ጋላቲያ 3

1

2

3

4

5

6

¹ኣኬካይ ባይና ጋላቲያ ኣሳቶ፥ ታኒ ሂንቴና ኪሪስቶሲ ማስቃሊያ ቦላን ሚሲማሪያን ꬊሼቲዴ ካቄቴዳዋ ቆንጪሳዴ ታማሪሳዲ። ያቲና፥ ቱሞ ሂንቴ ኤኖ ጌና ማላ፥ ሂንቴንታ ቢቴዳዌ ኦኔ?

²ኣኔ ታው ሃ ኢቲ ዬዉዋ ፃላላ ኦዲቴ፡ ፆሳ ኣያና፥ ሂጊ ጊያዋ ናጊዴ ኣኬዲቴ ዎይ ኣማኑዋን ሲሲዴ ኣኬዲቴ?

³ሂንቴንቱ ሄዋ ኬና ኤዬ? ፆሳ ኣያናን ዴዑዋ ዶሚዴ፥ ሃዒ ሂንቴ ዎልቃን ፖሊቴ?

⁴ሂንቴንቱ ዳቡራ ኡባው ኣይኔ ማዱ ባዌ? ቱማ ማዱ ዴዔ።

⁵ያቲና፥ ፆሳይ ሂንቴንቶ ጌሻ ኣያና ኢሚያዌኔ ሂንቴ ጊዶን ማላታ ኦꬂያዌ፥ ሙሴ ሂጊያ ሂንቴ ኦꬄዳ ዲራሴ? ዎይ ሚሺራቹዋ ቃላ ሲሲዴ፥ ሂንቴ ኣማኔዳ ዲራሴ?

⁶ሃዋዳንካ፥ ኣብራሃሞ ፆሳ ኣማኔዳ ዲራው፥ ፆሳይ ኣ ፂሉዋዳን ፄሌዳ።

⁷ሄዋ ዲራው፥ ኣማኒያዋንቱ ኣብራሃሜ ዛሬ ጊዲያዋ ኤሪቴ።

⁸ፆሳይ ኣዪሁዳ ጊዴና ኣሳ ኣማኑዋን ፂሊሳናዋ ፆሳ ማፃፋይ ካሴት ቤዒዴ፥ «ሃ ኣላሚያን ዴዒያ ኣሳይ ኡባይ ኔናን ኣንጄታና» ያጊዴ፥ ሚሺራቹዋ ቃላ ኣብራሃሞሲ ካሴቲዴ ኦዴዳ።

⁹ሄዋ ዲራው፥ ኣብራሃሞ ኣማኒዴ ኣንጄቴዳዋዳን፥ ኣማኒያዋንቱ ኣዋዳካ ኣንጄታና።

¹⁰ሂጊያ ኦሱዋን ኣማኔቲዴ ዴዒያዋንቱ ኡባይ ሼቃ ጊዶን ዴዒኖ፤ ኣዪሲ ጎፔ፥ ፆሳ ማፃፋይ፥ «ሂጊያ ማፃፋን ፃፌቴዳ ኡባባኒ ዴዔናዌኔ ፖሌናዌ ኦኒኔ ሼቄቴዳዋ» ያጌ።

¹¹ፆሳ ማፃፋይ፥ «ፆሳ ሲንꬃን ፂላቱ ኣኒ ኣማኔቲዴ ዴዑዋን ዴዓና» ጊያ ዲራው፥ ኦኒኔ ፆሳ ሲንꬃን ሂጊያ ናጊያዋን ፂሌናዌ ኤሬቴዳዋ።

¹²ሂጊ ኣማኑዋን ባሴቲ ኤቂ ቤና፤ ሺን ፆሳ ማፃፋይ፥ «ሂጊ ጊያዋ ፖሊያዌ ኣኒ ዴዑዋን ዴዓና» ያጌ።

¹³ፆሳ ማፃፋን፥ «ሚꬃ ቦላ ካቄቲ ሃይቂያ ኦኒኔ ሼቄቴዳዋ» ጌቴቲ ፃፌቴዳ ዲራው፥ ኪሪስቶሲ ኑ ዲራው ሼቄቴዳዋ ጊዲዴ፥ ኑና ሂጊያ ሼቃፔ ዎዚ ኣኬዳ።

¹⁴ኪሪስቶሲ ሄዋ ኣዪሲ ኦꬄዴ ጎፔ፥ ፆሳይ ኢማና ጌዳ፥ ጌሻ ኣያና ኑኒ ኣማኑዋን ኣካናዳኒኔ ኣብራሃሜ ኣንጁ ባሬ ባጋና ኣዪሁዳ ጊዴና ኣሳ ጋካና ማላ ጊዴ ኦꬄዳ።

¹⁵ታናዳን ኣማኒያዋንቶ፥ ታኒ ኣሳይ ጊያዋዳን ሂንቴንቶ ጋይ፤ ሃራይ ኣቶ ላዑ ኣሳቱ ኢቲ ዬዉዋ ሃሳዪዴ፥ ጫቁዋ ዎꬄዳዋፔ ሂኒ ባጋን፥ ኦኒኔ ሄ ጫቁዋ ቢላናው ዎይ ሃራባ ሄ ጫቁዋ ቦላ ጉጃናው ዳንዳዬና።

