Kɑdɑsii 4

1

2

3

4

5

6

¹Ntɛnɛ̀ n wɛ̃̀tɛ kɛ dɔ́ kɛ́yíɛ́ tì: Dɛbirɛ dɛ̀ɛ̀ yóó tiekɛ dɛ cicɛ kpɛrɛ dɛ̀ kpɑɑ́ kɛ bɛ dìì mɔ̀nnì dɛ̀ ɔ̃ɔ̃ í ncɑ̃́ɑ̃́nnɛ̀ kudɑɑkù, bɑ́ dɛ̀ mɛ ntúmɛ̀ dɛ̀ɛ̀ yóó tiekɛ dɛmɔu.

²Dɛ̀ ɔ̃ mbúɔ́ bɛ̀ɛ̀ dɛ̀ cɛ̃mmú bɛ̀mbɛ nɛ̀ bɛ̀ɛ̀ dɛ̀ piú, kɛ bɑɑ dɛ cicɛ dɔú ndìì mɔ̀nnì bo tuɔkɛmɛ̀.

³Tínti múnkɛ Kirisi mu ndo í kɔ̀tɛní dìì mɔ̀nnì yɛbɔkɛ̀ nɛ̀ ikuɔ́ kɛ̀ dɛ̀ɛ ti te.

⁴Kɛ̀ dɛ mɔ̀nnì tùɔ̀kɛ kɛ̀ Kuyie nduɔnní ku Birɛ, kɛ̀ bɛ̀ɛ dɛ̀ pɛitɛ́ Sifubɛ kó kubotí miɛkɛ, kɛ̀ dɛɛ̀ nte kòo ntũ mbɛ kó ikuɔ́.

⁵Kɛ bo dɛɛtɛ́ tínti ikuɔ́ te bɛ̀, kɛ̀ ti nɑɑ́ nKuyie nkó ibí.

⁶Kɛ̀ kù ti duɔ́ nku Birɛ kó Muyɑɑ́ mmùù te kɛ̀ ti kù yu kɛ tú ti cicɛ.

⁷Ti tɛ̃́nkɛ í tú tidɑɑtì, ti tú Kuyie mbí nyi, kɛ̀ kù yóó ti duɔ́ nkù yɛ̃ nkù yóó duɔ́ ndɛ̀ bɛ̀ɛ̀ tu ku bí.

⁸Di mu ndo í yɛ̃́ dìì mɔ̀nnì Kuyie nkɛ tú yɛbɔkɛ̀ kó tidɑɑtì nti, kɛ yɛ̀ tú Kuyie yɛ̀ mɛ nyí kù tú.

⁹Bɑ̀mbɑ̀ nkɛ yĩ̀ɛ̃́tɛ́ Kuyie! Kuyie nkuù pètìnkɛ di yĩ̀ɛ̃́tɛ́, kɛ̀ m bɑ́ɑ́ yĩ́ díì kù yĩ̀ɛ̃́tɛ́, dɛ̀ dòmmɛ kɛ̀ di wɛ̃̀tɛ kɛ dɔ́ kɛ́yóu kɛ̀ yɛbɔkɛ̀ di tiekɛ?

¹⁰Di yɛ̀mmɛ̀ dò nKuyie mbo di cɔutɛ́ di yɛ̃́ mɛ̀ɛ̀ kpɛ́í nyɛwe nɛ̀ bɛtɑ̃̀ɑ̃̀bɛ̀ nɛ̀ yɛmɔ̀rɛ̀ nɛ̀ yɛbie ndɛ̀ɛ̀ pɛ̃ɛ̃tɛ́ dɛtɛrɛ̀ kɛ dɛ̀ bɑ̀ɑ̀tɑ̀ɑ̀?

¹¹N yĩɛ̃̀kùmu m pĩ mmùù tɔ̃mmú di cuokɛ̀ bo ntúmɛ̀ dɛtetìrɛ̀.

¹²N kɔbɛ n di bɑ́ɑ́mmu, ɑ̃nnɛ́nɛ̀ dimɑ́ɑ̀ n kó difɔ̃̀tìrì kɛ́ndònnɛ̀ nh ɑ̃nnɛ́mɛ̀ m mɑ́ɑ̀ di kó difɔ̃̀tìrì.

¹³Di í n dɔ̀ɔ̀ mɛyɛi mmɑmɛ̀. Di kpɑɑ́ yɛ̃́mu n do mɔmmɛ̀mu kɛ bɑ́tɛ́ di ciɛ mɛketimɛ̀ kɛ di nɑ̀kɛ́ Tinɑ́ɑǹsɑ̀ɑ̀tì Yesu Kirisi kpɛti.

¹⁴Di nɑ nnɑmu kɛ n senkɛ̀rì yoo di m bɛtì n tú mɛ̀ɛ̀ kpɛ́í omuɔnti, kɛ̀ di nɛ́ pètìnkɛ n cɔutɛ́ kɛ́ndò n tú Kuyie ntɔ̃nnì, kɛ n cɔutɛ́ di nɑ ncɔutɛ́ mɛ̀ɛ̀ botí Kirisi.

¹⁵Di do mɔkɛ dìì wɛ̀ì kɔ̀tɛ kɛ? Kɛ̀ di do bo nɑ dɛ mɔ̀nnì kɛ́dɛitɛ di nuɔ nkɛ́ n duɔ́, di nɑ nyì dɛ̀itɛmu.

