1 Reye 18:36-46

³⁶Quewara israelerãba Ãcõrẽa animarã babue diabada horaca Elíara animarã babue diabada caita wãped̶a Ãcõrẽa nãwã iwid̶isia: “Ãcõrẽ, bʌdrʌ Abrahaʌ̃, Isa, idjab̶a Israel Ãcõrẽa. Id̶i unubidua bʌra wãrãda israelerã Ãcõrẽda idjab̶a mʌ̃ra bʌ nezocada. Unubidua bʌabʌrʌ mʌ̃́a nãwã obi b̶ʌda.

³⁷Mʌ̃ bed̶eara panudua, Ãcõrẽ, mʌ̃ bed̶eara panudua. Mãwã naʌ̃ ẽberãrãba cawad̶ia bʌdrʌ wãrã Ãcõrẽda idjab̶a bʌabʌrʌ nãwã obi b̶ʌda ãdjirãba wayacusa ĩjãnamãrẽã.”

³⁸Mãwã iwid̶i b̶ʌd̶e Ãcõrẽba tʌbʌ uruada bajãneba dji animarã babue diabada ʌ̃rʌ̃ b̶aebisia. Maʌ̃ba dji animarã tʌcuad̶ara, tʌbʌra, mõgarara, egoro sid̶a jũma bá wãsia. Dji icawa corod̶ad̶e baido ũmana sid̶a tʌbʌ jʌ̃wʌ̃rʌ̃ãba jũma põãsasia.

³⁹Maʌ̃ unusid̶ad̶e israelerãra chĩrãborod̶e b̶arru copanenaped̶a nãwã jĩgua jarasid̶aa: –Naʌ̃ Ãcõrẽdrʌ dji wãrã araa. Naʌ̃ Ãcõrẽdrʌ dji wãrã araa.–

⁴⁰Maʌ̃be Elíaba ãdjirãa jarasia: –Baald̶eba bed̶eabadarãda jũma jidad̶adua. Ni ab̶aʌda idu mĩrũ wãbirãnadua.– Ara maʌ̃da israelerãba ãdjirãra jidacuad̶aped̶a Elíaba Quisoʌ̃ do zaqued̶aa edebisia. Mama idjia jũma quenasia.

⁴¹Maʌ̃be Elíaba Acaboa nãwã jarasia: –Ne cod̶e wãdua. Mʌ̃a cue droma zebʌrʌda ũrĩ b̶ʌa.–

⁴²Ara maʌ̃da Acabora ne cod̶e wãsia. Baribʌrʌ Elíara Carmelo eyad̶e ʌ̃taa wãsia. Mama chĩrãborod̶e cob̶eped̶a dratura egorod̶aa tẽũ cob̶esia.

⁴³Maʌ̃be Elíaba idji nezocaa nãwã jarasia: –Ʌ̃taara wãped̶a pusad̶aa acʌdua.– Ara maʌ̃da idji nezocara ʌ̃taara wãped̶a pusad̶aa acʌsia. Jẽda zeped̶a Elíaa jarasia: –Ni cãrẽ sid̶a unuẽ́ basía.– Elíaba wayacusa jarasia acʌd̶e wãmãrẽã. Ara maʌ̃ quĩrãca b̶arima siete mãwã osia.

⁴⁴B̸arima siete wãbʌrʌd̶e Elía nezocaba jẽda zeped̶a nãwã jarasia: –Mʌ̃a unusia jʌ̃rãrã maãrĩ jʌwajã quĩrãca quiruda pusaareba zebʌrʌda.– Elíaba jarasia: –Acaboa jarad̶e wãdua idji carretad̶e b̶adoped̶a isabe diguid̶aa wãmãrẽã. Isabe wãẽ́bʌrʌ cueba poya wãẽ́a.–

⁴⁵Acaboba maʌ̃ ũrĩsid̶e idji carretad̶e b̶adoped̶a Jezreel purud̶aa wãsia. Mãwã b̶ʌd̶e ewarira pãĩmaga bueasia. Nãũrã bara zesia. Maʌ̃ne cuera dji cãbãyã ze nũmesia.

⁴⁶Ãcõrẽba Elíaa idji ʌb̶ʌada diad̶a bẽrã Elíaba cacuad̶e jʌ̃ b̶ʌra bio trãjʌ̃ped̶a Acabo na pira wãsia Jezreel purud̶aa.