Jems 5

1

2

3

4

5

¹Odocob qila age dana caja cehewanagaca eundec age ija dah miteiga! Culumen cunug agenu cali hugian odona eunu age qaqaji bileig gehca utaeigale.

²Age cehewanaga eu wele molen. Odocob agena lotoc cumucum ji hedoin.

³Agena gol silwaca eu tonton cehen. Tonton cehec eu age deweneganu balijeceb agena silail camasac migian. Odocob eu age dewenega ja cinigwe cijadigian. Age cehewanaga ben bahic haudoin eu hib cit qoc saenna agena silail camasac migian.

⁴Dana agena cabina cabi ogina eu ameg adecnu cilehdoin eu deweneganu je madena. Cabi dana utaec eu han dana mati bahic age sao ohisna bilegina agena Tibud dahigna ti calen.

⁵Age mahana sab ilul qoc ninijen joloig. Age golanaga me qeenu sililec toodu odoloig. Age bulmakauwe qagaadecebil cal moqagannu sab geh bahic jimeig wawaga iben. Eu odiwe age qagaadecebil cal moqagannu deel wele dodoladena.

⁶Age dana tutuc coboc eu wele geladimeig qagaadecebil cal mein. Oodogin age qee wadacadelein.

⁷O cotiel, eunu age wawaga gagadic mudimeig culumen cunug gahidodoig leceb Tibud ceseli hugiannu susumudi bileigale. Age dogina, cabi memeg uqa sab aig me bahic qugian imei waug gagadic mudimei wa aqunec hibnaca hugiannu sumudinawe.

⁸Tibud hugiannu deel eu onoca qee nijia. Eunu ageha wawaga gagadic mudimeig culumen cunug gahidoigale.

⁹O cotiel, Anut age qee gesiladeiaunnu cain gonagona mudecebmudecebowain. Feiga, gesilgec dana uqa jic cebec hibilohu isec taweia.

¹⁰O cotiel, je hahun madec dana Tibud ijanna madeinnu cisdoigale. Agena cad age me qee mamadegin age wawaga gagadic mudimeig culumen eu gahidoin. Age agena kobol eu fimeig eu tooadi odoigale.

¹¹Age cisdoiga, ege odi madoqona, “Dana age wawaga gagadic mudimeig culumen gahidoin eu age eeldoc oqagan,” oqona. Age Jobna dodo wele dah mein. Uqa waug gagadic mudimei culumen cunug uqaca hon eu gahidon. Odocob hibna Tibud uqana kobol mena oduden euha age dogina. Tibud uqa egenu waug qocnuca cesulgecnuca eu geh bahic eu mele ege doqona.

¹²Euqa cotiel, ceteh oso meca bahic age odoqagan eu edi. Age sao amegnafo, qee maha amegnafo, ceteh oso amegnafo madigina ec eu cain madowain. Age je cagoc oso cain madowain. Age ao egina eu mele dih nijiale. Age qee egina eu qee dih nijiale. Eunu Anut geladec ageca qee hoiaun.

¹³Age eundec oso culumen gahidonafi uqa inondoiale. Oso uqa waug me nijinafi uqa Anut binan sulec due siliale.

¹⁴Age eundec oso uqa hagcafi uqa tamanec uqana cofadec matu utaadeceb hoigale. Age uqanu inondumeig Tibud ijanna mool joudeigale.

¹⁵Odocob age Anutnu wawaga meleeceb inondufeig Tibud uqa hag dana me mudimei haun tulidugian. Odocob uqa silail leih odonfi Tibud silail eu cunug cagasitugian.

¹⁶Eunu Anut age meadigiannu age agena silail qasalitocobtocobeigale. Odocob euha cotigcotignu inondocobdocobeigale. Dana ititom coboc uqana inondoc eu gagadicca, eu gagadic odoc odocnu ihoc bahic.

¹⁷Ilaija uqa dana ege cinigwe. Uqa wa cain neiaunnu Anut gagadic inondon. Odocob cabi gel cijed nahaca li wa mahana qee nel.

¹⁸Odocob uqa haun inondon. Odocob sao wa suldocob neceb sab mahana haun wasen.

¹⁹O cotiel! Ceteh oso age doiga. Age eundec oso mele je uqana kobol culecebfi oso ceseli ehudi honafi eu me bahic.

²⁰In oso silail dana cesuldocob uqa jic me qee culimei Anutca ceseli hona dana eu silail dana uqa cal mecnadec dolog cahahadona. Odocob uqa eu odocna silail mati cagasiadigiannu cabi ona.