ቆላሲያሳ 1

1

2

3

4

¹ፆሳ ሼኔን ኪሪስቶሲ ዬሱሳ ሃዋሬ ጊዲዳ ጳዉሎሲኔ ኑ ኢሻ ፂሞቲዮሲ፥

²ቆላሲያሳ ካታማን ዴዒያ ኪሪስቶሳን ጌሻታሲኔ ኣማኔቲዳ ኣሳስ ፃፊዳ ኪታ። ፆሳ ኑ ኣዋፔ ኣꬎ ኬሃቴꬃይኔ ሳሮቴꬃይ ሂንቴው ጊዶ።

³ኑኒ ሂንቴው ዎሲያ ዎዴ ፆሳ ኑ ጎዳ፥ ዬሱስ ኪሪስቶሳ ኣዋ ኡባ ዎዴ ጋላቶስ።

⁴ኑኒ ኪሪስቶስ ዬሱሳን ዴዒያ ሂንቴ ኣማኑዋኔ ጌሻታ ኡባስ ዴዒያ ሂንቴ ሲቁዋ ሲዒዳ።

⁵ሄሳ ሂንቴ ኦꬂዳይ ሂንