenè en meupiya is kedepitè dan te Nengazen he Megbevayè din; kenà sikandin iring te amey zin he si David.
5Mid-azap din si Ashtoret, kes vahi he ed-ezapen te menge Sidunhanen, wey si Molec, kes utew mezaat he ed-ezapen te menge Amunihanen.
6Pinaaǥi kayi nekevaal si Solomon te mezaat diyà te etuvangan te Nengazen. Wazà sikandin mebpurung mesunud te Nengazen; kenà iring is baal zin te vaal te amey zin he si David.
7Mibpevaal si Solomon te simbahan diyà te metikang he lugar he zapit te edsilaan te Jerusalem, he para ki Kemosh, te utew mezaat he ed-ezapen te menge Moabitanhen. Mibpevaal zaan sikandin te simbahan he para ki Molec, kes utew mezaat he ed-ezapen te menge Amunihanen.
8Mibpeveelan din te menge simbahan is menge ed-ezapen te langun he menge esawa zin he kenà menge Israilihanen, ne zutun sikandan edtutung te menge veyewà wey ebpemuhat para te menge ed-ezapen te menge esawa zin.
9Ne nepeukan te Nengazen si Solomon su ǥeina te mid-iniyuǥan din is Nengazen he Megbevayà te Israel he mibpaahà kandin te kezezuwa.
10Minsan mibpetizeenan din en si Solomon he kenà medsunud te zuma he menge ed-ezapen, wazà gihapun mebpezumazuma si Solomon kandin.
11Umbe, migkeǥiyan din si Solomon te, “Tenged te wazè nu tumana is paaǥi ku te kebpekid-uyun wey is menge suǥù ku, egkuwaan ku ziyà te kenikew is ginhedian nu ne ibeǥey ku ziyà te sevaha zuen te menge suluǥuen nu.
12Piru tenged te amey nu he si David ne kenè ku heini ebeelan mintras uuyag ke pa. Ebeelan ku heini zutun te timpu te kedhadì te anak nu.
13Piru kenè ku ed-eminen egkuwaa ziyà te kandin is tivuuk he ginhedian; kekenà, edsemaan ku ziyà te kandin is sevaha he tribu tenged te suluǥuen ku he si David wey tenged te Jerusalem he pinilì ku he inged.”
14Ketau te Nengazen he zuen mebpekigkuntada ki Solomon. Iyan sikandin si Hadad he Edomanhen, he kevuwazan te sevaha te menge hadì diyà te Edom.
15Hein nehuna he timpu, he nekidtebek si David te menge Edomanhen, si Joab he peremandar te menge sundaru ni David midhendiyà te Edom te kedleveng te nemematey te tebek. Ne hein dutun en sikandin duma te menge etew zin, midhimetayan dan is langun he menge maama ziyà te Edom.
16Dutun sikandan seled te heenem he vulan. Wazè dan haazà ewai taman te naamin dan te edhimatey is langun he menge maama zutun.
17Piru si Hadad he vatè pa zutun he timpu nekepelaǥuy ziyà te Ehipto duma te zuma he menge Edomanhen he menge upisyal he nenilbi te amey zin.
18Diyè dan ebpuun te Midian ne midhendiyè dan te Paran. Ne zuma te zuma he menge tig-Paran midhendiyè dan te Ehipto ne mibpekidhinguma zan te Faraon he hadì te Ehipto. Mibeǥayan duen te hadì si Hadad te valey, tanà, wey keenen.
19Nekepenunuat dutun te hadì si Hadad, umbe impeesawa zin ki Hadad is ipag din, he suled te esawa zin he si Rayna Tapenes.
20Ne te huziyan he timpu, mid-anak te maama is esawa ni Hadad, ne migngezanan dan haazà te Genubat. Si Tapenes is mibpezekelà dutun te vatà diyà te turuǥan. Ne nekeubpà haazà is batà duma te menge anak te hadì.
21Ne zutun te ziyà si Hadad te Ehipto, netudtulan sikandin he minatey en si David wey si Joab he peremandar te menge sundaru. Ne migkaǥi si Hadad dutun te hadì te, “Ipeulì ad kenikew ziyà te nasyun ku.”
22Ne mid-insà haazà is hadì te, “Maan? Hengkey is kurang nu zini maan is egkesuat ka he ed-ulì diyà te keniyu?” Midtavak si Hadad te, “Wazà; ipeulì e zà kenikew.”
23Duen pa sevaha he etew he ketau te Megbevayà he kuntedaha zin si Solomon. Iyan sikandin si Rezon he anak ni Eliada. Mibpeleǥuyan din is egalen din he si Hadì Hadadezer he hadì te Zoba,
24ne nehimu sikandin he pengulu te menge ribildi he midtiǥum din. Hein nezaag ni David is menge sundaru ni Hadadezer, midhendiyà si Rezon te Damascus duma te menge etew zin. Midsakup dan heini he lugar ne zutun dan med-ubpà.
