1Dutun he timpu, nezeruwan is anak ni Jeroboam he maama he si Abia.
2Umbe, migkeǥiyan ni Jeroboam is esawa zin te, “Peuvag-uvag ka su para kenè ka mekilala he esawa ku sikew, ne hendiyè ka te Shilo. Su ziyà si Ahia he iyan kes ebpeneuven he migkaǥi kayi te kedì te egkehimu a he hadì te Israel.
3Hendiyè ka te kandin is ed-uwit te menge gasa he sepulù he supas, menge keenen, wey senge umuy he teneb, su egkeǥiyen din kenikew ke hengkey is egkehitavù kayi te anak ta.”
4Umbe, midhendiyà haazà is esawa ni Jeroboam te valey ni Ahia ziyà te Shilo. Meǥurang en si Ahia ne kenè en ebpekaahà.
5Piru migkeǥiyan te Nengazen si Ahia te, “Edhendini is esawa ni Jeroboam he ebpeuvag-uvag su para kenà sikandin mekilala. Ed-insà sikandin kenikew mehitenged te anak din he egkezeruwan, tevaka nu sikandin te egkeǥiyen ku ziyà te kenikew.”
6Umbe, hein nezineg ni Ahia is kedseled din diyà te ǥemawan, migkaǥi si Ahia te, “Laus ka. Netuenan ku he esawa ka ni Jeroboam. Maan is mibpeuvag-uvag ka? Duen mezaat he egkeǥiyen ku ziyà te kenikew.
7Ulì ka ne keǥiyi nu si Jeroboam te iyan heini egkeǥiyen te Nengazen he Megbevayà te Israel: Mibpilì ku sikew puun te menge etew, ne midhimu ku sikew he pengulu te menge etew ku he menge Israilihanen.
8Migkuwa ku is ginhedian te menge kevuwazan ni David ne imbeǥey ku ziyà te kenikew. Piru kenè ka iring te suluǥuen ku he si David, he midtuman mulà te menge suǥù ku wey ebpuun te tivuuk he ǥehinawa zin is kedsunud din kediey, wey metazeng is menge vaal zin diyà te etuvangan ku.
9Edhuna pa he mezaat is kenikew he mibeelan te mibeelan te menge hadì he nehuna kenikew. Mid-iniyuǥan a kenikew wey midhimu nu he mepauk a pinaaǥi te kebaal nu te mital he menge ed-ezapen.
10Tenged kayi, edezeetan ku is pemilya nu. Ebpenhimetayan ku is langun he sakup te pemilya nu he menge maama, uripen etawa kenà. Ebpurungan ku edezeeti is pemilya nu iring te meremerik he vutang he ebinsulan he wazà duen egkesamà.
11Is menge sakup te pemilya nu he ebpemematey ziyà te inged egkeenen te menge asu, ne is ebpemematey ziyà te vevesukà egkeenen te menge tagbis. Egkehitavù heini, su iyan a, is Nengazen, is migkaǥi kayi.”
12Ne migkeǥiyan ni Ahia haazà is esawa ni Jeroboam te, “Ulì ke en diyà te keniyu. Ne kebpekeuma nu ziyà te inged niw, ebpatey is anak nu.
13Edlalew kandin is langun he tig-Israel, ne idleveng sikandin. Iyan dà sikandin sakup te pemilya ni Jeroboam he egkepurungan is kedlevenga zuen, su iyan dà sikandin sakup te pemilya ni Jeroboam he nekepenunuat te Nengazen he Megbevayà te Israel.
14Ne zutun he timpu, duen edhimuwen te Nengazen he mahadì te Israel he iyan edezaat te pemilya ni Jeroboam.
15Edsilutan te Nengazen is menge etew ziyà te Israel taman te ebpengerkeren sikandan iring te kegkerkera te tigbew he egkeigù te seleg te wahig. Id-awè din sikandan kayi te meupiya he tanà he imbeǥey zin diyà te menge kepuun dan, ne ibpeyapat din sikandan diyà te egkehunaan te Wahig he Eufrates su ǥeina te midhimu zan he mepauk sikandin pinaaǥi te kebpehitindeg dan te tukud he simbulu te vahi he ed-ezapen he si Ashera.
