1. King 18:36-46

³⁶Nge lupwen a tori fansoun asoren lekuniol, ewe soufos Elias a kan ngeni ewe rongen asor o iotek, “Ai Samol mi Lapalap, än Apraham, Isaak me Jakop we Kot, kopwe pwäri ikenai pwe en ewe Kot lon Israel, nge ngang noum chon angang. Kopwe pwal pwäri pwe üa föri ekei mettoch meinisin fän alom.

³⁷Kopwe pälüeniei, ai Samol mi Lapalap, kopwe pälüeniei, pwe ekei aramas repwe silei pwe en Kot ai Samol mi Lapalap, repwe pwal silei pwe en ka akulusefäli leluker.”

³⁸Mürin, ewe Samol mi Lapalap a tinätiu ekkei, a kenala ewe asor, ewe mwüch, ekewe fau, ewe pwül. A pwal apwasätä ewe koluk mi nom lon ewe warawar.

³⁹Iwe, lupwen ekewe aramas meinisin ra küna mine a fis, ra chapetiu lepwül o kökkö, “Ewe Samol mi Lapalap i Kot, ewe Samol mi Lapalap i chök Kot.”

⁴⁰Mürin, Elias a üreni ekewe aramas, “Oupwe turufi nöün ewe anü Paal kewe soufos. Ousap mwüt ngeni eman pwe epwe sü.” Iwe, ra turufiir, nge Elias a emweniretiu ren ewe öüwö Kison o nirela ikenan.

⁴¹Iwe, Elias a üreni Ahap, “Kopwe feila mongö o ün, pun üa rong waasesin üt.”

⁴²Iei mine Ahap a feila pwe epwe mongö o ün. Nge Elias a feitä won ungen ewe chuk Karmel. A chapetiu lepwül o anomu möküran lefilen pwäsukun.

⁴³Iwe, Elias a üreni nöün chon angang, “Kopwe feila o nennewu lematau.” Iwe, a feila o nennewu, nge lupwen a liwinto, a apasa, “Üsap küna och.” Iwe, Elias a apasa fän fisu pwe epwe feila o nennewu.

⁴⁴Nge lupwen a tori fän afisuan, a liwinto o apasa, “Üa küna eu kükün kuchu a feitä seni lematau, usun ükükün pöün eman mwän.” Elias a üreni nöün we chon angang, “Kopwe feila ren Ahap o üreni pwe epwe amolätä waan woken o feila, pwe esap mwöch ren ewe üt.”

⁴⁵Ekis chök fansoun mürin a cholola fän läng ren kuchu fiti asepwäl, mürin a püngütiu watten üt. Iwe, Ahap a tötä won waan woken o liwinsefälila Jesrel.

⁴⁶Nge manamanen ewe Samol mi Lapalap a feitiu won Elias. Iwe, a rietä üfan lukalapan o säla me mwen Ahap tori Jesrel.