1Lahenda kamasuꞌi emin! Nenene matalolole! Emi ta bae kadi soaneuꞌ lahenda fo roi-tao sota ran seliꞌ rai oka-tine mara. Mamanene neuꞌ lahenda manasota sira haraoe naloo-nakou nara. Manetualain Marela-masaꞌa a namanene sira haraoe naloo-nakou nara so. Emi boe huku ma maisa lehenda malole fo ta bisa rasalaꞌe rala ao nara rai emi mata mara. Emi nonoi-tataom nai dae-bafoꞌ ia, tao malole noi neuꞌ emi ao-ina heheli mara, ma masoda nai hihiꞌa-seteleeꞌ a. Besaꞌ ia emi sama leoꞌ sapi mapetaꞌ a fo sakaꞌ hala ni. Lahenda kamasuꞌi emin! Mulai dola leo! Huu fo neuꞌ ko, emi hapu doidoso. Emi hata-heto mara, sakaꞌ rasosopuꞌ heni si so. Ma emi kakao-papake malole mara, anadae ra raa heni si. Emi lilopila-lilofula mara ta rabeli soꞌ. Neuꞌ ko lilopila-lilofulaꞌ sira, raa seluꞌ emi, sama leoꞌ aipilaꞌ a naa heni ai tuuꞌ a. Ubeaꞌ taon de, dae-bafoꞌ a sakaꞌ noe, tehuu emi bei masapute mabubua hata-heto manasapu-manalalo sira bali? Emi hata-heto mara, neuꞌ ko, dadi buti rae, emi ta bubuluꞌ hata bea riꞌ nabeli nai Manetualain matan!
7Toranoo kara emin! Emi muste manenete mahani Ramatuaꞌ a natafali mai na. Mete masudi lahenda maue-maosa a. Ana nanenete nahani oe-daen buna-boa nara. Uda masososaꞌ a mai, boe ma ana sele-tande. Basa de ana nahani uda oeꞌ seluꞌ bali, ela parusa nara ralole. Mateꞌe na boe ma rabuna-raboa. Ma naraa no ledo-fai na, boe ma ana neu etu-oru parusa nara buna-boan.
8Emi boe muste manenete leo naꞌ. Tao matetea dale mara, huu fo ta dooꞌ a te Ramatuaꞌ a mai so!
9Toranoo kara emin! Bosoꞌ esa namuu-nadau esa. Maneniko mamuu-madau maroo, sona neuꞌ ko Manetualain naetuꞌ huhuku neuꞌ o! Mafareneꞌ Manaꞌee dedeaꞌ manai lai a mamai Na nanenea so.
10Toranoo kara emin! Tuka natutuduꞌ neme Ramatuaꞌ a mana nesimata nara. Leo mae ara hapu susa-lela rupaꞌ ara boe, tehuu ranenete raroo.
11Maneniko, hapu lahenda nanenete nai susa-lela ita soꞌu-fua lahenda ria nade na. Leo-leoꞌ baꞌi Ayub. Ana hapu susa-lela rupaꞌ ara, tehuu ana nanenete nala ni. Mateꞌ e na, Mentualain kasian neuꞌ Ayub, de bati-pala feen ua-naleꞌ, huu fo Ria henuꞌ no susue-lalaiꞌ.
12Toranoo kara emin! Bosoꞌ soo-supa pake lalai, dae-bafoꞌ a ma sudi hata ubeaꞌ. Maneniko “ia”, sona mataa mae “ia” Maneniko, “taꞌa”, sona mataa mae “taꞌa”. Leoꞌ na boe dai so! Bosoꞌ losa Manetualain huku o nana huu o sosoo-susupa ma.
13Maneniko nai emi talada lahenda esa hapu susa-lela, sona malole lena ana hule-haradoi. Ma kalu lahenda esa namahoꞌo-natadale, sona malole lenaꞌ ana soda io-oa neuꞌ Ramatuaꞌ a.
14Maneniko nai emi talada lahenda esa namahedi, sona malole lenaꞌ ana nafada mauli-malaka saraniꞌ ara fo hule-haradoi feen pake Ramatuaꞌ a nade Na ma rahutun mina, ela teꞌe na aon.
15Ma kalu emi hule-haradoi fee lahenda kamahedis ria tebe-tebe no dale kamahereꞌ, neuꞌ ko Ramatuaꞌ a puli nan. Maneniko lahenda ria tao salaꞌ, sona neuꞌ ko Ramatuaꞌ a sae-safe heni ria sala-siko nara.
16Maneniko emi ruma tao salaꞌ, sona manaku sala-siko mara esa no esa. No ria na emi esa hule-haradoi fee esa, ela teꞌe ma ao mara. Lahenda fo dale na malalao-malalafuꞌ a, huhule-haradoim henuꞌ no kuasa.
17Hai natutuduꞌ neme baꞌi Elia mai. Ria lahenda biasa sama leoꞌ ita boe. Tehuu tepoꞌ fo ana hule-haradoi, hule ela bosoꞌ boe uda bali, boe ma uda a hai tutiꞌ a, de ta uda fa losaꞌ teuꞌ telu seseriꞌ.
18Basa de, ana hule-haradoi seluꞌ fo ela uda, boe ma uda a mai tutiꞌ a. Nau-aidoo ra modo-modo ma oka-tine kalua buna-boaꞌ.
19Toranoo kara emin! Maneniko nai emi talada esa tao salaꞌ, de heo neme roo-tetuꞌ a mai, boe ma esa tulu-faliꞌ ni fo natafali leo Ramatuaꞌ a eno roo-tetu Na, sona malole a.
20Mafarene matalolole ia! Maneniko emi tulu-fali lahenda fo tao salaꞌ, losaꞌ ana natafali seluꞌ leo Ramatuaꞌ a neu, ma ana ta tao salaꞌ soꞌ, sona emi soi enoꞌ ela Manetualain poꞌi-tata na emi meme naraka a mai. No ria na, Manetualain sae-safe heni sala-siko kadodou nara. Noi ri naꞌ so! Neme au mai, Yakobis