16Ebey-anan din sikandan tenged te menge salà ni Jeroboam, he nehimu he hinungdan te kebpekesalà te menge tig-Israel.”
17Ne zutun mid-ulì is esawa ni Jeroboam diyà te Tirza. Ne kebpekeuma zin diyà te ǥemawan te valey zan, ne segugunà minatey sikan is anak din.
18Ne inlalew te langun he menge tig-Israel haazà is batà ne inleveng dan sikandin, ne iyan heeyan nekaǥi te Nengazen pinaaǥi te suluǥuen din he mibpenaub din he si Ahia.
19Is duma pa he ǥuǥud mehitenged te kedhadì ni Jeroboam, ragkes is kebpekidtebek din, ne ingkesurat diyà te Libru he Midsuratan te menge Keguǥuza te menge Hadì te Israel.
20Midhedian ni Jeroboam is Israel seled te 22 he tuig. Ne hein minatey sikandin, iyan nekeilis kandin he hadì is anak din he si Nadab.
21Si Rehoboam he anak ni Solomon iyan hadì diyà te Juda. Ne 41 he tuig is keǥurang din hein nehimu sikandin he hadì. Ne midhadì sikandin he ziyà te Jerusalem seled te 17 he tuig. Diyà te menge inged te menge tribu te Israel, iyan is Jerusalem nepilì te Nengazen he zutun sikandin ebeǥayi te zengeg. Is iney ni Rehoboam iyan si Naama he Amunihanen.
22Mibaal te salà diyà te etuvangan te Nengazen is menge etew ziyà te Juda, ne tuwas pa he zekelà is pauk te Nengazen kandan te pauk din te menge kepuun dan, su tuwas he zekelà is menge salè dan.
23Mibaal zaan sikandan te menge pemuhatà diyà te metikang he menge lugar wey te tedeman he menge vatu, wey mibpehitindeg sikandan te tukud he simbulu te vahi he ed-ezapen he si Ashera ziyà te puntur te kada vuvungan wey ziyà te sihung te kada merapung he kayu.
24Ne liyu keniyan, duen pa menge maama wey menge vahi kandan he ebelegyà te zengeg dan diyà te menge lugar he ed-ezapan dan. Is menge etew ziyà te Juda mid-ulaula zan is langun he utew mezaat he ulaula he iyan aney he teǥi-ulaula zuen is menge etew ziyà te menge nasyun he impesegseg te Nengazen te menge Israilihanen.
25Hein ikelima he tuig te kedhadì ni Rehoboam, midsurung ni Hadì Shishak he hadì te Ehipto is Jerusalem.
26Mibpenguwa zin is menge ketiǥeyunan diyà te valey te Nengazen wey is diyà te turuǥan. Migkuwa zin is langun, ragkes en is langun he menge kelasag he vulawan he mibpeveelan ni Solomon.
27Umbe, mibpevaal si Hadì Rehoboam te brunsi he menge kelasag he inliwan dutun, ne insarig din heini te menge upisyal te menge vantey he ebantey te ǥemawan te turuǥan.
28Ne emun edhendiyà haazà is hadì te valey te Nengazen, ne ed-uwiten duen te menge vantey heini he menge kelasag, ne kegkepasad dutun ne idlikù dan diyà te menge ruǥu zan.
29Is duma pa he ǥuǥud mehitenged te kedhadì ni Rehoboam, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
30Dutun he timpu layun ebpetebekà si Rehoboam wey si Jeroboam.
31Hein minatey en si Rehoboam, inleveng sikandin diyà te midlevengan te menge kepuun din diyà te Inged ni David. (Is iney ni Rehoboam ne egngezanan ki Naama he Amunihanen.) Is nekeilis kandin he hadì iyan is anak din he si Abia.
