Text copied!
CopyCompare
Is Lalag te Megbevayà - 1 Hadì

1 Hadì 8

Help us?
Click on verse(s) to share them!
1Impetawag ni Hadì Solomon diyà te Jerusalem is menge edumala te Israel wey is langun he menge pengulu te menge tribu wey menge pemilya te Israel, su ibpekuwa zin kandan sikan is Kavan te Kebpekid-uyun te Nengazen puun te Zion he Inged ni David.
2Midhendiyè dan is langun te ki Hadì Solomon hein Pista te Kebaal te menge Lawig, hein bulan te Etanim, he iyan kes ikepitu he vulan.
3Hein nevurun en is langun he menge edumala te Israel, ne migkuwa zuen te menge memumuhat wey menge Levihanen kes Kavan te Nengazen, ragkes en kes Tulda he Edtelevukaayan wey kes menge segradu he menge gelemiten kayi, ne mid-uwit dan heini langun petekezeg diyà te valey te Nengazen.
5Nemuhat si Hadì Solomon wey is tivuuk he keet-etawan te Israel ziyà te etuvangan duen te Kavan te Kebpekid-uyun te Nengazen. Utew mahabet is menge kerehidu wey menge vaka he impemuhat dan; kenà heini egkevilang.
6Ne mid-uwit duen te menge memumuhat kes Kavan te Kebpekid-uyun te Nengazen diyà te lugar he kineselezan duen te valey te Nengazen, duen te Utew Segradu he Lugar, diyà te zizalem te menge pakpak duen te ledawan he menge kirubin.
7Nevekar is menge pakpak dutun te menge kirubin, umbe netembunan sikan is Kavan wey sikan is menge tival zuen te kavan.
8Heini he menge tival utew memelayat, ne egkaahà is menge purù dan diyà te Segradu he Lugar, diyà te etuvangan duen te kineselezan dutun te valey te Nengazen, piru kenà heini egkaahà diyà te gawas duen te Segradu he Lugar. Ne zutun pa heini taman en guntaan.
9Wazà duma he taǥù duen te Kavan gawas duen te zezuwa he melumpipì he menge vatu he intaǥù dutun ni Moises hein diyà sikandin te Horeb, ne zutun himuwa te Nengazen is kebpekid-uyun din te menge Israilihanen hein migawas dan diyà te Ehipto.
10Ne hein migawas sikan is menge memumuhat duen te Segradu he Lugar, ne zuen gapun he nekepenù duen te valey te Nengazen.
11Ne kenè en ebpekehimu sikan is menge memumuhat te vuluhaten dan dutun te valey te Nengazen tenged dutun te ǥapun, su is mekeǥeǥehem ke kebpekiduma te Nengazen kandan nekeeneb dutun te valey zin.
12Ne mid-ampù si Solomon te, “Nengazen, migkaǥi ka he ed-ubpè ka ziyà te kivel.
13Ne ǥuntaan nekepevaal ad te utew mekempet he valey para kenikew, he egkeubpaan nu te wazà pidtemanan.”
14Ne mid-etuvang ni Hadì Solomon is tivuuk he keet-etawan te Israel he ebpemenhitindeg dutun, ne mibpenubtuvazan din sikandan.
15Migkaǥi sikandin, “Edeliǥen is Nengazen he Megbevayà te Israel. Midtuman din is insaad din te amey ku he si David. Migkaǥi zin dengan te,
16‘Puun dutun te kebpeǥewasa ku te menge etew ku he Israilihanen diyà te Ehipto, ne wazè ku pilia is inged te minsan hentei he tribu te Israel para edtukuzan te valey he para te kebeǥayi kedì te zengeg. Iyan mibeelan ku is, mibpilì ku si David he edumala te menge etew ku he Israilihanen.’
17“Utew egkesuat is amey ku he si David he ebangun te valey he para te zengeg te Nengazen he Megbevayà te Israel.
18Piru migkaǥi is Nengazen diyà te kandin te, ‘Meupiya su egkesuat ka he ebangun te valey he para te zengeg ku.
19Piru kenè ka iyan ebpekevangun kayi, kekenà, iyan is anak nu. Iyan sikandin ebangun te valey he para te zengeg ku.’

20“Ne midtuman en te Nengazen is insaad din. Iyan a nekeilis te amey ku he hadì te Israel, su iyan heini insaad te Nengazen. Ne mibangun ku is baley he para te kebeǥey te zengeg te Nengazen he Megbevayà te Israel.
21Mibpevaal a te lugar zutun te valey he para zuen te Kavan he zutun itaǥù is insurat he kebpekid-uyun te Nengazen he midhimu zin diyà te menge kepuun tew hein impeǥawas din sikandan diyà te Ehipto.”
22Midhitindeg si Solomon diyà te etuvangan te tivuuk he keet-etawan te Israel, diyà te etuvangan duen te pemuhatà te Nengazen, ne imbayew zin is menge velad din
23ne ke sikandin te mid-ampù te, “Nengazen, Megbevayà te Israel, wazè en Megbevayà he iring kenikew ziyan te langit wey kayi te tanà. Metinumanen ka te saad nu wey layun nu ibpaahà is kebmahala nu te menge suluǥuen nu he edsunud kenikew te tivuuk he ǥehinawa zan.
24Midtuman nu is saad nu te suluǥuen nu he si David he amey ku. Iyan ka kayi midsaad, ne midtuman nu heini guntaan he andew.
25Ne ǥuntaan, Nengazen he Megbevayà te Israel, elin nu tumana is insaad nu ziyà te amey ku he si David he suluǥuen nu hein migkeǥiyan nu te, ‘Layun nu zuen kevuwazan he ebpekeilis kenikew te kedhadì te Israel emun meupiya is kedsunud te menge kevuwazan nu kedì, iring te mibeelan nu.’
26Umbe ǥuntaan, Megbevayà te Israel, tumana nu is menge saad nu te suluǥuen nu he si David he amey ku.
27“Piru, sikew, Megbevayà, tutuu ve iyan he ebpekeubpè ka kayi te tanà? Minsan is langit ne kenè ka ganì ed-ereg minsan diyà te pinekemetikang he vahin kayi, kayi ke pe be vuwa med-ereg te valey he midtukud ku?
28Piru, Nengazen he Megbevayè ku, pemineǥa a kenikew is suluǥuen nu te menge kebpengemuyù ku wey kebpehizuhizu ku kenikew. Pemineǥa nu is kebpengumew ku wey kebpengemuyù ku ǥuntaan diyà te etuvangan nu.
29Berakat he ipata nu heini is baley nu te maandew wey mezukilem, kayi te lugar he migkaǥi nu he kayi ka ebeǥayi te zengeg. Berakat he pemineǥa a kenikew is suluǥuen nu te kebpengemuyù ku he kayi a he lugar med-etuvang.
30Pemineǥa nu is menge hangyù ku wey hangyù te menge etew nu he Israilihanen te kebpengemuyù dey he kayi he lugar ed-etuvang. Pemineǥa nu keniyan te ubpeey nu he langit. Ne emun egkezineg key kenikew, ne peseyluwa key.
31“Emun is sevaha he etew idsumbung he nekesalà diyà te iring din he etew, ne haazà ibpehendiyà te pemuhatà para kenikew kayi te valey nu te kebpenangdù he wazè din salà,
32pemineǥa nu heini ziyan te langit wey hukumi nu is menge suluǥuen nu–is edsumbung wey is idsumbung. Siluti nu is nekesalà sumalà te neveelan din, ne libriya nu is wazà salà para metueni he wazà sikandin mekesalà.
33“Ne emun is menge etew nu he Israilihanen egkezaag te menge kuntada zan su nekesalè dan kenikew, ne emun edlikù dan diyan te kenikew ne edalig dan wey ebpengemuyù dan kayi te valey nu,
34ne pemineǥa nu sikandan diyan te langit. Ne peseyluwa nu sikandan te salè dan ne ilikù nu sikandan diyà te tanà he imbeǥey nu ziyà te menge kepuun dan.
35“Emun kenè nu ibpeuzan tenged te nekesalà is menge etew nu, ne emun ebpengemuyù dan he edsinaru kayi te valey nu wey edalig dan kenikew, wey ed-engkezan dan is kebaal te salà tenged te kedsiluti nu kandan,
36ne pemineǥa nu sikandan diyan te langit. Peseyluwa nu sikandan is menge suluǥuen nu he menge etew nu he Israilihanen. Penurua nu sikandan te metazeng he kebpengungubpaan, ne peuzani nu is tanà he imbeǥey nu kandan he egkaangken dan.
