ጋላቲያ 2

1

2

3

4

5

6

¹ሄዋፔ ሲማዴ ታኒ ታማኔ ኦይዱ ላይꬃፔ ጉዪያን፥ ባሪናባሳና ላዔንꬁዋ ዬሩሳላሜ ባዴ፥ ቲታካ ታናና ኣካዴ ባዲ።

²ፆሳይ ታው ሳፃን ቆንጪሴዳ ዲራው ባዴ ታኒ ሃዒ ኦꬂያ ኦሱ ዎይ ካሴ ኦꬄዳዌ ሜላ ኣቴና ማላ፥ ኪሪስቶሳን ኣማኒያዋንታ ካሌꬂያዋንታ ዱማ ሺሻዴ፥ ኣዪሁዳ ጊዴና ኣሳው ታኒ ኦዲያ ሚሺራቹዋ ቃላይ ኣይ ማሌንቶ ኡንቱንቶ ኦዳዲ።

³ሺን ሃራይ ኣቶ ታናና ዴዒያ ቲታ ኢ ጊሪኬ ጋዲያ ኣሳ ጊዲሺን፥ ቃፃሬቶ ጊዴ ጎዴቲቤይኪኖ።

⁴ጊዶፔኔካ፥ ዎርዱዋን ኑሲ ኢሻቱዋ ማላቲ ዪዴ፥ ኑናና ዋላኬቴዳ ጮራ ኣሳቱ ኣ ቃፃራናው ኮዬዲኖ። ሄ ኣሳቱ ኪሪስቶሳ ዬሱሳን ኑሲ ዴዒያ ኑኒ ኮዬዳዋዳን ሃናና ዳንዳዪያ ላዓቴꬃ ዎቺዴ ꬊሻናው፥ ዉዔቲዴ ኑ ጊዶ ጌሊዴ ኑና ኣይሌ ኦꬃናው ኮዬዲኖ።

⁵ሺን ሚሺራቹዋ ቃላ ቱማቴꬃይ ሂንቴንቱና ሚኒ ዴዓና ማላ፥ ኑኒ ሃራይ ኣቶ ጉꬃ ዎዲያካ ኡንቱንቶ ሞዴቲቤይኮ።

⁶ሺን ካፓቱዋ ማላቲያዋንቱ ታው ኣይኔ ኦራꬃ ቆፋ ኢሚቤይኪኖ፤ ሃዋ ኣዪሲ ጋይታ ጎፔ፥ ሃዋፔ ካሴ ኡንቱንቱ ኦና ጊዲናካ ታና ሜቲያባ ጊዴና፤ ፆሳይ ኣሳ ሶምዒያ ፄሊዴ ፒርዴና።

⁷ሺን ጉዬፔ ፆሳይ ጴፂሮሳው፥ ኣዪሁዳቶ ሚሺራቹዋ ቃላ ኦዲያ ሃዳራ ኢሜዳዋዳን፥ ታዉካ ኣዪሁዳ ጊዴና ኣሳው ሚሺራቹዋ ቃላ ኦዲያ ሃዳራ ኢሜዳዋ ኡንቱንቱ ቤዔዲኖ።

⁸ኣዪሲ ጎፔ፥ ጴፂሮሲ ኣዪሁዳቶ ዬሱሲ ኪቴዳዋ ጊዴዳዋዳን፥ ታኒካ ፆሳ ዎልቃን ኣዪሁዳ ጊዴና ኣሳው ዬሱሲ ኪቴዳዋ ጊዳዲ።

⁹ቃሲ ካሌꬂያዋንታ ማላቲዴ ቤቲያዋንቱ፥ ያዪቆቢ፥ ጴፂሮሲኔ ዮሃኒሲ፥ ታው ኢሜቴዳ ኣꬎ ኬካቴꬃ ኤሪዴ፥ ታናኔ ባርናባሳ ኑ ኩሺያ ኦይቂዴ ሳሮቴዲኖ። ታኒኔ ባርናባሲ ኣዪሁዳ ጊዴና ኣሳ ጊዶን ኦꬃናዳን፥ ቃሲ ኡንቱንቱ ኣዪሁዳቱዋ ጊዶን ኦꬃናዳን ቃቺዴ ዴንዴዶ።