¹⁶ኣብራሃሞኔ ኣ ዛሪ ፆሳይ ሲንꬃፔ ኢማና ጊዴ ሃሳዬዳዋ ሲሴዲኖ። ፆሳ ማፃፋይ ጮራ ኣሳው ሃሳዪያዋዳን፥ «ኔ ዜሬꬃቱዋሲ» ጌና፤ ዋጊ ጎፔ፥ «ኔ ዛሬው» ያጌ። ሄዌኔ፥ ኢቲ ኣሳ ፃላላ ጌ፤ ኢካ ኪሪስቶሳ።

¹⁷ታኒ ጊያዌ ሃዋ፤ ፆሳይ ኣብራሃሞሲ ጫቂዴ፥ ሃ ጫቁዋ ታኒ ናጋና ያጌዳ። ኦይዱ ፄታኔ ሃታሙ ላይꬃፔ ጉዪያን ዬዳ ሙሴ ሂጊ ፆሳይ ዎꬄዳ ሃ ጫቁዋ ꬋዪሳናዉኔ ሲንꬃፔ ኢማና ጊዴ ሃሳዬዳዋ ዲጋናው ዳንዳዬና።

¹⁸ኣዪሲ ጎፔ፥ ፆሳይ ኢሚያ ላታይ ሂጊያን ቤቲያዋ ጊዶፔ፥ ያቲና ፆሳይ ሲንꬃፔ ኢማና ጊዴ፥ ቃላ ጌሌዳዋና ጊዴና ጊያዋ፤ ሺን ፆሳይ ኢማና ጊዴ ቃላ ጌሌዳዋን ላታ ኣብራሃሞሲ ኢሜዳ።

¹⁹ያቲና፥ ሂጊ ኣዪሲ ዴዒ? ሂጊ ባዪዞ ኦሱዋ ጊዲያባይ ኣዬንቶ ቤሳናው ፆሳይ ኢማና ጊዴ ሃሳዬዳ ኣብራሃሜ ዛሪ ያና ጋካናው ጉጄቴዳ፤ ኪታንቻ ባጋና ሙሴ ጋናቲያዋን ኢሜቴዳ።

²⁰ጋናይ ኢቲ ኡራ ፃላላሳ ጊዴና፤ ሺን ፆሳይ ኢቱዋ።

²¹ያቲና፥ ፆሳይ ሲንꬃፔ ኢማና ጊዴ ሃሳዬዳዋ፥ ኢቲ ሂጊ፥ «ሃኔና» ያጊ? ኣዓ! ሄዋ ጌና። ኣዪሲ ጎፔ፥ ሂጊ ኣሳው ዴዑዋ ኢማናው ዳንዳዪያባ ጊዶፔ፥ ፂሎቴꬃይካ ቱሙ ሂጊያ ኣዛዜቲያዋፔ ቤቴ ጊያዋ።

²²ሺን ዬሱሲ ኪሪስቶሳ ኣማኒና፥ ፆሳይ ሲንꬃፔ ኢማና ጊዴ ቃላ ጌሌዳ ላዓቴꬃይ፥ ኣማኒያዋንቶ ኢሜታና ማላ፥ ኣሳይ ኡባይ ናጋራሲ ሞዴቲዴ ዴዒያዋ፥ ፆሳ ማፃፋይ ኦዴ።

²³ሺን ካሴ ሃ ኣማኑ ያናሲ፥ ሲንꬃፔ ቆንጫና ኣማኖ ሂጊ ኑና ቃሼቴዳ ኣሳዳን ጎርዲ ዎꬄዳ።

²⁴ሄዋ ዲራው፥ ኑኒ ኣማኑዋን ፂላና ማላ፥ ኪሪስቶሲ ያና ጋካናው ሂጊ ኑና ናጊያዋ ጊዴዳ።

²⁵ሺን ሃዒ ሲሚ ኣማኑ ዬዳ ዲራው፥ ሂጊ ሃዋፔ ሲንꬃው ኑና ናጊያዋ ጊዴና።

²⁶ሂንቴንቱ ኡባይ ኣማኑዋ ባጋና ኪሪስቶሳ ዬሱሳን ኢቱዋ ጊዴዳ ፆሳ ናና።

²⁷ኣዪሲ ጎፔ፥ ሂንቴ ኪሪስቶሳና ኢቱዋ ጊዳና ማላ ፃማቄቴዳ ኡባቱ ኪሪስቶሳ ማዬዲታ።

²⁸ሄዋ ዲራው፥ ኣዪሁዳ ኣሳ ጊዶኒኔ ጊሪኬ ኣሳ ጊዶን ዱማቴꬃይ ባዋ፤ ኣይሊያ ዎይ ዎማኑዋ ጊዶን ዱማቴꬃይ ባዋ፤ ኣቱማዋ ዎይ ማጫ ኣሳ ጊዶን ዱማቴꬃይ ባዋ። ኣዪሲ ጎፔ፥ ሂንቴንቱ ኡባይካ ኪሪስቶሳ ዬሱሳን ኢቲ ኣሳ።

²⁹ሂንቴንቱ ኪሪስቶሳዋ ጊዶፔ፥ ሲሚ ሂንቴንቱ ኣብራሃሜ ዛሬ፤ ቃሲ ፆሳይ ሲንꬃፔ ኢማና ጊዴ ቃላ ጌሌዳዋ ላቲያዋንታ።