1Mibpuunan ni Solomon is kebangun duen te valey te Nengazen te ikezuwa he vulan, he iyan is bulan he Ziv, dutun te ikeepat he tuig te kedhadì din te Israel. Ike-480 he tuig haazà puun te ked-awà te menge Israilihanen diyà te Ehipto.
2Is baley he mibangun ni Hadì Solomon para te Nengazen 90 he ǥiek is keluǥayad din, 30 he ǥiek is keluag din, ne 45 he ǥiek is ketikang din.
3Is keluag te varkun din, 15 he ǥiek, is keluǥayad 30 he ǥiek; iring keluǥayad duen te valey.
4Mibpeveelan daan ni Solomon haazà is baley te Nengazen te menge sulawà he meluag diyà te seled ne meliǥet diyà te gawas.
5Mibpeveelan din daan te menge ruǥu is diyà te pesikilizà wey ziyà te egkeiniyuǥan duen te valey. Heini he menge ruǥu, tetelu he endanas, ne impikit diyà te elavat duen te valey.
6Is keluǥayad te nehuna he endana pitu wey tengà he ǥiek, ne is ikezuwa he endana siyam he ǥiek, ne is iketelu he endana sepulù wey tengà he ǥiek. Mibpegpeǥendak diyà te gawas he vahin te elavat te valey te Nengazen para ikepelastar is menge ruǥu he kenè en egkewaleng is elavat emun idtaud is gumuǥuyud.
7Hein mibangun haazà is baley te Nengazen, is menge vatu he migamit dutun, daan en he mibpenepsapan diyà te migkuwaan duen, umbe wazè en egkezineg he zaǥing te mertilyu, tiǥib, etawa minsan hengkey he ǥelemiten he putew.
8Is gemawan te nehuna he endana ne ziyà te zivavà he vahin duen te valey. Ne zuen menge heǥezan pehendiyà te ikezuwa wey iketelu he endana.
9Ne hein neelevatan en haazà is baley te Nengazen, mibpeteuzan ni Solomon te kisami he kayu he sidru is menge himan din.
10Is menge ruǥu ziyà te pesikilizà wey egkeiniyuǥan duen te valey he pitu wey tengà he ǥiek is ketikang din, impikit haazà he menge ruǥu zutun te valey pinaaǥi te kegemita te kayu he sidru.
11Migkaǥi is Nengazen diyà te ki Solomon te,
12“Emun edtumanen nu is menge penurù ku wey menge suǥù ku, ne edtumanen ku zaan pinaaǥi kenikew is impenaad ku ziyà te amey nu he si David. Is menge etew ku he Israilihanen, ed-ubpà a zuma kandan kayi te valey ku he mibangun nu ne kenè ku sikandan ed-iniyuǥan.”
14Nepasad is kebangun duen te valey te Nengazen.
15Is elavat he zapit diyà te seled duen te valey te Nengazen mid-epizan te tabla he kayu he sidru puun te saag pehendiyà te kisami, ne is saag din, tabla he kayu he sipris.
16Mibpevaal sikandin te zezuwa he ruǥu ziyà te seled dutun te valey te Nengazen pinaaǥi te kedtaud te dibisyun puun te saag pehendiyà te kisami. Is tabla he indibisyun, kayu he sidru. Haazà he ruǥu ziyà mekepelastar te zivaluy he vahin duen te valey te Nengazen, ne migngezanan heini te Utew Segradu he Lugar, ne is ketikang kayi, 30 he ǥiek.
17Is keleyatan te ruǥu he ziyà te ǥawas duen te Utew Segradu he Lugar ne 60 he ǥiek.
18Mid-epizan pudu te tabla he sidru is ketivuukan te elavat diyà te seled dutun te valey, umbe kenà egkaahà diyà te seled is batu he elavat din. Dutun te elavat in-ukir zuen is menge vulak wey edlangkat he menge pinemula.
