1Ri̱tay ji̱ta variy, vu̱ñi̱cha nu̱tyu curaca denu, ni̱timyu̱ ne ja̱y didye, sama̱cho̱ nu̱tyu muchechiy, dañuma sa̱cha curaca denu.
2Sama̱cho̱ datyanusi̱ rarunda sa̱ra̱ju̱ varityi sa̱jay jijye̱ ju̱bivaju̱.
3Daryadantyivyu̱y, varityi vu̱vyichanu̱yada nu̱tyu deramiy, datyi̱sa̱miy varidyevyu̱y, nu̱tyu muchechimyi vu̱vyicha variy raju̱, jiryatiy vuryivaayada paru̱cha̱rimyusiy nijya̱mi̱ niquejada rapu̱rya jto̱tadedaju̱ra.
4Variryundamu ji̱ta jiryatiy sabayada Ju̱denu raju̱, su̱pa̱jada ji̱ta variñi̱ jidyenu, vaturu̱myusiy rupi̱. Sarupeda, Muyisésibemyusiy niquejada jto̱tadedaju̱, sa̱tidye ra̱y vuryeyada, jiryatimyu̱ ne vana̱y vuryito̱tanirya niquejada vu̱y, sa̱tidye jmutya̱ Ju̱denu variy nu̱tyu si̱tenu jidyedyeñu varivyu̱y.
6Jiryatiy vu̱ñi̱cha variy sadadyeñu daryaju̱, su̱pa̱jada ji̱tani̱ jidyenu jnutu vu̱jechimyuju̱, vurya̱tidye sa̱ñe̱ya̱ variy sanijyu̱: ¡Ye̱ye̱! ¡Ye̱ye̱dyera!
7Ramutimyu̱ ne muchechimyiñu̱davyu̱y, sadadyeñunuma varidyevyu̱y. Jiryatiy vu̱vyicha sadadyeñu, vurya̱jmutya̱ variy sa̱ntyutya̱damuju̱ra jiberya.
8Ta̱riy, netimyu̱ ne jiryedyetya didyeñi si̱tenu Vuryi̱ndenu didye, jiryivaañu̱yada paru̱cha̱rimyusiy rusa̱ jiryatimyu̱ ne si̱tenu ju̱denumidyeryi.
9Diye ji̱ta variñumatiy jiryedyetyama̱ni̱ si̱tenu Vuryi̱ndenu, ri̱tay samivya̱ju̱, variñumatiy jirye̱cha sajaryetasavay, ¿nu̱tyuramusiña̱ jirya̱numityeryu̱y ju̱na̱y nijya̱mi̱ niquejadamuju̱ntiy, nu̱tyuramusiy? jirya̱tidye jvaay paru̱cha̱rimyusiy risa̱ntiy jiryatimyu̱ ne vana̱y ra̱ra̱y vuryeyada.
10Jiryebe ji̱tara runda, jarimyuni̱, vichtya, vaata jarye ti̱ta̱ju̱, jirye jto̱tadeda variy tara ramu sa̱tidye jnu̱y nta samirya Ju̱denu variy jiryeñe̱cho̱.
11¡Ri̱ntañu̱ ji̱ta jiryeñiya̱re rañuma ma̱cho̱ mitya rivaayada jirye̱ntyutya̱da jiyadaju̱!
12Rayasanta jaryi jirye, ratyeryi̱veda, jirye̱cha nu̱tyu ray jiryatiy rapyaru̱yada riva niquejada jto̱tadeda, Crístumu tuva̱choda jiyasachiy. Rañi̱cha variy nu̱tyu jiryetyi vichanu̱yada Ju̱denu niquejada datyi̱sa̱miy. Ne jiryevyichadeda taji nta varirye.
13Jiryedyetya daryaju̱ nu̱tyu ri̱diva̱jadanube ratyu̱choda munatyara samitu̱choda jiryiva.
14Ne jirye rrachoda varirye, dantyamu̱y ne jirya̱vityeda ri̱diva̱jadamu ray. Jiryeñi diryejada ji̱ta nu̱tyu Ju̱denu jpa̱nu varirye, nu̱tyu nta jiryedyiryeni̱ Jesucrístu.
15¿Tena̱ diyera jiryi̱chana̱tya̱da, te? Ri̱tay ji̱ta vijyo̱mujache jiryenchiy daryaju̱, jiryi̱chana̱tya̱da darya sa̱ra̱ju̱ varirye jiryeñi sa̱ryu̱yadanuma jiñi̱siy varintyirye.
16¿Jiryatiy ri̱tachara si̱tenu jiryiva, jiryedyi variy nu̱tyu jimyityasiy nta riva?
