1Mot a kum tene gongon, mot in longoro: Mot in tangtangis, ma mot in kukukuk, uni a kum ngunungut in nanpat torom mot.
2Anumot a kum ululeng det sa moroto, ma a koropos i sa ban laulau ru anumot a kum malu.
3Anumot a gol ma a silwa der sa ros, ma a rosinder in takun mot, ma in nan a pinimot elar nama sungun. Una kum ururop na bung ri, mot sa ubek tomo pas anumot a kum ululeng.
4Tama i, ka mot tokom tar a taro ra det papam una numot a kum kinobot, ra a ikul anundet i takun mot. Ra o God a Dekdek na Labino i sa longoro tar a tinangis anundet ra det pasong.
5Una numot a nilaun nin una rakrakon bual, mot ukio a labino mani, una kum lukaro sur mot ut, ma un asau ra i ugasgas mot. Mot tabor butbut a pinimot, ra milau mo mot in iru, elar nama kum wewegua, ra di tabor butbut det sur din um doko det.
6Mot ben tar a kum tene tokodos una warkurai, ra mot um doko det, ikut ka det balu mot.
7A kum tistising, gong a pinimot i ngoro lakit, ra mot kis langlang sur a inawan pat melet anun a Labino. Mot tama a tene minarut, a pinino ke ngoro lakit, ra i kiskis langlang sur a bato in puk a piso, ma sur a wakak na makus tagun ana kinobot.
8Mot kai, gong a pinimot i ngoro lakit, mot in tur dekdek una nurnur, uni a inawan pat melet anun a Labino i sa milau.
9A kum tistising, gong mot ururai etetalai, surko o God in warkurai mot. Tama i, a Tene Warkurai i sa tur nisan a matansako.
10A kum tistising, mot in nuk pas a kum poropet tagun numugu, ra det ser wasiso nama risan a Labino. Det etorom a kum ngunungut, ikut a pinindet ke ngoro, det tur dekdek una nurnur. Ra det ese anundet a nilaun, ra i wakak sur mot kai mot in muri.
11Tama i, ara taro tagun numugu det etorom a kum mamaut, ikut det tur dekdek una nurnur. Dat watung det lena det dan. Mot tasman a nilaun anun o Jop, i etorom a kum mamaut, ikut i tur dekdek una nurnur. Ra numur, a Labino i udan meleti. A Labino i bukus nama marmaris ma i a tene warut.
12A kum tistising, iri a utna ra i labo sakit, gong mot udekdek anumot a kum liliman nam tu ngas na wasiso kai. Gong mot liliman nama langit, o a rakrakon bual, o tu utna gisen kai. Ra mot mulaot, mot in lena “ma”. Ra mot ipul mot in lena “awu,” i kut ra, sur gong mot iru una warkurai anun o God.
13Ra taio tagun mot i taramo a maut, i wakak sur in wararing. Ra taio i gasgas, i wakak sur in kele a kum kelekele na ulabo torom o God.
14Ra taio tagun mot i misait, in itula sur a kum mugumugu na lotu, sur det in wararing uni, ma una risan a Labino, det in talusi nama wel.
15A niaring ra i wan tomo nama nurnur, in ulangolango o naro ra i misait, ma a Labino ut, in ulangolango melet pasi. Ma ra i sa pam tar a sakino petutna, a Labino in unus ru i gusuni.
16I mo ra mot in wasiso puaso etetalai torom mot una numot a kum sakino petutna, ra mot in wararing un mot etetalai, sur a Labino in ulangolango pas mot. A niaring anun a tene tokodos i dekdek sakit, ma i wu pat a wino.
17O Elaija, a poropet, i a musano i elar kut nam dat. I wararing sur gong i bato, ra a tulu kilalo ma wonom na kalang ke bato.
18Numur i wararing melet sur in bato, ra in nabato i puku, ma a kum utna i lubung melet, ma det wu.
19A kum tistising, ra taio tagun mot in nan raro gusun a lingmulusino, mot in ben pukus melet pasi.
20A watungi tamot, ra taio in ben pukus pas a tene sakino gusun anun a kum niraro, i sa ulaun pas a nion a musano ra gusun a minat, ra a Labino in unus ru anun a susut na sakino petutna.
