1 BƐKPÀÀTÌBƐ̀ 21:5-23

⁵Kòo pokù Sesɑbɛɛdii o bekɛ kɛ dɔ̀: A yɛ̀mmɛ̀ cɑ̀ɑ̀rɛ̀nɛ̀ bɑ? Dɛ̀ dòmmɛ kɑ̀ɑ yetɛ mudiì?

⁶Kòo ò tɛ̃̀ńnɛ́ kɛ dɔ̀: M bɛ́innɛ̀ Nɑbɔti nwe Sisedɛɛdi ɛì kou kɛ tú ò n fítɛ́nɛ̀ o pɑku, kòo mɛ ndɔ́ nhò cèètɛ kutɛkù. Kòo yetɛ kɛ tú ò í yó n duɔ́ nho pɑku.

⁷Kòo pokù dɔ̀: Kɛ̀ fɔ̃́ɔ̃̀ bɑɑ tú Isidɑyɛɛribɛ kóo kpɑ̀ɑ̀tɑ̀ɑ̀? Ítɛ́ kɛ́di! Cɑ́tinnɛ ɑ yɛ̀mmɛ̀, mí n yóó kù ndɑ duɔ́mmu.

⁸Mɛm̀mɛ kɛ̀ Sesɑbɛɛdii wɑ̃ri yɛpɑ́tɛ nɛ̀ okpɑ̀ɑ̀tì yètìrì kɛ́ĩkú okpɑ̀ɑ̀tì kó mɛcɑnnimɛ̀, kɛ́ yɛ̀ duɔ́ ndihɛì kó bɛkótíbɛ̀ nɛ̀ muwɛ̃rímú yɛmbɛ̀ bɛ̀ɛ̀ bo Nɑbɔti bo dìì ɛì.

⁹Ò do wɑ̃̀ri tì dɛ kó yɛpɑ́tɛ miɛkɛ tiì tu: Dɔúnnɛ̀ mɛnùboúmmɛ̀ kó diyiè, kɛ̀ dì tùɔ̀kɛ di kɑnnɛ Nɑbɔti dɛ ììkɛ̀,

¹⁰kɛ́kɑnnɛ bɛnitiyonkubɛ o ììkɛ̀ bɛ̀ɛ̀ yóó yĩ́ ò sɑ̃̀ɑ̃́ nti Yiɛ̀ nKuyie nku nɛ̀ okpɑ̀ɑ̀tì, kɛ̀ dí ò dènnɛ ditowɑɑ̀ kóò bùɔ́tí yɛtɑ̃́rɛ̀ kɛ́kuɔ.

¹¹Kɛ̀ Nɑbɔti ɛì kó bɛkótíbɛ̀ nɛ̀ muwɛ̃rímú yɛmbɛ̀ kɛ̀ bɛ̀ɛ dɔɔ̀ Sesɑbɛɛdi bɛ̀ wɑ̃̀ri yɛ̀ɛ̀ pɑ́tɛ yɛ̃ mmù.

¹²Kɛ̀ bɛ̀ɛ dɔú mmɛnùboúmmɛ̀ kó diyiè kɛ̀ dìì tuɔkɛ kɛ̀ bɛ̀ɛ kɑnnɛ Nɑbɔti ditĩ̀nnì ììkɛ̀.

¹³Kɛ̀ bɛnitiyonkubɛ bɛ̀dɛ́bɛ̀ɛ kɑri kóò wetínnɛ́ kɛ bɛ́i nkɛ dɔ̀: Nɑbɔti sɑ̃̀ɑ̃́ nti Yiɛ̀ nKuyie nku nɛ̀ okpɑ̀ɑ̀tì. Mɛm̀mɛ kɛ̀ bɛ̀ɛ ò dènnɛ dihɛì kóò bùɔ́tí yɛtɑ̃́rɛ̀ kɛ́kuɔ.

¹⁴Kɛ̀ bɛ̀ɛ deè kɛ́tɔ̃ nkɛ̀ bɛ̀ɛ nɑ́kɛ́ Sesɑbɛɛdi kɛ dɔ̀: Ti bùɔ́tímu Nɑbɔti yɛtɑ̃́rɛ̀ kɛ kùɔ.

