1Nagra anage hu'na nehue, nefa fenozama erisantihare ne'mo'ma osi mofavrema mni'nenuno'a, maka'zana agri'za megahianagi, kazokzo eri'za vahekna huno manigahie.
2Hianagi ana mofavremo'a fenozama kegva hu'naza vahe'ene, agri'ma kegva hu'naza vahe'mofo agorga'a mni'nenigeno, nefa'ma fenozama erisanti haregahane hunte'nesia kna efore hugahie.
3Anahukna kante tagranena mofavrema mni'neta, ama mopama kegva hu'naza avamutamimofo zmagorga'a mni'neta kazokzo hu'nonane.
4Hianagi humante'nea kna fatgoma egeno'a, Anumzamo Mofavre'a huntegeno, a'mo ana Mofavre kasentegeno, kasegemofo agorga efore hu'ne.
5Ana hu'negu kasegemofo agorga mni'naza vahera, Agra mizaseranteno tamavresigeta, avreno kri'nea vahekna huta, Agri mofavre manigahune.
6Na'ankure tamagra mofavre'a mani'nageno, Anumzamo Mofavre'amofo Avamu huntegeno, tagu'afi emani'neno tazeri otino, Aba, Nafa'o huno nehie.
7E'ina hu'negu mago'ene kazokzo eri'za vahera tamagra omani'naze. Hianagi Anumzamofo mofavre'a mni'naze. Ana hu'nazagu fenozama'a erisantihare vahe mni'naze.
8Tamagra korapara Anumzana keta antahita osu'neta, amne zanku, anumzantie huta nehazageno, kina reramantegeta anazamofo kazokzo vahe mni'nazane.
9Hianagi menina Anumzamofona keta antahita hazageno, Anumzamo'enena tamagrira tamegeno antahino hu'neanki, nahigeta tamagena hunemita, haviza huno hanave'a omne avamute nehuta, mago'ane kazokzo eri'za vahe'a manisune huta nehazo?
10Tamagra Anumzamo'ma muse huramante kazigati, mago knazupo, ikantero, kafurero, knane knanena makazana huge, osugera nehaze.
11Tamagrikura tusi'za hu'na eri'zana eri'noankino, ana eri'zamo amnezankna huzankura nagra tusiza hu'na kore hue.
12Nafuheta nagrama hu'noankna hutma, tamagra Jiu vahe'mokizmi kasegemofo kinafina omnihogu navenesige'na tamantahinegoe, hanage'na nagranena tamagrikna hanuegu nehue. Tamagra mago hazenkea nagrira huonante'naze.
13Hianagi tamagra antahita keta hu'naze. Navufafina kri me'nege'na, knare musenkea huama hu'na ese knazupa tamasami'noe.
14Nagri krimo'a knaza tamagrira tami'ne, hianagi ana krima eri'noazankura tamagra tamavugosa huonantege, tamagena huonami'naze. Hianagi tamagra nagrira Anumzamofo ankero avreankna huge, Kraisi Jisas avreankna hutma navre'naze.
15Hianagi ana musezantamia iga menina me'ne? Nagra tamage hu'na tamagrikura huama nehue. Tamagra ana knazupa tusiza huta nazahunaku hu'nazankita, tamagrama tamavuma tagatita nazamahugama huneresina, amne anara hazasine.
16Tamage kema neramasamuazamo, tamagri ha' vahera nemanufi?
17Antahiho, e'i ana vahe'mo'za tamagrira masavenke hu'za tavrenaku nehazanagi, tamagrira tamaza hunakura anara nosaze. Zamagra nagriteti tamavazu hu'za zamagrarega antesageta zmaza hnazegu anara nehaze.
18Hianagi nagrama omnisua knafine, maka zupa knare tamavutmava'ma huzanku'ma hanavematisazana, e'i knare zantfa hugahie.
19Mofavre'nimote Anumzamofo mofavre'manita, Kraisimpina nena vahekna hutma maniho. Tamagri'ma tamaza hunaku'ma nehugeno'a a'nemo mofavre kasentenaku ata negriankna nata negrie.
20Hianagi nagra nagesa antahuana tamagrane menina umani'ne'na, fruhuna kea hu'naku nehue. Na'ankure nagra nankna hu'na tamaza hugahue, antahintahinimo'a savri hue.
21Tamagra nasmiho, kasegemofo agorga'a manize nehaze vahe'mota, tamagra kasegemo'ma hu'nea kea ontahinazo?
22Na'ankure anage huno avontafepina krentene, Abrahamuna tare ne' mofavre'a mani'na'e, mago mofavrea kazokzo a'mofo mofavregi, magora kazokzo osu a'mofo ne' mofavre mani'ne. (Jen-Agf 16:15, 21:2)
23Hianagi kato a'mo Hega ne' mofavrema ksente'neana mopafi vahe'mo'za nehazaza huno ksentegeno, Sera'a kazokzo osu a'mo'a Anumzamo huvempa hu'nea ne' mofavre ksente'ne.
24Ama ana a'tremokizni kemo'a Anumzamo'ma Agra'a vahe'enema hagerafino manisaza kemofo erinte'ama hu'ne. Hega'a kazokzo a'mo'a Sainai agonafima Anumzamo'ma hagerafinea kemofo hu avame huno mani'ne. Agri nagapintima fore'ma haza nagamo'za kasegemofona kazokzo naga mani'naze.
25Hega'a Arabia kaziga Sainai agonane, menima me'nea Jerusale rankuma hu avame huno mani'ne. Na'ankure agrane mofavre'aramine kazokzo naga mani'naze.
26Hianagi anagamu monafi me'nea Jerusalea, tagri nerarera kazokzo osu a'mo hu avame huno mani'ne.
27Na'ankure anage huno avontafepina krentene, Muse huo mofavre kase onte a'moka, mofavre antezampi katama nogrimoka, ranke hunka kezatio. Na'ankure mofavrema kase onte a'moka nevema mani'nea ara agaterenka, rama'a mofavre kasentegahane. (Ais 54:1)
28Hagi nenafugata, tamagra Anumzamo Abrahamu huvempa hunte'nea mofavre Aisakinkna hutma mani'naze.
29Hianagi vahe'mo'za mofavrema erifore nehaza kantetima kasema ante'nea mofavremo'a, Avamumofo kantetima fore'ma hu'nea mofavre'a hazenke ami'ne. Meninena anahu avu'avazana me'ne. (Jen-Agf 21:9)
30Hianagi avontafemo'a na'ane huno hu'ne? Kazokzo a'ene mofavre'anena avare atreho hu'ne. Agra mago'azana e'origahianki, kazokzo osu a'mofo ne' mofavremo maka'zana erisinti haregahie huno hu'ne. (Jen-Agf 21:10-12)
31E'ina hu'negu nenafugata, tagra kazokzo a'mofo mofavrea omni'nonanki, kazokzo osu a'mofo mofavre'rami mani'none.
