1Neuǥet is kebpeked-emiǥu ni Hadì Hiram he hadì te Tyre wey si Hadì David. Umbe hein nezineg ni Hiram he si Solomon is nekeilis te amey zin he hadì, duen menge upisyal zin he impehendiyè din te ki Solomon.
2Ne mibpeuwit te lalag si Solomon diyà te ki Hiram, ke sikandin te,
3“Netuenan nu he wazà mekepevangun is amey ku he si David te valey he para te Nengazen he Megbevayè din, su layun dà sikandin ebpekidtebek te menge kuntada zin diyà te menge nasyun te peliǥuy. Kenè din heini egkevangun taman te igkepezaag te Nengazen kandin is langun he kuntada zin.
4Piru ǥuntaan mibeǥayan a te Nengazen he Megbevayè ku te kelinew diyà te peliǥuy, su wazè ku en menge kuntada wey wazè en daan bangkit.
5Umbe, egkeisip ku he ebangun ad te valey te Nengazen he para te kebeǥey kandin te zengeg te Nengazen he Megbevayè ku, sumalà is nekaǥi te Nengazen diyà te amey ku he si David. Iyan heini migkaǥi zin diyà te ki David: ‘Is anak nu he idliwan ku kenikew te kedhadì, iyan ibpevangun ku te valey he para kediey.’
6“Umbe suǥù ka te menge etew nu te kebpemiley te menge kayu he sidru ziyan te Lebanon para kediey. Ibpeuǥup ku kandan is kedì he menge etew, ne edsuhulan ku is kenikew he menge etew sumalà te egkesuatan nu he kezekelà te suhul. Su netuenan nu man he wazà kayi te kenami metau he ebpemiley te kayu he iring te menge etew nu he tig-Sidon.”
7Utew nelipey si Hiram hein nezawat din haazà is lalag he impeuwit ni Solomon. Ke sikandin te, “Ereg he edeliǥen is Nengazen guntaan he andew, su mibeǥayan din si David te anak he metau he edumala te mekeǥeǥehem he nasyun!”
8Ne zutun mibpeuwit si Hiram te lalag diyà te ki Solomon he edhenduen te, “Nezawat ku is lalag he impeuwit nu, ne ibeǥey ku kenikew is menge kayu he sidru wey sipris he egkinehenglanen nu.
9Ibpahakut ku heini te menge etew ku puun te Lebanon taman te zaǥat, ne ebeelan dan heini he ǥakit ne ibpelayun dan pehendiyà te lugar he egkesuatan nu. Kebpekeuma kayi ibpedsusuwey zan ne iyan kew en human metau. Ne iyan bayad nu kedì, is beǥayi a kenikew te keenen para te menge etew ku ziyà te turuǥan ku.”
10Umbe, mibeǥayan ni Hiram si Solomon te langun he egkinehenglanen din he menge kayu he sidru wey sipris.
11Ne ebpeuwitan ni Solomon si Hiram te 60,000 he saku he trigu wey 110,000 he gelun te lana he ulibu kada tuig.
12Mibeǥayan te Nengazen te ketau si Solomon sumalà is pesarig din. Meupiya is kedepità ni Solomon wey si Hiram, ne mid-uyun dan he kenè dan ebpetebekà.
13Ne zutun mibpeǥes ni Hadì Solomon te kedterebahu is 30,000 he menge etew he ebpemuun diyà te tivuuk he Israel.
14Ne kada vulan, 10,000 is edsuǥuen din diyà te Lebanon. Umbe is kada grupu kayi ne senge vulan diyà te Lebanon ne zezuwa he vulan diyà te keugelingen dan he lugar. Si Adoniram is pengulu kayi he menge terebahanti.
15Ne 70,000 is menge etew ni Solomon he perehakut te menge idhiman, ne 80,000 is perevasbas te menge vatu ziyà te vuntud.
16Ne zuen din daan 3,300 he menge purman he iyan edumala te terebahu wey te menge terebahanti.
17Ne tenged te mandù ni Solomon, ebasbas dan te zezekelà wey meupiya he klasi te menge vatu he para te pundasyun te valey te Nengazen.
18Umbe, in-andam te menge etew ni Solomon wey te menge etew ni Hiram duma te menge tig-Gebal is menge vatu wey menge kayu he para ibangun duen te valey te Nengazen.
