ጋላቲያ 1

1

2

3

4

5

6

¹ታኒ ጳዉሎሲ፥ ዬሱሲ ኪሪስቶሲኔ ቃሲ ሃይቁዋፔ ኣ ዴንꬄዳ ፆሳይ ኣዉ ኪቴዳዋፔ ኣቲን፥ ኣሳፔ ዎይ ኣሳ ባጋና ኪቴቴዳዋ ጊዲኬ።

²ሃ ታኒኔ ታናና ዴዒያ ኣማኒያ ኢሻቱ ኡባይ፥ ጋላቲያ ጋዲያን ዴዒያ ኣማኒያ ኣሳ ኡባው ሳሮታ ኪቴቶ።

³ፆሳይ ኑ ኣዉኔ ኑ ጎዳይ ዬሱሲ ኪሪስቶሲ ሂንቴንቶ ኣꬎ ኬካቴꬃኔ ሳሮቴꬃ ኢሞ።

⁴ኑ ፆሳ፥ ኑ ኣዉዋ ሼኒያን ኪሪስቶሲ ሃ ኢታ ኦሱ ኦሴቲያ ዎዲያፔ ኑና ኣሻና ማላ፥ ኑ ናጋራ ዲራው፥ ባሬ ሁጲያ ኢሜዳ።

⁵ፆሳው ሜꬊፔ ሜꬊና ጋካናው ቦንቹ ጊዶ። ኣሜንዒ።

⁶ኪሪስቶሳ ኣꬎ ኬካቴꬃን ሂንቴንታ ፄሴዳ ፆሳ ኣጊዴ፥ ሃራ ዎንጋላኮ፥ ሂንቴ ኤሌሊዴ፥ ዎቲ ሲሜዲቴንቶ ታው ኦራꬃባ ጊዴዳ።

⁷ሂንቴንታ ቡልዓኪያዋንቱኔ ኪሪስቶሳ ሚሺራቹዋ ቃላ ጌላያናው ኮዪያ ኣማሬዳ ኣሳቱ ዴዒኖፔ ኣቲን፥ ቱሙፔ ሃራ ሚሺራቹዋ ቃላይ ባዋ።

⁸ሺን ሃራይ ኣቶ ኑና ጊዲና፥ ዎይ ሳሉዋፔ ኪታንቻ ጊዲና፥ ኑኒ ሂንቴንቶ ካሴ ኦዴዳ ሚሺራቹዋ ቃላፔ ዱማቲያዋ ሂንቴንቶ ኦዲያዋ ጊዶፔ፥ ኢ ሜꬊናው ሼቄቴዳዋ ጊዶ።

⁹ካሴ ኑኒ ጌዳዋዳን፥ ሃዒካ ላዔንꬁዋ ታኒ ኦዳይ፤ ሂንቴ ኣኬዳ ሚሺራቹዋ ቃላፔ ዱማቲያዋ ኦኒኔ ሂንቴንቶ ኦዶፔ፥ ሄ ኡራይ ሜꬊናው ሼቄቴዳዋ ጊዶ።

¹⁰ሃዌ ታና ኣሳፔ ሳባ ኮዪያዋ ማላቲሲ? ማላቲሴና! ታኒ ፆሳይ ሎዓ ጊያዋ ኮያይ። ዎይ ታኒ ኣሳ ናሼቻናው ኮያይታ? ታኒ ሃዒካ ኣሳ ናሼቻናው ኮዪያዋ ጊዶፔ፥ ኪሪስቶሳ ኣይሌ ጊዲኬ።

¹¹ታ ኢሻቶ፥ ታኒ ሂንቴንቶ ኦዴዳ ሚሺራቹዋ ቃላይ ኣሳፔ ጊዴናዋ ሂንቴንቶ ኦዳይ።

¹²ኣዪሲ ጎፔ፥ ታው ዬሱሲ ኪሪስቶሲ ቆንጪሴዳፔ ኣቲን፥ ታኒ ሚሺራቹዋ ቃላ ኣሳፔ ኣካቤይኬ፤ ኣሳይ ታና ታማሪሲቤና።

¹³ካሴ ታኒ ኣዪሁዳ ኣማኑዋን ዴዒያ ዎዴ፥ ዋናዴ ዴዓዲታንቶ፥ ሂንቴ ሲሴዲታ፤ ታኒ ኪሪስቶሳ ኣማኒያዋንታ ቃሬታይ ባይናን ዬዴርሳዲኔ ꬋዪሳናው ባፄታዲ።

¹⁴ታ ዎዴ ዴዔዳ ኣሳቱዋፔ ጮራቱዋ ኣዪሁዳ ኣማኑዋ ሂጊያ ናጉዋን ኣꬋይ፤ ኑ ኣዎቱዋ ዎጋ ኦፔኔ ኣꬋዴ ሲቃዲ።

¹⁵ሺን ፆሳይ ባሬ ኣꬎ ኬካቴꬃን፥ ታኒ ቢሮ ታ ዳዪ ኡሉዋን ዴዒሺን፥ ባሬው ኦꬃናው ታና ፄሴዳ፤ ኣባ ኦዲያ ሚሺራቹዋ ቃላ ኣዪሁዳ ጊዴና ኣሳው ታኒ ኦዳና ማላ፥ ፆሳይ ባሬ ናዓ ታው ቆንጪሳናው ኮዬዳ ዎዴ፥ ዞሬታናው ኦኮኔ ባቤይኪ።

¹⁷ዎይ ታፔ ካሴ ዬሱሲ ኪቴዳዋንቱና ጋኬታናው ዬሩሳላሜ ባቤይኪ፤ ሺን ታኒ ኤሌካ ኣራቢያ ጌቴቲያ ጋዲያ ባዲ። ሄዋፔ ዳማስቆ ጊያ ካታማ ሲማዲ።

¹⁸ሄዙ ላይꬃፔ ጉዪያን፥ ጴፂሮሳና ጋኬታናው ዬሩሳላሜ ባዴ፥ ኣናና ታማኔ ኢቼሹ ጋላሳ ኡታዲ።

¹⁹ሺን ዬሱሲ ኪቴዳዋንቱፔ ጎዳ ኢሻ ያዪቆባፔ ኣቲን፥ ሃራቱዋና ጋኬታቤይኪ።

²⁰ታኒ ሂንቴንቶ ፃፊያዋን ዎሪ ባዋ፤ ታኒ ሂንቴንቶ ዎርዱዋ ኦዴናዋ ፆሳይ ማርካ!

²¹ሄዋፔ ጉዪያን፥ ሶሪያ ጌቴቲያ ጋዲያኔ ኪልቂያ ጌቴቲያ ጋዲያ ባዲ።

²²ዪሁዳን ዴዒያ ኪሪስቶሳን ኣማኒያዋንቱ ታናና ኤሬታ ጊዲኪኖ።

²³ሺን ሃራ ኣሳይ፥ «ኑና ዬዴርሲ ዩዪያ ቢታኒ ሃዋፔ ካሴ ኢ ꬋዪሳናው ኮዪያ ኣማኑዋባ ሃዒ ኦዴ» ጊያዋ ኡንቱንቱ

²⁴ሲሲዴ ታባን ፆሳ ጋላቴዲኖ።