ጋላቲያ 4

1

2

3

4

5

6

¹ሺን ኣኬኪቴ፤ ባሬ ኣቡዋ ላቲያ ናዓይ ናዓቴꬃን ዴዒዴ፥ ዴዒያዋ ኡባው ጎዳ ጊዶፔካ፥ ኣይላቱዋፔ ኣው ዱማቲያሳይ ባዋ።

²ሺን ባሬ ኣቡ ጌዳ ዎዲ ዉራና ጋካናው፥ ኣ ሃዳራ ኣኬዳዋንቱ ኩሺያኒኔ ኣ ሚሻ ናጊያዋንቱ ኩሺያን ዴዔ።

³ሃዋዳን ኑኒካ ቃሲ ናዓቴꬃን ዴዒያ ዎዴ፥ ሃ ኣላሚያ ሞዲያ ኣያናቱዋሲ ኣይሌቴዶ።

⁴ሺን ያናው ቤሲያ ዎዲ ጋኬዳ ዎዴ፥ ፆሳይ ማጫዉኒፔ ዬሌቶዋ፥ ሙሴ ሂጌው ሞዴቲያ ኣሳ ጋርሳን ዬሌቴዳዋ፥ ባሬ ናዓ ኪቴዳ።

⁵ኣዪሲ ኪቴዴ ጎፔ፥ ሂጊያን ሞዴቲዴ ዴዒያዋንታ ዎዛናዉኔ ኑና ባሬ ናና ኦꬃናው ኪቴዳ።

⁶ፆሳይ ሂንቴ ኣ ናና ጊዲያ ዲራው፥ «ኣባቦ፥ ታ ኣቦ» ጊዴ ዋሲያ ባሬ ናዓ ኣያና፥ ኑ ዎዛና ጊዶ ኪቴዳ።

⁷ሄዋ ዲራው፥ ሃዋፔ ሲንꬃው ኔኒ ፆሳ ናዓ ጊዲያዋፔ ኣቲን፥ ኣይሌ ጊዳካ፤ ቃሲ ኔኒ ኣ ናዓ ጊዶፔ፥ ኪሪስቶሳ ባጋና ፆሳይ ቃላ ጌሌዳባ ላቲያዋ።

⁸ሺን ሂንቴ ሃዋፔ ካሴ ፆሳ ኤሬናን ዴዒዴ፥ ቱማ ጊዴና ፆሳቱዋሲ ኣይሌ ጊዲዴ ኤኖ ጌዲታ።

⁹ሺን ሃዒ ፆሳ ኤሪዴ፥ ኡባካ ፆሳን ኤሬቲዴ፥ ላፋኔ ቃሲ ካꬌቴዳ ሃ ኣያናቱዋኮ ዋኒዴ ሲሚቴ? ሺሬቲ ሲሚ፥ ኣይሌ ጊዲዴ፥ ላዔꬁዋ ኡንቱንቶ ኤኖ ጋናው ኮዪቴ?

¹⁰ዱማቴዳ ጋላሳቱዋ፥ ኣጌናቱዋ፥ ዎዴቱዋኔ ላይꬃቱዋ ሂንቴ ሎይꬂ ናጉዋን ኣይሌቴዲታ።

¹¹ታና ሂንቴባይ ያሼ፤ ታኒ ሂንቴንቶ ጮ ጋዴ ሜላ ዳቡራዲታሻ?

¹²ታናዳን ኣማኒያዋንቶ፥ ታኒ ሂንቴንቱዳን ሃኔዳ ዲራው፥ «ሂንቴንቱካ ታናዳን ሃኒቴ» ጋዴ፥ ሂንቴንታ ዎሳይ፤ ሂንቴ ታና ኣይኔ ናቂቤይኪታ።

¹³ታኒ ኮይሮ ሂንቴንቶ ሚሺራቹዋ ቃላ ኦዴዳዌ ታና ሃርጊሲሺና ጊዲያዋ ሂንቴ ኤሪታ።

¹⁴ታው ፓፃቴꬃይ ꬋዪዴ፥ ሂንቴንቶ ፓጬ ጊዲናካ፥ ታና ካꬊቤይኪታ፤ ሼኔቲካቤይኪታ። ሄዋ ዲራ ኡባ ታና ፆሳ ኪታንቻ ሞኪያዋዳን፥ ዎይ ኪሪስቶሳ ዬሱሳ ሞኪያዋዳን ሞኬዲታ።

¹⁵ያቲና፥ ሄኮ ሂንቴ ናሼቲያዌ ቤቴና! ታና ጊዶፔ፥ ሂንቴንቶ ዳንዳዬቲያባ ጊዲና፥ ታው ሂንቴ ሂንቴንቱ ኣይፊያ ዎጪ ኢሚንቶኔ ኢፄናዋ ማርካታይ።

¹⁶ያቲና ታኒ ሂንቴንቶ ቱሙዋ ኦዲያ ዲራው፥ ሂንቴ ሞርኬ ጊዳይታ?