¹⁰ኡንቱንቱ ኑና ካሴፔካ ታኒ ኦꬃናው ቆፓዴ ዴዒያ ሂዬሳቱዋ ማዳናዋ ፃላላ ቆፊሴዲኖ።

¹¹ሺን ጴፂሮሲ ኣንፆኪያ ጊያ ካታማ ዬዳ ዎዴ፥ ኢ ባዪዜዳ ዲራው፥ ቆንጪያን ታኒ ኣ፥ «ኔኒ ባዪዛንቻ» ያጋዲ።

¹²ኣዪሲ ጎፔ፥ ያዪቆባ ማታፔ ኪቴቴዳ ኣማሬዳ ኣሳይ ያናፔ ካሴ ኣዪሁዳ ጊዴና ኣሳቱዋና ቁማ ሜ፤ ሺን ኡንቱንቱ ዬዳዋፔ ጉዪያን፥ ኣዪሁዳ ጊዴናዋንቱ ኣማኒያዋንታ ጊዳናው ቃፃሬታናው ኮሼ ጊያዋንቶ ያዬዳ ዲራው፥ ሚያዋ ኤሲዴ፥ ኣዪሁዳ ጊዴናዋንቱፔ ሻኬቴዳ።

¹³ቃሲ ዮኮ ኣማኔዳ ኣዪሁዳቱ ጴፂሮሳና ያሻ ዶሜዲኖ፤ ሃራይ ኣቶ ባርናባሲካ ኡንቱንቱና ያሻንቻ ጊዴዳ።

¹⁴ሺን ኡንቱንቱ ሚሺራቹዋ ቃላ ቱማቴꬃዳን፥ ሱሬ ሃሜቴናዋ ቤዓዴ፥ ጴፂሮሳ ሄ ኡባ ኣሳ ሲንꬃን፥ «ኔኒ ፆሳ ኣሳ ኣዪሁዳ ጊዳዴ፥ ኡንቱንቱዳን ጊዴናን ፆሳ ኣሳ ጊዴና ኣዪሁዳ ጊዴናዋንቱዳን ዴዓ፤ ሺን ያቲና፥ ዎታዴ ኣዪሁዳ ጊዴናዋንታ፥ ‹ኣዪሁዳቱዋዳን ዴዒቴ› ጋዴ ጊዳይ?» ያጋዲ።

¹⁵ኑኒ ዬሌታን ኣዪሁዳ፤ «ናጋራንቻ ጊዴዳ ኣዪሁዳ ጊዴና ኣሳቱዋ» ጊዶኮ።

¹⁶ሄዋ ጊዶፔካ፥ ኣሳይ ዬሱሲ ኪሪስቶሳ ኣማኒዴ ፆሳ ሲንꬃን ፂላናፔ ኣቲን፥ ሙሴ ሂጊያ ናጉዋን ፂሌናዋ ኤሬዶ፤ ኣሹዋ ማዬዳ ኣሳይ ኡባይ ሙሴ ሂጊያ ናጉዋን ፂሌና ዲራው፥ ኑኒ ኑ ሁጴዉካ ሙሴ ሂጊያ ናጉዋን ጊዴናን፥ ኪሪስቶሳን ኣማኒዴ ፂላና ማላ፥ ኪሪስቶሲ ዬሱሳን ኣማኔዶ።

¹⁷ሺን ኑሲ ኪሪስቶሳን ዴዒያ ኢቲፔቴꬃን ፂላናው ኮዪያዋንታ ጊዲዴ፥ ኑ ሁጴው ናጋራንቻ ጊዲዴ ቤቶፔ፥ ያቲና ኪሪስቶሲ ናጋራ ታማሪሲያዌ? ሄዌ ሙሌካ ዎርዶ!

¹⁸ኣዪሲ ጎፔ፥ ኢቲ ካላካ ኣጋ ዲጌዳዋ ታኒ ላዔꬁዋ ኦꬂያዋ ጊዶፔ፥ ታኒ ታ ሁጴው ሂጊያ ሜንꬂያዋ ጊዲያዋ ኤሪሳይ።

¹⁹ታኒ ፆሳው ፓፃ ዴዓና ማላ፥ ሂጊያ ባጋና ሂጌው ሃይቃዲ።

²⁰ታኒ ኪሪስቶሳና ኣ ማስቃሊያ ቦላ ሚሲማሪያን ꬊሼታዴ ካቄታዲ፤ ሲሚ፥ ሃዒ ፓፃ ዴዒያዌ ታና ጊዲኬ። ሺን ኪሪስቶሲ ታ ጊዶን ዴዔ፤ ታኒ ሃዒ ዴዒያ ዴዑ፥ ታና ሲቂዴ፥ ታ ዲራው፥ ባሬ ሁጲያ ኢሜዳ ፆሳ ናዓን ዴዒያ ኣማኑዋና።

²¹ታኒ ፆሳ ኣꬎ ኬካቴꬃ ኢፂኬ፤ ኣሳይ ሂጊያ ባጋና ፂሎቴꬃ ዴሚያዋ ጊዶፔ፥ ኪሪስቶሲ ጮ ሜላ ሃይቄዳ ጉሳ።