1 Kings 21:5-23

⁵Me yib Jezebel ni le’engin ngak me ga’ar, “Mang e kari kireban’um ngay? Mangfan ndab mu abich?”

⁶Me ga’ar, “Bochan e thin nike yog Naboth ngog. Kugog ngak ni nggu chuw’iy fa gi woldug rok ni grape, mra ba’adag ni nggu pi’ bang e woldug ni grape ngak nge yan nga luwan mu gu pi’, me ga’ar dabiyag ni nge pi’!”

⁷Me ga’ar Jezebel, “Mog, gur e pilung fa gathi gur? Mu chuw u chob ngam fal’eg lanin’um ma ga abich. Bay gu fek e gi woldug nem rok Naboth nggu pi’ ngom!”

⁸Me yoloy e babyor nge tay fithingan Ahab ngay, me pag e pow rok Ahab nga daken, me pi’ nge yan ngak e pi tolang ni yad bay u tan pa’ Ahab nge pi’in yad be yog e thin u Jezreel.

⁹Re gi babyor nem e bay e thin riy ni ga’ar: “Nga mogned reb e rran ni ngan pag e abich, mi gimed ulunguy e girdi’, mi gimed yog ngak Naboth nge par ko gin ntagil’ e en ni yibe tay fan.

¹⁰Mi gimed fek l’agruw e girdi’ nrib kireb nga rognew u p’eowchen nike yog e thin nib kireb ngak Got nge en ni pilung. Mi gimed fek nga wuru’ e binaw ngam malang niged nge yim’.”

¹¹Me rin’ e pi tolang ni yad bay u tan pa’ Ahab nge pi’in yad ma yog e thin u Jezreel e n’en keyog Jezebel.

¹²Miyad yog reb e rran ni nga ni pag e abich, miyad ulunguy e girdi’, miyad yog ngak Naboth ni nge yan i par ko gin ntagil’ e en ni yibe tay fan.

¹³Fa gal girdi’ nrib kireb e rognew u rom u fithik’ e girdi’ nike yog Naboth e thin nib kireb ngak Got nge en ni pilung, ma aram min fek Naboth nga wuru’ e binaw nga ni malangnag nge yim’.

¹⁴Mi ni pi’ e re bugithin ni ba’aray nge yan ngak Jezebel nike lunguy, “Fa’anem i Naboth e kan thang e pogofan rok.”

¹⁵Ma nap’an ni taw e re bugithin nem ngak Jezebel me ga’ar ngak Ahab, “Ke yim’ Naboth. Ere ngam fi’iy fa gi woldug ni fa’ani siyeg ni nge pi’ ngom nchuway’.”

¹⁶Ka chingiyal’nem me yan Ahab i lekag fa gi woldug ni aram e nge fi’iy.

¹⁷Me ga’ar SOMOL ngak Elijah ni fare profet ni be’ u Tishbe,

¹⁸“Mman mu guy Ahab ni Pilung nu Samaria. Ya gimew ra mada’ ko fa gi woldug ni fi’in Naboth, ni aram e ke yan ni nge lekag ya nge fi’iy.

¹⁹Mog ngak ni gag SOMOL e be lungug ngak, ‘Mog, kam thang e pogofan rok Naboth, ma ngkum fek tafen ngam tafnay?’ Mog ngak ni be lungug, ‘Gin’en ni i lil’ e pilis racha’en Naboth riy e ireram e gin ku bayi lil’ e pilis e racha’ rom riy!”

²⁰Ma fa’ani guy Ahab Elijah me ga’ar, “To’ogor rog, kam piri’egeg.” Me ga’ar Elijah, “Er rogon, kug piri’egem. Kam par ni tin nib kireb u p’eowchen SOMOL e ga be ngongliy.

²¹Ere be ga’ar SOMOL ngom, ‘Bay gu girengiy e riya’ nga dakenam. Bay gu thang owchem, mu gu thang owchen urngin e pumo’on ko tabinaw rom, ni bitir nge pilibthir nta’reb rogon.

²²Tabinaw rom e bayi par ni bod e tabinaw rok Jeroboam ni Pilung ni fak Nebat, nge tabinaw rok Baasha ni Pilung ni fak Ahijah, ya kam k’aring e damumuw ngog ni fan e kam waliy yu Israel nga fithik’ e denen.’

²³Ma Jezebel ku ba’aray e n’en keyog SOMOL ni fan ngak, ‘Bayi longuy e pilis Jezebel u lan e binaw nu Jezreel.’