Galatiya 4

1

2

3

4

5

6

¹Ta gizay yeletida nay laatay izas gidikkoka izi biidi laattana gakkanaas ayllefe dumma gidenna.

²Iza aaway gida wodey gakkanaas izi bana dichchizayta, tamarsizayta kushen gam7ees.

³Nuka kase Ayana yo7os guutha naa mala diza wode hayssa ha alameza woga garsan haaretti de7idos.

⁴Gido attin kase ba qoppi woththida wodey gakkin Xoossay macasappe yeletidi woga naagida ba naaza nuus yeddides.

⁵Hessika nuni iza nayta gidana malanne woga garsan dizayta wozzana mala hanides.

⁶Inte iza nayta gidida gish Xoossa “Abbo” giidi xeygiza ba naaza Ayana nu woznan yeddides.

⁷Hessa gish hayssafe guye ne naappe attin aylle gidakka. Neni naa gidida gish Xoossi nena bayssa laattizade histides.

⁸Inte Xoosse eranappe kase Xoosse gidonta eeqatas aylleta.

⁹Ha7i gidikko Xoosse erideta; qasseka Xoossan erettideta. Histin qasseka guye simmidi gede go7ay baynda coo daaburissiza timirtekko waanidi simmidetii? Simmidi qasseka aylletetha qambaran waaxettana koyetii?

¹⁰Dumma gallassata, aginata, wodetanne laythata inte boncheta.

¹¹Ta intenara daaburidayssi coo mela gidande gaada babbays.

¹²Ta ishato! Ta intena misatida mala inteka tana misatana mala ta intena woossays. Inte tana aykkokka qohibeykketa.

¹³Inte eriza mala ta intes koyro Mishiraachcho qaala sabakiday sako gaasonna.

¹⁴Ta sakoy intes meto gidinka tana saletibeyketa woykko tana harasettibeyketa; gido attin inte tana Xoossa kiitancha malanne hessafeka bollara Yesus Kirstoosa mala mokki ekideta.

¹⁵Histin ha7i he inte ufayssay awa bidee? Intes hanizaz gididakko inte inte ayfe taas kessi immanas guye goontayssa ta intes markatays.

¹⁶Tani tuma intes kessa yootida gish intes morke gidadinashaa?

¹⁷Heyti asati intena bakko ekkanas daaburettes attin lo7os daaburettenna. Isti koyizay intena nuuppe shaakkidi ba as histanasakko!

¹⁸Lo7os mindatethi lo7o; hessikka hananas bessizay ubba wode gidikkofe attin ta intenara diza wode xalla gidoppo.

¹⁹Ta nayto Kirstoosi inte woznan xaafetin ta beyana gakkanaas inte gish ta miixatays.

²⁰Ta inte gish qofan metotadis. Ta dandayizakko ha7i inte giddon bettada intena lo7etha tamarsizako ay mala dosazina!

²¹Inteno! Woga garsan aqana koyizayto ane taas yootite; wogay ay gizakkone siybeykketii?

²²Abrahaames issoy ayllefe issoy qas goqayfe yeletida nam7u nayti dizayssi Geeshsha Maxaafan xaafettides.

²³Ayillefe yeletida naazi asho woga mala yelettides. Hanko goqaype yelettidayssi ufayssa qaala mala yelettides.

²⁴Hayti nam7u macasati nam7u caaqota bessizayta gidida gish hayssi leemisos imettides. Koyro caaqoya siina zuma bolla gidashe aylletethas gidiza nayta yelizaro; izakka Aggaro.

²⁵Hessa gish Aggara Arabe biittan diza siina zuma gish gidada ha7i diza Yerusalame katamayo misatawus; iza ba naytara aylletethan dawus.

²⁶Pude bolla salon diza Yerusalamey gidikko goqa gidada dawus; Izakka nu aayo.

²⁷“Neni yelonta makaraye ufayeta! Hanne miixata erontare! ‘Illili’ ga waassa; azinay dizaarippe azinay bayndari nayti darida” geetetti Geeshsha Maxaafan xaafettides.

²⁸Hessa gish ta ishato! Inteka Yisaaqa mala ufaysa qaala naytakko.

²⁹Asho shene mala yeletidayssi Ayana wolqan yeletidayssa goodides; ha7ikka goodethon dees.

³⁰Gido attin Geeshsha Maxaafay qasse ay gizee? “Aylleyo izi naazara digga; aylle nay goqay naara lattenna” gees.

³¹Hessa gish ta ishato! Nuni goqay nayta attin aylle nayta gidokko.