37“Emun ebpekeuma is bitil ziyà te tanà te menge etew nu, limas etawa meinit he keramag, etawa keranapranap he ebpekezezaat te menge pinemula, ragkes en is menge terapan wey menge tetaru, etawa edliǥuyan sikandan te menge kuntada zan diyà te minsan hendei te menge inged dan, etawa ebpekeuma ziyà te kandan is minsan hengkey he zaru,

38ne emun duen kandan ebpengemuyù etawa ke ebpetavang kenikew, ne pemineǥa nu sikandan. Ne emun nesavut dan is pinaaǥi te kebpekesalè dan ne nekeuma ziyà te kandan heini is ked-antus dan, ne ebpengemuyù dan he ibpeketikang dan is menge velad dan he ed-etuvang kayi te valey nu,
39ne pemineǥa nu sikandan diyan te ubpeey nu he langit. Ne peseyluwa nu sikandan, ne veeli nu ziyà te kada sevaha kandan is ereg te menge vaal zan, su netuenan nu is gehinawa te kada sevaha kandan. Su utew venar he iyan ke zà netau te ǥehinawa te langun he etew.
40Beeli nu heeyan para medtahud dan kenikew zutun te ked-ubpè dan dutun te tanà he imbeǥey nu te menge kepuun dey.
41“Emun duen kenà menge Israilihanen he meǥinged diyà te meziyù he lugar he ebpekezineg te ventuǥan nu wey kegkemekeǥeǥehem nu, ne edhengkayi zan te ked-azap kenikew wey ebpengemuyù dan he ed-etuvang kayi te valey nu,
43pemineǥa nu sikandan keniyan te ubpeey nu he langit. Ne iveǥey nu ziyà te kandan is minsan hengkey he ebuyuen dan, para is tivuuk he menusiyà kayi te kelibutan ne ebpekekilala kenikew, ne edtehuzen ke zan iring te menge etew nu he Israilihanen, wey para metueni zan he midtukud ku heini is baley nu para te zengeg nu.
44“Emun edhipanew is menge etew nu te kebpekidtebek su iyan inmandù nu, ne emun ed-ampù sikandan he edsinaru kayi he inged te pinilì nu wey kayi te valey nu he mibangun ku he para te zengeg nu,
45pemineǥa nu is menge kebpengemuyù dan wey menge hangyù dan diyan te langit, ne iveǥey nu kandan is kezeeǥan.
46Ne emun ebpekesalè dan kenikew–su wazà minsan hentei he wazè din salà–wey tenged te utew nu kekegpauk ne impezaag nu sikandan te menge kuntada zan ne mibihag dan pehendiyà te uvey etawa meziyù he lugar,
47ne emun egkeveǥu is gehinawa zan dutun he lugar, ne ed-engkezan dan is kebaal te salà ne ebpehizuhizu zan he edhenduen te, ‘Nekesalè key wey mezaat is menge vaal zey,’
48pemineǥa nu is menge kebpengemuyù dan. Ne emun ebpekid-uliey sikandan kenikew te ebpuun te tivuuk he ǥehinawa zan wey isip dan diyà te lugar te menge kuntada zan he mibihag kandan, ne ebpengemuyù dan he ed-etuvang kayi te tanà he imbeǥey nu te menge kepuun dan, he iyan heini is inged he mibpilì nu, wey heini is baley nu he midtukud ku para te zengeg nu,
49ne pemineǥa nu is menge kebpengemuyù dan wey hangyù diyan te ubpeey nu he langit, ne veǥayi nu sikandan te kezeeǥan.
50Peseyluwa nu sikandan te menge salè dan wey menge kedrapas dan te egkesuatan nu, ne ituǥut nu he mehizuwi sikandan te mibihag kandan.
51Su menge etew nu sikandan he menge ǥaked nu. Impeǥawas nu sikandan diyà te Ehipto, kes lugar he iring te egkiràkirà he rapug.
