1 Kin 18:36-46

³⁶Maimailafina, antalasam maihalana yai, peloweta Ilaidiya ya lau katakatan sadaina yai be ya lauꞌuꞌula. Iyen, Aee–, Abelaham, Isako yo Iyakobo edi Yaubada! Aho ite bena wa famahata wananahaim mate um Isalaela edi Yaubada yo hinaga u famahata mate yau em tau paisowa. Ginauli mahudoꞌina wa falibagu be E ginaulidi hinaga bena wa famahatadi.

³⁷Aee–, egu lauꞌuꞌula te u atahi! Haba dodoga sa siba, mate um Guyau Yaubada yo, nuwadi wa buidi, um lisim yai.

³⁸Maꞌesega na, Guyau ena oyagi alaꞌalana galewa yai ya lidima be bulumakau, oyagi, umeꞌehu yo tanohi, ya gabu faꞌofinidi yo hoꞌowa duleinna, hinaga ya tofi faguma.

³⁹Fuyanna dodoga mahudoꞌidi laulau te sa ita mate, sa hoba lidi tanohi yai na sa tantan tiyen, Wananaha, Guyau, In Yaubada! Guyau, In Yaubada!

⁴⁰Na Ilaidiya ya libalau lisidi iyen, Baꞌala ena peloweta au tohaidi, tabu laꞌi au falau! Yo fede dodoga wa Baꞌala ena peloweta mahudoꞌidi sa tohaidi, be Ilaidiya ya foya lidiyedi Kison Gonna yai be amainiya sa wunuidi.

⁴¹Na Ilaidiya ya libalau Ahaba lisina iyen, Usa laꞌilaꞌi ya laolaoma daguguna E atahi. U lau somo am u an yo u nom.

⁴²Yo fede kin Ahaba ya lau ya anꞌan, yo somo ana ya nom, na Ilaidiya mate ya hasai Kameli Tuꞌana yai be ya dulu lidi tanohi yai. Kuluna ya tole tulina luwaga solasoladi yai, na ya lauꞌuꞌula.

⁴³Habahim ena tau paisowa ya faliba iyen, U leu be gabogabo u ita. Yo fede ya leu be ya itaꞌita lau gabogabo yai. Na ya fuyom Ilaidiya ya faliba iyen, Hige somo hesa ya ita amainiya. Ilaidiya ena tau paisowa ya dui fuyoi be gabogabo ya kepai ma faligigi luwaga.

⁴⁴Ya fuyoma, iyen, Yada kiukiu, laꞌina doha doga nimana, gabogabo yai ya pohe hasaema E ita. Yo fede Ilaidiya ya faliba iye, U lau Kin Ahaba u faliba uwe, “Usa ibe i eli buluhim be em ai saliyoti u awa u lidi.”

⁴⁵Hige walolona, galewa ya faduba. Hwayahwayau ya fatubu ya towa yo ya usa laꞌilaꞌi. Na Kin Ahaba ena saliyoti yai ya awa be ya lau Desilili nuꞌuna.

⁴⁶Ilaidiya ena adidili Guyau lisina yai ya abi, be ana luhuluhu ya abi hitin. Ya faluhu noꞌunoꞌu lawen ana bwaꞌulu yai na ya lautafotafo, be Ahaba ena saliyoti ya famuli, na ya bwaꞌi ya lau Desilili nuꞌuna.