Ŋicwofuŋ I 18:36-46

³⁶Eme owâ gieo taha bajumbieŋ dameŋ i maickeme porofete Elia e ware mai domarâ ʒiŋuc muwec: “O Wofuŋ, Abraham Isaka â Israe jaŋere Anutu, go Israe guruo Anutu jukic â no kiŋaŋ qaqage jukopac, ehuc wiac sasawa ʒi gore micte ekopac irec fuŋne miŋecgac bataniŋkezemec.

³⁷Micnaneo roc, o Wofuŋ, micnaneo roc, eme ŋicguru ʒi jaŋe Wofuŋ go Anutu jukic â maŋjeŋic bârisiekic i mana jaŋgeŋkenʒepieŋ.”

³⁸Iŋuc muhame Wofuŋte ʒocbâruŋ waharâ taha qowi â ʒoc â qânâ â wândoc ʒâseŋke‐fârewec â pareo opâ ʒâkereŋkewec.

³⁹Ŋic ŋokac sasawa jaŋe wiac i honerâ mâreŋko qarâ ʒâŋe mai‐jeŋic hetutuckerâ fohuc mumbiŋ, “Wofuŋ e Anutu fârine, Wofuŋ e Anutu fârine.”

⁴⁰Eme Eliazi jazawec, “Ajoc, Baali porofetefâcne rocjopa‐fâreniŋ, moczi moc mi wisezejec.” Mume rocjopambiŋ. Eme Eliazi Kisoŋ opâo bacjopa hurâ ira qâhâmoc‐jopa‐fârewec.

⁴¹Elia e iŋuc erâ Ahaba ʒiŋuc âzâcnewec: “No hoe wareme fânâŋ manakopacte go ferâ nânâ opâge nâc.”

⁴²Iŋuc âzâcneme Ahaba e nânâ opâ nâocte fewec. Ehame Elia e Karamele tiki botâŋnao fewec. Ferâ waha ŋehuc daperâ qizec‐ticne dieŋ jahecne jahere ŋoŋondeŋko dunduŋ hume kumbeŋkewec.

⁴³Iŋuc erâ kiŋaŋŋic‐ticne ʒiŋuc âzâcnewec: “Ajoc, go ferâ hâweckopec fic.” Iŋuc âzâcneme e ferâ fihuc muwec: “No hâwecko wiac moc mi honekopac.” Iŋuc mume Eliazi muwec, “Go mocwâc fec wahac etec arec 7 ezejec.”

⁴⁴Eme kiŋaŋŋic e arec 7 tataranao ferâ waharâ ʒiŋuc âzâcnewec: “Manakic, karorac piticne mac ŋic mocte metape iŋucne hâwecko fuakac.” Iŋuc mume Eliazi muwec, “Hoezi Ahaba hebâzickezacte go ferâ âzâcnetec keretac‐ticne baʒawierâ huoc.”

⁴⁵Ehame dameŋ mi ʒorahame karorac â mâŋâŋ jahe qâzuckepire sambâŋ gâpâre‐fâreme hoe micsâko hewec. Eme Ahaba e keretac‐ticnao ferâ Jesere haeo risiewec.

⁴⁶Ehame Wofuŋte tâpirizi Elia baafeckeme umbika‐ticne jomarâ Ahaba sirickehuc gasackerâ Jesere haesac motâcko bâbâni fisiwec.