25Ne nehimu si Rezon he hadì diyà te Aram ne migkuntada zin is Israel. Nehimu sikandin he kuntada te Israel zutun te uuyag pa si Solomon. Mid-umanan din pa is kegubut he ebeelan ni Hadad diyà te Israel.
26Is sevaha pa he nekigkuntada ki Solomon iyan si Jeroboam he sevaha te menge upisyal zin. Ebpuun sikandin diyà te inged he Zereda ziyà te Efraim. Is amey zin he si Nebat minatey en, piru is iney zin he si Zerua uuyag pa.
27Iyan heini kaaǥi te kebpekidsukulè din te hadì: Te nehuna he timpu ebpetembakan ni Solomon is mevavà he lugar he nesakup te inged te amey zin he si David, wey ebpepurungan din is berengbeng kayi.
28Ne heini si Jeroboam mevurut he etew, ne hein naahà ni Solomon is keǥied kayi he etew, ne impezumala zin te langun he menge etew he mibpeǥes din te kedterebahu he ebpuun diyà te tribu ni Efraim wey ni Manase.
29Sevaha zutun he timpu migawas si Jeroboam puun te Jerusalem, ne midsinuǥung sikandin te ebpeneuven he si Ahia he tig-Shilo. Beǥu is pendivavew he visti he imbivisti ni Ahia. Ne iyan dan dà is dezuwa zutun te menge suǥud.
30Ne midluwas ni Ahia haazà is pendivavew he visti zin ne mibindasbindas din te 12 he vahin.
31Ne migkeǥiyan din si Jeroboam te, “Kuwaa nu is sepulù he vahin kayi, su iyan heini lalag te Nengazen he Megbevayà te Israel: Edhewien ku is ginhedian ni Solomon ne ibeǥey kenikew is sepulù he tribu kayi.
32Piru tenged te suluǥuen ku he si David wey te inged he Jerusalem he iyan mibpilì ku ziyà te langun he menge inged te Israel, ne edsemaan ku ziyà te ki Solomon is sevaha he tribu.
33Ne iyan ibeeli ku kayi su ǥeina te mid-iniyuǥan e zin ne iyan din mid-azap si Ashtoret, kes bahi he ed-ezapen te menge Sidunhanen, si Kemosh kes ed-ezapen te menge Moabitanhen, wey si Molec, kes ed-ezapen te menge Amunihanen. Wazà sikandin medsunud te menge paaǥi ku wey wazà mebpengungubpaan te hustu ziyà te etuvangan ku. Wazà sikandin medtuman te menge sulunuzen wey menge suǥù ku; kenà sikandin iring te amey zin he si David.
34Piru kenè ku edhewien is tivuuk he ginhedian diyà te ki Solomon. Ebpekahadì sikandin seled te tivuuk he untung din tenged te suluǥuen ku he si David he pinilì ku he midtuman te menge suǥù ku wey menge sulunuzen he imbeǥey ku.
35Edhewien ku is sepulù he tribu puun te ginhedian te anak din he ebpekeilis kandin te kedhadì, ne ibeǥey ku heini kenikew.
36Ebeǥayan ku te sevaha he tribu is anak din su para mekepedayun te kedhadì is menge kevuwazan te suluǥuen ku he si David diyà te Jerusalem he iyan kes inged he mibpilì ku he zutun a ebeǥayi te zengeg.
37Ne kevahin kenikew, Jeroboam, edhimuwen ku sikew he hadì te Israel. Edumelahan nu is langun he egkesuatan nu te edumala.
38Emun edtumanen nu is langun he idsuǥù ku kenikew wey edsunuzen nu is menge paaǥi ku, wey emun ebaal ka te meupiya ziyà te etuvangan ku pinaaǥi te kedtumana nu te menge sulunuzen he ibpesunud ku wey menge suǥù iring te mibeelan ni David he suluǥuen ku, eduma a kenikew. Ebpekepedayun ebpekahadì is menge kevuwazan nu iring te menge kevuwazan ni David, ne ibeǥey ku kenikew is Israel.
39Tenged te menge salà ni Solomon edsilutan ku is menge kevuwazan ni David, piru kenà taman te taman.”
40Hein netudtul ki Solomon is migkaǥi te Nengazen diyà te ki Jeroboam, edhimetayan din pezem si Jeroboam, piru mibpelaǥuy si Jeroboam diyà te ki Shishak, he hadì te Ehipto, ne ziyà sikandin med-ubpà taman te kebpatey ni Solomon.
41Is duma pa he ǥuǥud mehitenged te kedhadì ni Solomon, wey is langun he mibeelan din, wey vahin te ketau zin, ingkesurat heini ziyà te Libru he Midsuratan te menge Baal ni Solomon.
42Diyà te Jerusalem med-ubpà si Solomon te kedhadì din te tivuuk he Israel seled te 40 he tuig.
43Hein minatey en sikandin, ne ziyà ileveng te inged te amey zin he si David. Ne iyan maan nekeilis kandin te kedhadì is anak din he si Rehoboam.