19Mid-andam ni Solomon is Utew Segradu he Lugar he iyan edsevukan duen te Kavan te Kebpekid-uyun te Nengazen.
20Heini he ruǥu neked-iring is sukud te ketikang din, keluaǥan din, wey keleyatan din, pudu 30 he ǥiek. Is menge elavat wey kisami kayi ne pudu mid-epizi te vulawan, ne vulawan daan is in-apid te tabla he kayu he sidru he mibeelan he pemuhatà.
21Is duma he vahin diyà te seled duen te valey te Nengazen, impeepizan ni Solomon te lunsey he vulawan. Mibpevaal sikandin te rantey he vulawan ne impeketer zin haazà diyà te idselang pehendiyà te Utew Segradu he Lugar.
22Ne pudu neepizi te vulawan is diyà te seled dutun te valey ragkes en sikan is pemuhatà he ziyà te seled duen te Utew Segradu he Lugar.
23Impesavuk ni Solomon diyà te seled duen te Utew Segradu he Lugar is dezuwa he ledawan te kirubin he menge kayu he ulibu, ne is kada sevaha zutun 15 he ǥiek is ketikang din.
24Heini is dezuwa he ledawan te kirubin neked-iring is kezekelè dan wey kegkeveeli kandan. Is kada sevaha kandan, duen din dezuwa he pakpak, ne pitu wey tengà he ǥiek is kelayat te kada pakpak. Umbe is kelayat puun te purù pehendiyà te purù te sevaha he pakpak ne 15 he ǥiek.
27Imped-avey haazà ni Solomon diyà te seled duen te Utew Segradu he Lugar he nevekar is menge pakpak dan. Ne nekedtemu is divaluy he pakpak dan diyà te liwezaan duen te ruǥu. Ne is divaluy pa he menge pakpak dan neketemu ziyà te elavat.
28Ne mibpeepizan daan ni Solomon te vulawan heini is dezuwa he kirubin.
29Is langun he elavat dutun te dezuwa he ruǥu zuen te valey te Nengazen mibpezeyzeyanan ni Solomon te menge kirubin, menge palma, wey menge vulak he nememekar en.
30Minsan is saag dutun te zezuwa he ruǥu mibpeepizan din te vulawan.
31Is beyeey pehendiyà te Utew Segradu he Lugar, ne zezuwa is lekeb din he menge kayu he ulibu, ne zuen kayi menge marku he lelima is suyuk dan.
32Heini he menge ǥemawan mibpezeyzeyanan ni Solomon te druwing he menge kirubin, menge palma, wey menge vulak he nememekar en. Ne mid-epizan te vulawan haazà is menge himan dutun te ǥemawan.
33Is beyeey pehendiyà te seled duen te valey te Nengazen mibpeveelan ni Solomon te menge marku he heepat is suyuk dan he menge kayu he ulibu.
34Ne zuen kayi zezuwa he lekeb he kayu he sipris he mibpurma, ne is kada sevaha kayi zezuwa he vahin he egkehimu he edlumpien.
35Mibpezeyzeyanan daan heini ni Solomon te menge druwing he kirubin, menge palma, wey menge vulak he nememekar en, wey mibpeepizan din te vulawan.
36Mibpevaal zaan sikandin te lama zuen te valey te Nengazen. Neliǥuy heini te elavat he vinesbasan he menge vatu he is kada tetelu he apid duen mid-epizan te kayu he sidru.
37Ingkepelastar is menge pundasyun duen te valey te Nengazen te ikezuwa he vulan he iyan is bulan he Ziv, dutun te ikeepat he tuig te kedhadì ni Solomon.
38Ne nepasad haazà is baley te Nengazen te ikewalu he vulan, he iyan is bulan he Bul, dutun te ike-11 he tuig te kedhadì ni Solomon. Pitu he tuig is kebenguna zuen te valey te Nengazen, ne mibpurungan sunuza is langun he ziyà te planu.
