Santiago 5

1

2

3

4

5

¹Ekꞌu woꞌora, ralaq ri alaq bꞌeyomabꞌ, tanape alaq: Choqꞌ alaq y juyuy alaq ruma ri kꞌaxkꞌobꞌik kape pawiꞌ alaq.

²Ma ri bꞌeyomalil alaq xa kaqꞌayik y ri chomilaj qꞌuꞌ alaq xa kapokꞌirik.

³Ri oro y ri plata kꞌolom alaq kuꞌan mojos, yey waꞌ e kꞌutubꞌal re na utz ta ꞌanom alaq, ma e bꞌenaq kꞌuꞌx alaq rukꞌ ri bꞌeyomalil re ruwachulew. Ruma kꞌu riꞌ, waꞌ e kuꞌana pachaꞌ ri aqꞌ asu kuporoj ri tiꞌjil alaq echiriꞌ ri Dios kuqꞌat tzij pawiꞌ alaq, ma ralaq molom alaq uchiꞌ ukꞌiyal bꞌeyomalil chupa waꞌ wa kꞌisbꞌal qꞌij oj kꞌo wi.

⁴Ekꞌu raj chak xechakun chwa taq rulew alaq, na tzꞌaqat ta ri kajil xya alaq. Ri kajil wa aj chak na tojom ta alaq e pachaꞌ katunan chiꞌij alaq. Yey ri tunanik ke wa aj chak xtataj ruma ri Dios Qajawxel ri kꞌo unimal uchuqꞌabꞌ.

⁵Ralaq yaꞌom ibꞌ alaq chupa ronoje ruqusil ruwachulew y yaꞌom ibꞌ alaq che uꞌanik taq ri rayibꞌal alaq. Ri ꞌanom alaq e pachaꞌ ri kaꞌan che juna chikop lik katzuq chi utz re katiꞌoꞌjrisaxik ma ya kopon ri qꞌij kakamisaxik.

⁶E ralaq qꞌatom alaq tzij pakiwi ri na emakuninaq ta chiꞌij alaq yey e ne ralaq kamisayom alaq ke. Yey rike na kakichꞌij taj kakitoꞌbꞌej kibꞌ chiwach alaq.

⁷Pero ralaq hermanos, rukꞌ unimal kꞌuꞌxaj choyeꞌej alaq rukꞌunibꞌal ri Qanimajawal Jesucristo. Chꞌobꞌo pe alaq, juna awanel karoyꞌej na ri chomilaj uwach rutikoꞌn y rukꞌ unimal ukꞌuꞌx karoyꞌej na ruqꞌijol ri nabꞌe jabꞌ y ri kꞌisbꞌal jabꞌ.

⁸Jekꞌulaꞌ ꞌana ralaq, choyeꞌej alaq ri Qanimajawal rukꞌ unimal kꞌuꞌxaj yey jikibꞌaꞌ kꞌuꞌx alaq rukꞌ Rire, ma rukꞌunibꞌal xa naqaj chi kꞌo wuloq.

⁹Hermanos, machꞌaꞌtibꞌej ibꞌ alaq chiwach alaq chaꞌ jelaꞌ na kaqꞌat ta tzij pawiꞌ alaq. Chetaꞌmaj kꞌu alaq waꞌ: Ri Dios, ri Aj Qꞌatal Tzij, xa riꞌ chi kꞌo wuloq.

¹⁰Alaq nu hermanos, e kꞌama naꞌoj alaq che ri xkiꞌan ri qꞌalajisanelabꞌ ri xechꞌaꞌt chupa rubꞌiꞌ ri Dios Qajawxel, ma rike rukꞌ unimal kikꞌuꞌx xkichꞌij uchuqꞌabꞌ ri kꞌaxkꞌolil.

¹¹Yey riꞌoj qetaꞌam lik nim kiqꞌij kalaxik ri kakichꞌij uchuqꞌabꞌ ri kꞌaxkꞌobꞌik. Tom chi alaq puwi runimal ukꞌuꞌx ri Job y etaꞌam alaq ri utz xukꞌam lo ri Dios che rire pa ri kꞌisbꞌal re ri xukꞌulumaj. Ma ri Dios lik kukꞌut ri rutzil ukꞌuꞌx y ri kꞌaxnaꞌbꞌal ukꞌuꞌx.

¹²Puwi kꞌu ronoje ri kaꞌan alaq nu hermanos, makꞌo majikibꞌaꞌ alaq uwach pubꞌiꞌ ri kaj o pubꞌiꞌ ruwachulew o pubꞌiꞌ juna chik. Ri ꞌana alaq e waꞌ: We qatzij, xew bꞌiꞌij alaq: «Qatzij»; noꞌj we na qatzij taj, xew bꞌiꞌij alaq: «Na qatzij taj» chaꞌ jelaꞌ na kape ta ri qꞌatbꞌal tzij re ri Dios pawiꞌ alaq.

¹³¿Kꞌo junoq paxinaq ukꞌuꞌx chixoꞌlibꞌal alaq? Chutzꞌonoj utoꞌbꞌal che ri Dios. ¿Kꞌo junoq kakiꞌkotik? Chubꞌixoj rubꞌiꞌ ri Dios.

¹⁴¿Kꞌo juna yewaꞌ chixoꞌlibꞌal alaq? Chebꞌusikꞌij ri e aj wach re riglesia chaꞌ kakiꞌan orar puwiꞌ, kakikoj kꞌu aceite puwiꞌ chupa rubꞌiꞌ ri Qanimajawal.

¹⁵Ekꞌu ri oración kaꞌan rukꞌ kubꞌulibꞌal kꞌuꞌxaj chwach ri Dios, e kakolobꞌen ri yewaꞌ che ri yabꞌil y ri Dios e kayakaw re. Yey we makuninaq ri yewaꞌ, kakuytaj kꞌu umak riꞌ.

¹⁶Tzelej tzij alaq chiwach alaq y ꞌana alaq orar pawiꞌ alaq chiwach alaq chaꞌ jelaꞌ kakunutaj alaq. Ma lik kꞌo uchuqꞌabꞌ ri saqil oración kuꞌan junoq jusukꞌ rubꞌinik usilabꞌik.

¹⁷Ri qꞌalajisanel Elías junam uwach qukꞌ riꞌoj ma xa tikawex. Na rukꞌ ta kꞌu riꞌ, xutzꞌonoj che ri Dios rukꞌ ronoje ukꞌuꞌx chaꞌ na kuꞌan ta chi jabꞌ y na xuꞌan ta chi jabꞌ che ruwachulew oxibꞌ junabꞌ rukꞌ nikꞌaj.

¹⁸Jekꞌuriꞌlaꞌ, xuꞌan tanchi orar chaꞌ katzaq ri jabꞌ; y xtzaq kꞌu ri jabꞌ y ri tikoꞌn che ruwachulew xuya tanchi uwach.

¹⁹Hermanos, we kꞌo junoq chixoꞌlibꞌal alaq uyaꞌom kan ri Qꞌijsaq, yey kꞌo kꞌu junoq katzelen lo re,

²⁰chetaꞌmaj kꞌu alaq riꞌ: E ri kesan lo wa aj mak chupa ri na utz taj kuꞌano, riꞌ e kukolobꞌej jun tikawex chaꞌ na kasach ta uwach y chaꞌ kakuytaj rukꞌiyal umak.