1Vano nviriyane, nyu mathaaciri! Ncukule ni munle mwanlattu wo mahuviho anhala wuphwanyani.
2Mihakhu cinyu nnyo, ikuwo cinyu ni coolya cinyu, cihontta ni ciholiya ikuttihi.
3Iwooru inyu ni ipheeta enyu cihonyela urenci. Vano urenci uyo phinhala ukhala saahiti owuuttonkani ni wuulalihani toko waneerihaya mooro. Nyu nhothacirera mahuku oomalela.
4Mooneke. Ncurukhu wa ananteko yoorula mmattani mwinyu ayo, nhaalivaka, unakhuwela wuttonkakani nyenyu vaa. Wiikhupanya wa anakanyari uhophiya mpaka mmanyaruni mwa Apwiya a anakhotto.
5Nyu nheetta mpuhaka ni nhovolela ikhwilu cothene cucivenleni vathi va. Nhorittimalihera mirima cinyu nnyo nihuku noohitiya.
6Nnanhukhumu nuumwiiva nasariya, wohiwiirihani itthu.
7Phimaana asunnaka, nkhale oovilela, mpaka wanhalaya uwa Apwiya. Kinawoona mayoolima navilela awehereryaka yoolya yo mmattani, mpaka wammwaya ipula coopacera ni coomalihera.
8Ciicammo nyu nkhale oovilela ni oolipa nrima, kontha uwa wa Apwiya uri wakhiviru.
9Asunnaka, nhittokuttani ayaayoru wiira nhihukhumwinye. Hukhumu uyo ri wankhora!
10Asunnaka, niwehere minapiyu coolumaca mwa ncina na Apwiya, ciinryaya woohuva nuuvilela.
11Kinawoona nineerela ahoreeriya ale yiisunkile ni uvilela. Nnawiiwaka uvilela wa Yopi ni nhoona yaceenryaya. Apwiya ari oocara uthunku ni ikiriri.
12Asunnaka, hata mwiirihiye cani, nhilupele nromolaka wirimu, atthuna vathi va, ni hata itthu phi itthu iheliye nhilupelele. Yakhalaka khweeli, mwiireke khweeli, yakhalaka mena, mena, wiira nhihukhumwinye.
13Wariyari winyu vaa haawo nohuva? Aswaliki. Haawo tteeliye? Eepeke icipo coolemeliha.
14Wariyari winyu vaa haawo nowerennya? Arume urweliya ahooleli okereeca, wiira yoonswalele ni anttikitthele makhura, mwancina na Apwiya.
15Iswali yowaamini navona nretta ni Apwiya anaanwusa; ni wakhala wiira nookosa, naleveleliya.
16Phimaana, nlaphulule itaampi cinyu nnyo waakhwinyu ni nswalelaneke wiira nvonihiye. Ulapa wa nasariya uhaana ikuru yoolipa.
17Eliya aari ntthu, oolikana makhalelo ayo toko hii. Ule ahoswali venci wiira ihirupe ipula, ni khweeli ilapo yothene khayaarupile ipula mpaka umala myakha miraru ni nuuso.
18Ahaakulela tho uswali, vano irimu yahovaha ipula vathi nuumela mihokorokho.
19Asunnaka, wariyari winyu vaa akhalaka ntthu hiile ikhweeli, vano aturuselihiyaka ni nkhwawe,
20ncuwele wiira ule nonturusiha nataampi warukurerya cawe, nawoopola iroho awe wuukhwani ni cinakhuneelya itaampi cinci.
