ጋላቲያ 6

1

2

3

4

5

6

¹ታናዳን ኣማኒያዋንቶ፥ ሂንቴናን ጌሻ ኣያናን ዴዒያዋንቱ ኢቲ ኡራይ ኣይ ባዪዙዋ ኦꬂዴ፥ ቤቶፔካ፥ ኣሺኬቴꬃ ኣያናን ኣ ሱሪሲቴ፤ ቃሲ ሂንቴ ፓጬቴና ማላ፥ ሂንቴ ሁጲያ ናጊቴ።

²ኢቱ ኢቱዋ ቶኩዋ ቶኪቴ፤ ሄዋ ኦꬂያዋን ኪሪስቶሳ ሂጌው ኣዛዜቲታ።

³ኣዪሲ ጎፔ፥ ኢቲ ኡራይ ኣይኔ ሃኔናን ዴዒዴ፥ ኢቲባ ኢ ሃኔዳዋ ኣው ማላቶፔ፥ ባሬ ሁጲያ ጪሜ።

⁴ሺን ኣሳይ ኡባይ ሁጲያን ሁጲያን ባሬ ኦሱዋ ፓጮ፤ ሄዋፔ ጉዪያን፥ ሃራ ኣሳዋና ሊኬናን፥ ባሬ ሁጴ ኦሱዋ ፃላላን ኣማኔቲያዋ ዴማና።

⁵ኣዪሲ ጎፔ፥ ኣሳይ ኡባይ ሁጲያን ሁጲያን ባሬፔ ናጌቲያዋ ኦꬃና ቤሴ።

⁶ሺን ፆሳ ቃላ ታማሪያዌ ባሬው ዴዒያ ሎዖባ ኡባ ባሬና ታማሪሲያዋና ሻኮ።

⁷ሂንቴንታ ሂንቴሬካ ጪሞፒቴ። ኦኒኔ ፆሳ ቦላ ቂሊጫናው ዳንዳዬና፤ ኣዪሲ ጎፔ፥ ኣሳይ ባሬ ዜሪያዋ ዛሬꬂዴ ቆይጫና።

⁸ባሬ ኣሹዋ ኣሙዋን ዜሪያዋ ጊዶፔ፥ ኣሹዋ ኣሙዋፔ ሃይቁዋ ቆይጫና። ሺን ፆሳ ኣያናን ዜሪያዋ ጊዶፔ፥ ፆሳ ኣያናፔ ሜꬊና ዴዑዋ ቆይጫና።

⁹ኣኔ ሎዖ ኦሱዋ ኦꬃናው ሚኖይቴ። ኣዪሲ ጎፔ፥ ኑኒ ሚኒ ኦꬆፔ፥ ቆይጪያ ዎዲ ሲንꬃፔ ያናዋ።

¹⁰ሄዋ ጊዶፔ ሃ ኦꬃናው ኑኒ ዳንዳዪያዋን፥ ኣሳ ኡባው ሎዖባ ኦꬆይቴ፤ ሺን ኡባፔ ኣꬂዴ፥ ኑናና ኣማኑዋን ዴዒያዋንቶ ሎዖባ ኦꬆይቴ።

¹¹ታኒ ታ ኩሺያን፥ ኣይ ማላ ዎልቃማ ፒዶላቱዋን፥ ሃዋ ሂንቴንቶ ፃፋዲታንቶ ቤዒቴ።

¹²ኣሳ ሲንꬃን ሎዒዴ ቤታናው ኮዪያ ኡባቱ፥ ሂንቴ ቃፃሬታና ማላ ኮዪኖ፤ ሺን ሄዋ ኡንቱንቱ ኦꬂያዌ ባሬንቶ ኪሪስቶሳ ማስቃሊያ ዲራው ዬዴርሴቴናን ኣታና ፃላላሳ።

¹³ኣዪሲ ጎፔ፥ ኡንቱንቱ ሂንቴ ቃፃሬቴዳዋን ጬቄታናው ሂንቴንታ ቃፃሬቲኖ ጊኖፔ ኣቲን፥ ሃራይ ኣቶ ቃፃሬቴዳዋንቱካ ባሬንቱ ሁጴው ሙሴ ሂጊያ ናጊኪኖ።

¹⁴ሺን ኣላሚ ታው ካቄቲና፥ ታኒካ ኣላሜው ካቄቴዳ ዬሱሲ ኪሪስቶሳ ማስቃሊያፔ ኣቲን፥ ታኒ ጬቄቲያባይ ሃራባይ ታፔ ሃኮ።

¹⁵ኣዪሲ ጎፔ፥ ኪሪስቶሲ ዬሱሳን ኦራꬃ ሜꬌታ ጊዲያዌ ማዴፔ ኣቲን፥ ቃፃሬቲናካ ቃፃሬቴናን ኣጊናካ ኣይኔ ማዴና።

¹⁶ሃ ዎጋን ሃሜቲያ ኡባቱዋ ቦላኒኔ ፆሳ ኣሳ ኡባ ቦላ፥ ሳሮቴꬃይኔ ማሮቴꬃይ ጊዶ።

¹⁷ታኒ ዬሱሳው ማይቴድ ማላ ታ ቦላን ቶኬዳ ዲራው፥ ሃዋፔ ሲንꬃው ኢቲ ኣሳይካ ታና ሜቶꬆፖ።

¹⁸ታናዳን ኣማኒያዋንቶ፥ ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ጊዶ። ኣሜንዒ።