Galatia 4

1

2

3

4

5

6

¹Eau ea ene wasawasa natuna, ena gogo tauabina wa, ia ma merumeruna ia gonogonoana doha heaheari tauna mo. Ia gogo maudoina tanuagana,

²taiede ia tauitawata eo tauheata nimadi eai, i lau e huiana tamana i ribaei.

³Ita hinage doha, ma merumeruda tanoubu kamanidi se auauda.

⁴Na huiana mamohoi i lagema, Eaubada ia Natuna i hetamariama, sine arinai se labasi, laugagaeo boeana eai se labasi,

⁵isi laugagaeo boeana eai se laulau bena i lebohaidi, ita bena i hegigiorieda, i awa‐natueda.

⁶Na paana au hemala ia nanatunayao, arinai Eaubada ia Natuna Earuana i hetamariama nuada eai i eoga i ene, “Aba! Tamagu!”

⁷Arinai abotai oa em awa‐heaheari i lautom, u hemala natuna; ena oa natuna oa hinage Eaubada ena gogo tauabina, Keriso debana eai.

⁸Bagubaguna eai omi Eaubada nige abina au ata, isi nige eaubada mamohoi se tanuagaemiu ede, au heayaiedi;

⁹na huia ta Eaubada abina au atao, ia i nuatuimiu hinage, edohana abo au sinibui ginauri beruberu, ginauri gaibu, aridi eai bena se auauuioimiu?

¹⁰Omi asubenadi eo nawalaidi, huiadi eo borimaidi au heaheasisiedi!

¹¹Ea matausi ata agu paisoa arimiu eai nige aniona.

¹²Egu tataoyao e, ea aibodaimiu bena au hemala doha eau, paana eau hinage doha omi. Omi nige au hebaaeagu;

¹³au nuatui buluma iwalana esau debana eai evanelia ea lauguguiaimiu huia bagubagunana eai.

¹⁴Egu lauita bulumagu eai wa nige au isuewai, eo nige au otaotaegu, na au oiyamigu doha eau Eaubada ena aneru esau, doha Keriso Iesu.

¹⁵Emi nualolo au ribaei wa, haedi ie lau? Ea ribaemiu nei huia ne taba gonoamiu abo matamiu au lamohaidi abo au ledima arigu eai.

¹⁶Na ea hemala ami waiunu wa, paana riba mamohoina ea heribamiu?

¹⁷Isi se ribahetausaemiu, nige bena se helolomiu; bena se tore‐murimuriemiu abo omi au ribahetausaedi.

¹⁸Aipate lolodi huia gamagari ta ene se lolo, nige huiadi eau boeamiu eai mo.

¹⁹Egu merumeru gagirimiu e, arimiu eai ea amamna i lau e Keriso se hetubu boeamiu eai!

²⁰Adeli eau boeamiu eai ina, abo arinagu daguguna i ori, paana nuagu i ponoponoemiu.

²¹Au heribagu, omi wa emi gadosisi bena laugagaeo boeana eai au laulau, laugagaeo au ataiei, e nige’e?

²²Paana se uriyao si ene Aberahama ia nanatunayao labui, esau sine auau natuna, esau sine iaiairihai natuna.

²³Na sine auauna natuna buluma dobilana eai se labasi, sine iaiiairihaina natuna ribahesunuma debana eai.

²⁴Tautau ina; sisine labui ta ede aigora labui. Esau Sinai oea tupina eai i laoma, nanatunayao ma‐auaudi i labalabasidi; ia ede Hagara.

²⁵Hagara doha Sinai oea tupina, Arabia eai; eo doha Ierusalema ina huia ta, ma‐auauna, ma‐nanatunayao.

²⁶Na Ierusalema wa ewana eai, ia ma‐iairihaina, eo ia sinada ede.

²⁷Paana se uriyao, “U kode, oa sine agaagari, eo nige u haihaisu; u torohai, u eoga, oa nige u labalaba wa; paana ia se nuagabaei wa, nanatunayao se gamagari ede, ia wa ma‐monena se miamia nige doha.” (Is. 54.1.)

²⁸Egu tataoyao e, ita doha Isaako, ita ribahesunuma nanatunayao ede.

²⁹Doha nei huia eai ne, ia wa buluma nuatuna eai se labasi, esau wa Earua nuatuna eai se labasi wa i hesohesom, wau ta hinage doha.

³⁰Na uriuri tabuna i ene edoha? “Sine auauna, ma natuna, au aiduiedi; paana sine auauna natuna taba nige enana i abi‐esegai maena sine iairihaina natuna.” (Gen. 21.10-12.)

³¹Arinai egu tataoyao e, ita nige sine auauna nanatunayao, ita sine iairihaina nanatunayao ede.