¹⁷ሃራ ኣሳቱ ሂንቴንቶ ቃሬቲያዋ ማላቲኖ፤ ሺን ኡንቱንቱ ቆፋይ ሎዔና፤ ኣዪሲ ጎፔ፥ ሂንቴ ኡንቱንቶ ቃሬታና ማላ፥ ታፔ ሂንቴንታ ሻካናው ኮዪኖ።

¹⁸ሺን ታኒ ሂንቴ ማታን ዴዒያ ዎዴ ፃላላን ጊዴናን፥ ኡባ ዎዴካ ሎዖባን ሂንቴ ኮዬቲያዋንታ ጊዶፔ ሎዓ።

¹⁹ታ ሲቆ ናቶ፥ ኪሪስቶሳ ሜꬌታይ ሂንቴንቱን ቤታና ጋካናው፥ ማጫዉኖ ኦይꬃይ ሳኪያ ኬና፥ ታኒ ሂንቴ ዲራው ሳኬታይ።

²⁰ሺን ታኒ ሂንቴንቶ ሂርጊያ ዲራው፥ ሃዒ ሂንቴ ማታ ባዴ ሂንቴንቱና ዶናን ሃሳያንቶ፥ ዳሪ ዶሳይ።

²¹ሙሴ ሂጊያን ሞዴቲዴ ዴዓናው ኮዪያዋንቶ፥ ሂጊ ጊያዋ ሲስኪቴ? ኣኔ ታው ኦዲቴ።

²²ኣዪሲ ጎፔ፥ ፆሳ ማፃፋይ፥ «ኣብራሃሞሲ ዳንጋፂራቲፔኔ ጎዳቲፔ ዬሌቴዳ ላዑ ናናይ ዴዒኖ» ያጌ።

²³ሺን ዳንጋፂራቲ ናዓይ ኣሳይ ናዓ ዬሊያ ማራዳንካ ዬሌቴዳ፤ ቃሲ ጎዳቲ ናዓይ፥ ፆሳይ ሲንꬃፔ ኢማና ጊዴ ቃላ ጌሌዳዋን ዬሌቴዳ።

²⁴ሃ ላዑ ማጫዋንቱ ላዑ ጫቁዋሲ ጊዲያ ሌሚሶ። ኡንቱንቱፔ ኢቲና፥ ሙሴሲ ሂጊ ኢሜቴዳ ሲና ዴሪያፔ ጫቁ ዬዳዉና፥ ባሬ ናና ኣይሌቴꬃው ዬላዱ፤ ኢዛካ ኣጋሮ።

²⁵ሃ ኣጋራ ኣራቢያ ጌቴቲያ ጋዲያን ዴዒያ ሲና ዴሪያን ሌሚሴታው፤ ቃሲካ ሃዒ ዴዒያ ዬሩሳላሜን ሌሚሴታው፤ ኣዪሲ ጎፔ፥ ዬሩሳላሜ ካታማይ ባሬ ጊዶን ዴዒያ ኣሳ ኡባና ሙሴ ሂጊያ ኣይሌቴꬃን ዴዔ።

²⁶ሺን ሳሉዋን ዴዒያ ዬሩሳላሜ ኣይሌቴꬃን ዴዑኩ፤ ኢዛ ኑሲ ኣቶ ጊዴዳ ሳሮ።

²⁷ኣዪሲ ጎፔ፥ ፆሳ ማፃፋይ፥ «ሃኔ፥ ዬላቤና ማንꬃቴ፥ ናሼታ፤ ዬሉዋ ኦይꬃይ ኦይቂ ኤሬናዉኔ፥ ኔ ኮሻ ꬎቁ ኦꬃዴ ኢሊላ! ኣዪሲ ጎፔ፥ ባሬ ኣሲናና ዴዒያ ማጫዉኒፔ፥ ባሬካ ዴዒያ ማጫዉኒው ጮራ ናናይ ዴዓና» ያጌ።

²⁸ታናዳን ኣማኒያዋንቶ፥ ኑኒካ ሳሪ ናዓ ዪሳቃዳን፥ ፆሳይ ሲንꬃፔ ኢማና ጊዴ ቃላ ጌሌዳ ናና።

²⁹ሺን ሄ ዎዴ ኣሳ ማራዳን ዬሌቴዳዌ፥ ፆሳ ኣያናይ ጌዳዋዳን ዬሌቴዳዋ ዬዴርሲ ዲጎዋዳን፥ ሃዒካ ሄዋ ማላ።

³⁰ሺን ፆሳ ማፃፋይ ዋጊ? «ዳንጋፂርቲ ናዓይ ጎዳቲ ናዓና ኢቲፔ ላቴና ዲራው፥ ዳንጋፂራቶ ኢዚ ናዓና ኢቲፔ ኬሳ ዬዳ» ያጌ።

³¹ሄዋ ዲራው፥ ታናዳን ኣማኒያዋንቶ፥ ኑኒ ጎዳቲ ናና ጊዲያዋፔ ኣቲን፥ ዳንጋፂራቲ ናና ጊዶኮ።