1 Ḡaliḡalibona 18:36-46

³⁶Bi aubigamo lausewasewa saugina i tava bi Elaidiya i moito nawa olta diyanemo bi i laupalina gado, “Oo Bada, Eiblaḡam, Aisik bi Islael edi Maimaituwa, niganana kwa kamaḡatim te tam Islael edi Maimaituwa bi tagu em taupaula bi niga kauwidi e voiyedina ba em giuvavasaḡa luvanemo.

³⁷Oo Bada egu pali kwa vai, te niga lavedi sa sibe te tam Bada Maimaituwa bi tam kaka nuwedi kwa vitaledi te sa nato lisimmo.”

³⁸Kamaina bi Maimaituwa ena kai i yovo bi sewasewa, kai, ḡakima bi doḡa i kalaḡosedi bi kota gauba tikwalimo i sosovi waiḡasali.

³⁹Bi sauginemo lava matabudi a kitakita ba a laudulu yovo doḡamo bi kalinedi dididiginemo a binauna gado, “Bada tana taunana Maimaituwa! Bada tana taunana Maimaituwa!”

⁴⁰Bi Elaidiya i giuvavasaḡedina gado, “Bal taugiuwatana ko kaidididi, mote ḡemota koma kita kamaḡe bi ima naila ima nawa. Kamaina bi lava Bal taugiuwatana a kaidididi bi Elaidiya i waidoli nawedi Kison gwagwanemo bi ai peki kovidi.”

⁴¹Kamaina bi Elaidiya, Aḡab i giuwena gado, “Kwa nawa, kwa kani bi kwa tego banina tagu nabu dididiga daguguna e vaiye ya natonato.”

⁴²Bi Aḡab i nawa i kani bi i tego bi Elaidiya i saḡa oya kamel dabanemo bi i laudulu solana tuwapekana gavogavodimo bi i laupali.

⁴³Ḡome ena taupaula i giuwena gado, “Kwa nawa bi nisa yawaninaḡa kwai kita nawa.” Kamaina bi ena taupaula i nawa bi nisa yawaninaḡa i waikita nawa bi i nato munaḡa te i giuna gado, “Tagu mote bai yà kita.” Elaidiya mala 7 ena taupaula i giuwe, te ya nawa yai kita.

⁴⁴Bi nawa wai 7-nemo ena taupaula i tava munaḡa bi i giuwena gado, “Yada ḡaubona e kita, kitana mai lava nimana nisaḡa i saḡasaḡa.” Kamaina bi ena taupaula i giuwena gado, “Kwa nawa bi Aḡab kwa giuwe, te ena seliotmo ya gelu bi ya munaḡa makai muliḡa kaka nabu ya miyagudu.”

⁴⁵Noi taunana te yada i waidudubala bi nabu nuwana tava. Kamaina bi nabu dididiga ma yavayavalina i miya kuluva. Ḡome Aḡab ena seliotmo i miya saḡa bi velau i nawa Diyesalel tauninemo.

⁴⁶Kamaina bi Bada, Elaidiya ḡailisi dididiga i vite bi ena gala i saḡe ena dagilolomo i tagini bi i velau Aḡab ena seliot i ḡose kamaḡe bi i nawa Diyesalel lisinemo i gei tava.