1 King 18:36-46

³⁶Navong sak mesein tounah vasi onen, vi mendilah, avong mal ten sanien. Ka Ilaetsa mai vesesal en ahor ka vis vit, “O Iahova, Ahi onen Ebraham, onen Aesak, ka onen Siekob, kosa, kitie min komai keke keik kovi Ahi onen me-Isrel keil. Ka kitie min komai keke keik korie lat nau numai navi meatin toumien onom ka namumon tounah keil enek musil rem.

³⁷O Iahova, san heite ten hisien onak. Kisani vatie lati min meatin keil ekek keke keik enges kovi Iahova, Ahi anatin. Kisan ahang vatie lati min keil keke em vati kovahiles moulien one avousiluk eris.”

³⁸Hatte tas, Iahova san ahang ka nesa mita netan, kan lin vasi sanien, av teni, ahat keil, atan, ka oai emun.

³⁹Navong meatin keil alesi, keil vasi umot avita netan ka avisohiso avit, “!Iahova, kei vi Ahi anatin! !Iahova, kei enges vi Ahi!”

⁴⁰Evus, Ilaetsa meng kat meatin keil vit, “!Alha alhuli kat provet keil onen Baal! !Minamaen etai en keil nalohosai!” Sakini meatin keil avuli kat keil vasi. Evus, Ilaetsa mulamun keil uva en Poal Kison, ka en out enek, amu vinvini provet keil vasi onen Baal.

⁴¹Evus, Ilaetsa va selus min asuv houlu Ehab vit, “Kimea, kiha kianian ka kimun hati uaen veni hervitei tuetin, rehelong ous hous.”

⁴²Navong Ehab va vaanian, Ilaetsa vina en hoite ten Vatihou Karmel. Ekonek, retengeiril vita netan ka veinan rokol atan.

⁴³Kei viteni min meatin toumien onen vit, “Ha lele hehita netan en atas.” Sakini, kei va lele ka mai ris viteni mini vit, “Narles etai tounah.” Ilaetsa sila va hatte oulu (7).

⁴⁴Ka en ualien kor onen, navong meatin toumien enek mai ris, viteni vit, “Nales mahmah tai koa alesi havivi suval hen meatin mul mea ran atas.” Evus, Ilaetsa viteni mini vit, “Ha les asuv houlu Ehab. Kihiteni mini keke hekalah hepar kat kat en hos keil osen ka heloh eni heha lah teim keke ous nating koe sise onen.”

⁴⁵Rovitei tuetin, mahmah keil koa vopoli mul koe teilang, eang mea, ka ous mus houlu vis houlu mok. Sakini Ehab vut en kat ten hos onen ka muloh va en taon ten out Sesrehel.

⁴⁶Ka Ilaetsa, keihoen onen Ahi mai sieni. Kei lum kat kele eisin omon koa taveah mai nesa ka mutoh eni. Evus, muloh vis muloh mulin hos osen Ehab, ka rokol taon ten out Sesrehel mulamu eni.