1 Reye 21:5-23

⁵Mãwã b̶ʌd̶e Acabo quima Jezabelera idjimaa zeped̶a iwid̶isia: –¿Bʌra cãrẽ cãrẽã sopua b̶ʌ? ¿Cãrẽã ne co ama b̶ʌ?–

⁶Acaboba panusia: –Mʌ̃ra Jezreeld̶ebema Nabó ume bed̶easia. Mʌ̃a iwid̶isia idji uva ẽjũãra mʌ̃́a nẽdobuemãrẽã. Parata cãyãbara dewara ẽjũãda quĩrĩã b̶ʌbʌrʌ mʌ̃a diayad̶a asia. Baribʌrʌ idji ẽjũãra nẽdobueẽ́ana asia.–

⁷Maʌ̃ne Acabo quima Jezabelba jarasia: –¿Mãwãra bʌra Israeld̶ebema boroẽ́ca? Sopua b̶arãdua. Piradrʌped̶a ne codua. Mʌ̃a Jezreeld̶ebema Nabó uva ẽjũãra bʌ́a jãrĩ diaya.–

⁸Ara maʌ̃da Jezabelba Acabo trʌ̃neba cartada b̶ʌcuaped̶a Acabo sẽyãda b̶ʌsia. Maʌ̃ra Nabó purud̶ebema bororãmaa, dji dromarãmaa bid̶a diabuesia.

⁹Maʌ̃ cartad̶e idjia nãwã b̶ʌsia: “Jũmarãa jarad̶adua ne cod̶aca ewarida od̶amãrẽã. Maʌ̃ ewarid̶e ãbaa dji jʌred̶aped̶a Nabóra ẽberãrã nocoare chũmebid̶adua.

¹⁰Idjab̶a ẽberã cadjiruada umé idji caita chũmebid̶adua sewad̶eba jarad̶amãrẽã idjia Ãcõrẽda, Israeld̶ebema boro sid̶a biẽ́ jarasida. Maʌ̃be Nabóra puru jĩga eded̶aped̶a mõgaraba tab̶ari bead̶adua.”

¹¹Jezabelba maʌ̃ cartad̶e b̶ʌd̶a quĩrãca Jezreel purud̶ebema bororãba, dji dromarã bid̶a jũma osid̶aa.

¹²Ãdjirãba jũmarãa jarasid̶aa ne cod̶aca ewarida od̶amãrẽã. Maʌ̃be Nabóra ẽberãrã nocoare chũmebisid̶aa.

¹³Ẽberã cadjiruada umé zebid̶aped̶a Nabó caita chũmebisid̶aa. Maʌ̃ umébemaba jũmarã quĩrãpita sewad̶eba jarasid̶aa Nabóba Ãcõrẽda, Israeld̶ebema boro sid̶a biẽ́ jarasida. Ara maʌ̃da ẽberãrãba Nabóra puru jĩga eded̶aped̶a mõgaraba tab̶ari beasid̶aa.

¹⁴Mãwãnacarea Jezreel purud̶ebema bororãba Jezabelea jarabisid̶aa Nabóra mõgaraba tab̶ari beasid̶ada.

¹⁵Nabó mõgaraba tab̶ari beaped̶ad̶a ũrĩsid̶e Jezabelba idji quima Acaboa nãwã jarasia: –Jezreel purud̶ebema Nabóra beasid̶aa. Maʌ̃ bẽrã idjia uva ẽjũã nẽdobue quĩrĩãẽ́ b̶ad̶ara edadua.–

¹⁶Acaboba Nabó beaped̶ad̶a ũrĩsid̶e ara maʌ̃da Jezreel purud̶aa Nabó uva ẽjũã edai carea wãsia.

¹⁷Maʌ̃misa Ãcõrẽba Tisbé purud̶ebema Elíaa nãwã jarasia:

¹⁸–Israeld̶ebema boro Acabo Samariad̶e b̶abarira acʌd̶e wãdua. Idjia Nabó b̶asi uva ẽjũãra edai carea wãsia. Ara nawena mama b̶ʌa.

¹⁹Idjía jaradua: “Ãcõrẽba nãwã jara b̶ʌa: bʌa Nabóra beaped̶a idji ẽjũãra edasia. Maʌ̃ carea usaba Nabó oa seneped̶ad̶ama bʌ oa sid̶a senenia.”–

²⁰Elía Acaboma jũẽsid̶e Acaboba idjía jarasia: –Mʌ̃ dji quĩrũ, ¿bʌa mʌ̃ra acʌd̶e ze b̶ʌca?– Elíaba panusia: –Mãẽ, bʌra acʌd̶e ze b̶ʌa. Bʌa Ãcõrẽ quĩrãpita jũmawãyã cadjiruada o b̶ʌa.

²¹Maʌ̃ carea Ãcõrẽba bʌra bio cawa oya. Israel druad̶e jũma bʌ ẽberãrã dji umaquĩrãda quenabiya: nezoca b̶eada, nezocaẽ́ b̶ea sid̶a. Ab̶ed̶a jũma bʌd̶eba yõbʌdarãda idjia jõbiya.

²²Idjia Nabat warra Jeroboaʌ̃ ẽberãrã jõbid̶a quĩrãca idjab̶a Ahía warra Baasa ẽberãrã jõbid̶a quĩrãca bʌ ẽberãrã sid̶a jõbiya. Bʌa cadjirua o b̶ʌd̶eba idjira bio quĩrũbisia. Bʌa israelerãa bid̶a cadjiruada obisia.

²³Maʌ̃ awara bʌ quima Jezabeld̶ebemada Ãcõrẽba nãwã jara b̶ʌa: Jezreel puru caita idjira bead̶aped̶a usaba cod̶ia.