¹⁵Sesɑbɛɛdi kèè dìì mɔ̀nnì Nɑbɔti kumɛ̀ kɛ́nɑ́kɛ́ Akɑbu kɛ dɔ̀: Ítɛ́ kɛ́túótɛ́ Nɑbɔti Sisedɛɛdi kou pɑku ò do yɛ̃ nhò í yóó dɑ fítɛ́nɛ̀ kù. Ò kumu, ò tɛ̃́nkɛ í kpɑɑ́ fòù.

¹⁶Kɛ̀ Akɑbuu tì kèè kɛ́ítɛ́ kɛ́kɔtɛ Nɑbɔti Sisedɛɛdi kou pɑku borɛ̀ kɛ bo kù tùótɛ́ kɛ́tiekɛ.

¹⁷Kɛ̀ ti Yiɛ̀ nKuyie mbɛ́innɛ̀ Edii Tisibiti ɛì kou kɛ dɔ̀:

¹⁸Ítɛ́ kɛ́kɔtɛ Sɑmmɑrii kɛ́yɑ̀ Isidɑyɛɛribɛ kóo kpɑ̀ɑ̀tì Akɑbu, kòo bo Nɑbɔti pɑku miɛkɛ, ò kɔ̀tɛ kɛ bo kù tùótɛ́mu kɛ́tiekɛ.

¹⁹Kɔtɛ kóò nɑ̀kɛ́ kɛ dɔ̀: N tú ò kùɔ onìtì kɛ dèè kɛ tóú o pɑku yɑ́ɑ̀bɑ? Nɛ̀ dɛ kpɛ́í mmí ndi Yiɛ̀ nKuyie m bɛ́immu kɛ tú simɔɔ́ dìɛ́ dɛ̀ Nɑbɔti yĩ̀ĩ̀ nsì yóó dɛ ndíɛ́ o kɔ̃mɛ. Kɛ̀ Edii kɔtɛ kɛ́yɑ̀ Akɑbu.

²⁰Kɛ̀ Akɑbu dɔ̀: Edii n dootitɔù ɑ wɛ̃̀tɛ kɛ m pĩ̀ḿmɑɑ̀? Kɛ̀ Edii dɔ̀: Ɛ̃ɛ̃, n dɑ pĩ̀ḿmu kɛ́yɛ̃́ ɑ dɔ̀ɔ̀mɛ̀ ti Yiɛ̀ nKuyie nyí dɔ́ dɛ̀ kɛ sɔ̀nnɛ.

²¹Kuyie ntu kù yóó duɔ́ nkɛ̀ mɛyɛi mmɛɛ̀ dɑ́ tuɔkɛní, kù yóó kɑ́útɛ́mu ɑ kó kubotí. A cĩ́ɛ̃̀tɛ̀ miɛkɛ òmɔù í yó nkpɑɑ́, onitidɔ̀ù yoo kudɑɑkù yoo wèè te omɑ́ɑ̀.

²²Kù yóó dɔɔ̀ ɑ cĩ́ɛ̃̀tɛ̀ kù dɔ̀ɔ̀ mɛ̀mmɛ Nɛbɑti birɛ Sedoboɑmmu kpɛtɛ nɛ̀ Aiyɑ birɛ Bɑsɑɑ kɛ yɛ̃́ ɑ tɑnnɛ́mɛ̀ Isidɑyɛɛribɛ mɛyɛi mmiɛkɛ kɛ íi ti Yiɛ̀ nKuyie mmiɛkɛ.

²³Kɛ̀ ti Yiɛ̀ nKuyie n nɑ̀kɛ́ tìì yóó tuɔkɛní Sesɑbɛɛdi kɛ dɔ̀: Simɔɔ́ siì yóó cɑ́ɑ́kɛ́ Sesɑbɛɛdi kupɑku bɛ̀ tú ku Sisedɛɛdi ku miɛkɛ.