1Aw matay se otaw, batà din se tig-apò te kedakel te kedònan aw tanà te amay din. Meneng dalem te deitek pa se batà, iling te allang se pegkesawol din, pengkey sikandin se nenig-apò te kedita.
2Iling te allang se batà sìyan, so dalem te deitek pa sikandin, keilangan tomolò sikandin te otaw tapay pinemallì te amay din làno meg-ipat kandin aw megtonggò te kedònan aw tanà, lamig te aldaw tapay pinemallì te amay te pegbegay kenyan diyà kandin.
3Iling kidon kenyan. Te wedà pa dateng si Cristo, iling kidon te batà deitek. Eked kepakay aw eked tadon toloi se ketanem te kemonaan tadon aw ibeg te otaw dini te keneyonan.
4Meneng pegdateng te aldaw tapay pinemallì te Timanem, insogò din dini te keneyonan se Batà din aw impekeotaw din amon pineokit kandin inangen kidon menge batà te Timanem. Insogò si Jesus doton te menge Judiyo aw ontò timolò te punù ingkeliwat i Moises amon ipelowà din se menge otaw egtolò te punù sìyan.
6Na, so batà kidon den te Timanem, impeogpà te Timanem se Espiritu Santo diyà kenitadon, aw yan mepakay aw Amà se itawal tadon diyà te Timanem,
7so pineokit te keido din, kenà kaw den iling te allang, meneng batà kaw din den. Na, so batà kaw din den, kinewaen niyo heman se kedita te ibegay din diyà te menge batà din.
8Na, kedengan te wedà niyo pa ketegahi se Timanem, neallang kaw te kenà benal timanem egtekingan niyo.
9Meneng songkani, so netegahan niyo den se benal Timanem, aw netegahan kaw din den heman, ikà niyo todà egtaking te ibeg te otaw aw ketanem nekeallang kenyo kedengan.
10Meneng iling te timinàyog kaw den te Timanem tapay pinemenalan niyo pineokit te pegtolò niyo te ketanem tepad te aldaw te peg-etod, aw pista te kelikit te bolan aw kelikit te omay, aw pengkey kano se ibeg niyo peg-inang kenyan. Meneng eked kaw pekelowà lekat te salà pineokit te pegtolò niyo kenyan.
11Ontò a netetana aw wedad ontong te pegtoladà ko kenyo tepad ki Jesu Cristo.
12Menge kedowa ko, seini se ontò ibeg ko kenyo. Peg-ilingi a niyo, so pegpemenal ko ki Cristo, limengà a te pegsalig ko diyà te punù ingkeliwat i Moises aw mig-iling a heman kenyo kenà Judiyo kenà egsalig te punù, sìyan egtoloen te menge Judiyo. Eked ko palos kelibeli se mèpiya ininang niyo kanak kedengan.
13Se tagnà ko pegdoton kenyo kedengan, migtoladà a kenyo te Mèpiya Indan so nesekitan a kidoen.
14Pengkey nelimahan kaw so doen mesakit ko, meneng wedà a niyo lindoi. Mèpiya se pegsagman niyo kanak. Simpana doen anghil te Timanem aw kenà si Jesu Cristo lomaoy kenyo, iling te pegsagman niyo kandan se pegsagman niyo kanak kedengan.
15Netegahan ko te ontò kaw neluba te kidoen a doma kenyo, so ontò se ibeg niyo megtabang kanak pengkey eden. Meneng iling te netodà den se pedowan niyo kanak.
16Aneng-aneng niyo besi, neopal a kenyo te peg-indan ko kenyo te kebenalan.
17Meneng se menge doma otaw migtoladà kenyo, ontò kaw dan inimendayan, meneng eden niyo aw mèpiya se tod dan kenyo, so ibeg dan, megbaet te pegsebad te pedowan tadon, amon olò sikandan se toloen niyo.
18Mèpiya aw doen menge otaw mengimanday kenyo, meneng keilangan mèpiya se tod dan, pengkey wedad a kidoen kenyo.
19Menge batà ko te pegpemenal, ontò a netetana kenyo, so ontò ko ibeg tiboken niyo se pegtaking ki Cristo.
20Ibeg ko kidoen a kenyo amon megpebelaw-belaway kidon, so wedà ko ketegahi aw eden se aneng-aneng niyo.
21Na, sikiyo menge otaw ibeg somalig diyà te punù ingkeliwat i Moises, ontò niyo eneng-enengi aw eden se insolat tepad te punù sìyan.
22Nebasa tadon diyà te kagi te Timanem te doen didowa batà i Abraham. Se sebad, timebaw diyà te allang din si Agar, aw se sebad batà din, timebaw diyà te esawa din si Sara.
23Se batà din timebaw diyà te allang, yan se pigbatà lekat te ibeg te otaw. Meneng se batà din timebaw diyà te kenà allang, yan se impakang te Timanem diyà ki Abraham.
24Na, se in-indan ko seini gina, iling te sebad polingun. Se dowa bayi seini, yan se impolingun te dowa peokit. Se sebad peokit, yan se impolingun ki Agar, so allang sikandin. Yan se pakang lekat te bontod iningedanan Sinay, so yan se pinunuan te Timanem te punù ingkeliwat i Moises. Iling te neallang se kedita te otaw tomaking kenyan.
25Se bontod te Sinay doton te Arabya, yan se iningedanan Agar te menge otaw kidoen. Se pigpolingunan dan te allang seini, yan se menge Judiyo, so allang si Agar sipat menge batà din, aw neallang heman se kedita te Judiyo egtaking te punù ingkeliwat i Moises.
26Meneng kenà allang se esawa i Abraham si Sara, aw yan se egpolingunan te kedita tadon nemenal ki Jesus, so kenà tadon se neallang diyà te punù ingkeliwat i Moises.
27Doen insolat diyà te kagi te Timanem, “Keluba ka sikona lokes, pengkey wedà ka lumun pegbatà. Pegpegais ka tandà te luba nikaw, pengkey wedà ka lumun okit te egtebawan. Pengkey tinenanan ka te esawa no, meneng te modi aldaw, labi pa medita se batà no diyà te menge batà te bayi doen esawa.”
28Na, menge kedowa ko, batà kidon den te Timanem pineokit te pakang din. Iling kidon ki Isaac timebaw diyà ki Sara, so sikandin se batà impakang te Timanem diyà ki Abraham.
29Meneng te aldaw sìyan gebii, se sebad batà piglaman pineokit te Espiritu Santo si Isaac, yan se pinemilang te kedowa din batà piglaman pineokit te ibeg te otaw. Iling kidon te sebad batà impakang, so egpemilangen kidon te menge otaw neallang te punù ingkeliwat i Moises.
30Meneng doen insolat diyà te kagi te Timanem, “Pekeseyowi se allang aw batà din, so wedad palos kedònan ibegay diyà te batà te allang. Tomalag iyan ibegay diyà te batà te kenà allang.”
31Menge kedowa ko, kenà kidon den iling te batà te allang, so keilangan tomolò se allang. Meneng iling kidon den te batà te kenà allang, so mepakay aw eked kidon den tolò te punù ingkeliwat i Moises.