52“Berakat he edseǥipaan nu is menge hangyù ku wey is menge hangyù te menge etew nu he Israilihanen, ne verakat he pemineǥa nu sikandan emun ebuyù dan te tavang diyà te kenikew.
53Su mibpilì nu sikandan, Nengazen he MEGBEVAYÀ. Su ziyà te menge nasyun kayi te kelibutan iyan sikandan mibpilì nu he menge etew he ǥaked nu, ne iyan heeyan migkaǥi nu ziyà te ki Moises he suluǥuen nu, hein impeǥawas nu is menge kepuun dey ziyà te Ehipto.”
54Hein nepasad ni Solomon is menge kebpengemuyù din wey menge hangyù din diyà te Nengazen, midhitindeg sikandin diyà te etuvangan duen te pemuhatà he para te Nengazen. He zutun sikandin medluhud is ebayew te menge velad din diyà te zivavew.
55Pinaaǥi te mezaǥing he kegkaǥi mibpenubtuvazan din is tivuuk he keet-etawan te Israel. Ke sikandin te,
56“Ereg he edeliǥen is Nengazen su impehimeley zin is menge etew zin he menge Israilihanen sumalà is impenaad din. Midtuman din is langun he insaad din diyà te suluǥuen din he si Moises.

57Berakat he zumahi kiw te Nengazen he Megbevayè tew iring te kedumahi zin te menge kepuun tew. Berakat he kenè kiw zin iselikwey wey vey-ani.
58Berakat he himuwa kiw zin he menge metinumanen te menge suǥù din su para mekepengungubpaan kiw te sungkad te menge paaǥi zin, ne metuman tew is menge suǥù din wey menge sulunuzen he imbeǥey zin diyà te menge kepuun tew.
59Berakat he mekeuma ziyà te Nengazen heini is menge kebpengemuyù ku te maandew wey mezukilem. Berakat he uǥupi e zin wey is menge etew zin he menge Israilihanen te sungkad te egkinehenglanen dan te kada andew,
60su para metueni te langun he menge etew kayi te tivuuk he kelibutan he is Nengazen, iyan Megbevayà ne wazè en duma pa.
61Wey verakat he mebmepezumdumahan kew is menge Israilihanen te Nengazen he Megbevayè tew. Tumana niw is imbeǥey zin he menge sulunuzen wey menge suǥù iring te ulaula niw en guntaan.”
62Ne nemuhat diyà te Nengazen si Hadì Solomon wey is langun he menge Israilihanen he zuma zin dutun.
63Nemuhat dan te pemuhat he para te meupiya he kedepità. Is kezakel te impemuhat dan 22,000 he vaka wey 120,000 he menge kerehidu wey menge kambing. Pinaaǥi kayi impehinungud duen te hadì wey te menge Israilihanen diyà te Nengazen sikan is baley te Nengazen.
64Dutun daan he andew, impehinungud duen te hadì sikan is lama he ziyà te egkesineruwan duen te valey te Nengazen. Ne nemuhat dan dutun te menge pemuhat he edtutungen, menge pemuhat he para gasa, wey menge tavà he pemuhat he para te meupiya he kedepità. Su sikan is brunsi he pemuhatà diyà te egkesineruwan duen te valey te Nengazen he utew zeisey ne kenà ed-ereg heini he menge pemuhat.
65Midsilibra si Solomon wey is langun he menge Israilihanen is Pista te Kebaal te menge Lawig seled te pitu he andew. Utew mezakel he menge etew is nevurun he ebpuun te Lebo Hamat he zapit te zizaya pehendiyà te zal-ug te Ehipto he zapit te zivavà. Haazà is kedsilibra zan diyà te etuvangan te Nengazen he Megbevayè dan 14 he andew pudu, pitu he andew is para te kebpehinunguza zuen te valey te Nengazen, ne pitu zaan he andew is kedsilibra he para zuen te Pista te Kebaal te menge Lawig.
66Ne hein nepasad haazà is Pista impeulì ni Solomon is menge etew. Mibpenubtuvazan dutun te menge etew si Hadì Solomon, ne hein nepasad nemen-ulì dan he melipayen tenged te langun he meupiya he mibeelan te Nengazen diyà te suluǥuen din he si David wey ziyà te menge etew zin he menge Israilihanen.