17Rijyiintyeru̱y ji̱ta tavay Crístumu tuva̱chodajisiy jirye, rirye̱tya̱damu, ne samirya jachipiya̱jadamu, jirya̱tidye ra̱tya variy rivantiryi.
18Samirya raryicha varityi rirya̱ra̱tyasara samiryaju̱ jiryiva, ne vinu variy varityi ravyicha jiryisa̱.
19Ri̱tay jiryiva, radyedyeñu, rañuvay daryaju̱ jiryivasiy nu̱tyu ray ntanuma rupachu ju̱na̱y jiryentyi, vadi vicha̱daju̱, rañuvay, jasicha̱ra̱ju̱tiy su̱nde Ju̱denuni̱ Crístu jiryimu.
20Nu̱tyichitya ravyicha̱da jiryisa̱cu̱, nu̱tyichiy, varityi ra̱nique taji nta jiryisa̱ntidye, ne radyetya daryaju̱ nu̱tyu ra̱jachipiya̱ jiryenchiy, nu̱tyu.
21Jirya̱ma̱ tu̱chu riva, jiryatiy jiryevyicharu̱y Muyisésibe niquejada jto̱tanivye, ¿jiryeñi tuva̱chu̱sani̱virya nu̱tyu ranique saniquejada?
22Nu̱chara daryaju̱ ramu day: Varityi danu̱ju̱y denuti̱ savicha̱da Avurá̱, ti̱qui vichanu̱yada samuchechityodaniy detuchi̱, nu̱ntiy vichanu̱yada si̱tenu savaturu̱ñiy detuchi̱. Samuchechityoda denu ji̱ta pi̱ru̱yada vinu jijye̱ va̱ta̱damuju̱, savaturu̱dyenu ji̱ta pi̱ru̱yada Ju̱denu jtedamuju̱ntidye, jiryatiy savichanu̱yada suru̱tyu su̱no̱dáju̱si̱ yajisiy.
24Rani̱ ji̱ta samitu̱choda day, jiryatiy ra̱datyanu tara vu̱y. Daryatiy nanuvicha̱da danu̱ju̱y vaturu̱jyu̱y mityiji denutanu̱jyu̱be, daryaday ravicha daraju̱y niquejadantiy, jiryatiy su̱teda Ju̱denura: taraqui su̱teda Sinayí musimyu, Arábiya mucadimu, rani vuunuru̱ryi rityi rañi jto̱taniryu̱rya. Rani̱ ji̱ta nanubaya̱jada muchechityoda Acáraju̱y jtyatanu̱be, jiryatiy muchechimyijyu̱ nanudetuñu̱yada. Daryadantyi Jerusarí̱ diye, ti̱ta̱ju̱ rumu vichavatya Judíyuveda, rivyicha nu̱tyu muchechimyi, niquejada jiyadaju̱.
26Avurá̱bay vaturu̱y Sáraju̱be baya̱ ratarya Jerusarí̱ nijyu̱, jiryatiy jaryinranuma varidyerya, jiryatiy nu̱tyu vuryi̱no̱da daryaju̱ nada day.
27Darya nu̱charani̱day daryaju̱ra: Ya̱jchana̱y suru̱tyu jiryatimyu̱ ne deti̱ ji, ya̱sa̱ñe̱ya̱ jichana̱yadamu, dañumamu̱y ne jiñuvaday rupachodamu, tapi rirye̱cha jaryivya̱ju̱ rajuuvay jidyedyeñu nadimusiy jiryatiy nanuvicha jivyanusa̱.
28Ratyeryi̱veda, vu̱ñi̱cha nu̱tyu Isácubay, Sáraju̱be denu, jiryatiy sarupeda Ju̱denu jtedamuju̱. Daryaday vu̱ñi̱cha Ju̱denu dadyeñu su̱tedamuju̱ntidye.
29Daryatidye sa̱rupantanu̱yada muchechityodabay denuni̱ Sáraju̱be denu, jiryatiy Ju̱denu Jnutu jtedamuju̱ rupi̱ni̱, daryadantyi diye (Judíyuveda jarupanta riy jiryatiy Ju̱denu jtedamuju̱ rivyicha jidyedyeñu, rityuva̱choda mirya̱damu rirya̱rupantayu.)
30Su̱teda ji̱ta siva Avurá̱bay daryá catera nu̱chara niquejadamu: Ya̱jatya bimuju̱ nada jimyuchechityoda, nanudenuta, tapi ne sa̱jmutya̱ra jiberya jidchavu̱ jivyaturu̱dyenusa̱.
31Ramuni̱, ratyeryi̱veda, vu̱ñi̱cha nu̱tyu Sáraju̱be denu, vurya̱tidye jmutya̱ra vu̱jye̱myu vichasa̱da, ne vu̱ñi̱cha nu̱tyu muchechityoda denu, jatyasi̱.