¹⁶N di nɑ̀kɛ́ mɛ̀ɛ̀ kpɛ́í ntimɔ́mmɔnti dɛɛ̀ te kɛ̀ n nɑɑ́ ndi kpɑntídɛ̀ntɔùɑ̀?

¹⁷Dɛ kó bɛnìtìbɛ̀ dɔ̀ɔ̀ri kɛ dò mbɛ̀ di dɔ́mu kɛ̀ nɛ́ wɑnti tìì cɑ̃́ɑ̃́, kɛ bo di yṹɔ̃́ mbɛ bíɛ́kɛ̀ kɛ̀ di mbɛ̀ mbùɔ́.

¹⁸Dɛ̀ wennimu di bo nkémmúmɛ̀ bɛ̀ di nɑ́ɑ́ ntì, kɛ nɛ́ mbɑɑ̀tì tìì tú tisɑ̀ɑ̀tì, dɛ̀ bɑ́ ntú n di bonɛ̀ dìì mɔ̀nnì mɑ́ɑ̀ bɑ́ kɛ̀ n kpɑ.

¹⁹M bí dɛ̀ n yóù mɛdiɛ̀ mmɛ di kpɛ́í nkɛ dò nhonitipòkù ɔ̃ mpɛímɛ̀, kɛ bɑɑnɛ̀ m bo bɑntɛ́mɛ̀ weti weti kɛ dò nKirisi bo di miɛkɛ.

²⁰N dɔ́ n nɑ mbo di borɛ̀ ndɛ bɑ̀mbɑ̀ mmiɛ, nkɛ́yɑ̀ m bo di nɑ́kɛ́ mɛ̀ɛ̀ botí kɛ̀ di keè, n yĩɛ̃̀kùmu mɛsɑ̀ɑ̀ ndi kpɛ́í.

²¹Di tũ nnɛ́ n nɑ́kɛ́ díndi bɛ̀ɛ̀ dɔ́ kɛ́ntũ nyikuɔ́ kɛ̀ nsɑ̀ kɛ̀ di í yo ì tú mù.

²²Ti wɑ̃̀rimu kɛ tú Abɑrɑhɑmmu do mɔkɛ ibí ìdɛ́ì ndi, kɛ̀ dɛ̀mɑrɛ̀ kóo yɔ̃ Akɑɑ ntú kudɑɑkù , kɛ̀ dɛtɛrɛ̀ kóo yɔ̃ Sɑrɑɑ í nku tú.

²³Kɛ̀ kudɑɑkùu pɛitɛ́ ku kpɛrɛ bɛtɔbɛ̀ pɛí mɛ̀ɛ̀ botí, wèè í tú kudɑɑkù kɛ̀ Kuyie nkuù ò dɔúnnɛ̀ dinùù kòo dɛ̀ pɛitɛ́.

²⁴Dɛ kó tinɑ́ɑǹtì mɔ̀kɛ mɛbɛnkùmɛ̀ mɛ̀dɛ́mɛ̀ mmɛ. Bɛnitipòbɛ̀ bɛdɛ́ bɛmbɛ dònnɛ̀ mɛtɑummɛ̀ mɛ̀dɛ́mɛ̀ mmɛ, mɛtɑummɛ̀ kètimɛ̀ do dɔ̀ɔ̀ Sinɑii tɑ̃rì ĩ́nkɛ̀ nkɛ mɛɛ̀ pɛitɛ́ idɑɑbí (mɛɛ̀ tú Akɑɑ).

²⁵Diyètìrì dìì tú Akɑɑ dì bɛnkú Sinɑii tɑ̃rì ndi dìì bo Adɑbii tenkɛ̀, kɛ wɛ̃̀tɛ kɛ bɛnkú Sedisɑdɛmmu ɛì dìì bo di mmɔ̀nnì.

²⁶Sedisɑdɛmmu kɛĩ́nkɛ̀ kou í tú kudɑɑkù, weè tu ti yɔ̃.

²⁷Ti wɑ̃̀rimu kɛ tú: Dɛ̀ nnɑɑti fɔ̃́ ntɛhɑ̃ũntɛ, fɔ̃́ nwèè í pɛí, tiitɛ́ tɛyíìtɛ̀ kɛ́nyɑ̃nku nɛ̀ diwɛ̀ì, kɛ yɛ̃́ bɛ̀ yetɛ wèè nitipòkù kó ibí yó nsṹṹnnɛ̀mɛ̀ wèè ye nho kpɛyi.

²⁸N kɔbɛ díndi tú Kuyie nkó ibí nyi, kɛ́ndònnɛ̀ Isɑki Kuyie ndo dɔú ndinùù kɛ̀ bɛ̀ pɛitɛ́ wè.

²⁹Bɛ̀ do pɛitɛ́ dɛ̀ɛ̀ birɛ bɛnìtìbɛ̀ pɛímɛ̀ do fɛ̃́ũnkomu bɛ̀ pɛitɛ́ dɛ̀ nɛ̀ Kuyie nYɑɑ́, ti kpɛrɛ mɛ ndò mmúnkɛ.

³⁰Tì wɑ̃̀rimu kɛ tú: Bɛti kudɑɑkù nɛ̀ ku birɛ kɛ yɛ̃́ kudɑɑkù birɛ í yóó totɛ́nɛ̀ wèè í tú kudɑɑkù o birɛ dɛ cicɛ kpɛrɛ.

³¹N kɔbɛ ti í tú kudɑɑkù kó ibí, ti tú wèè í tú kudɑɑkù o kpɛyi nyi.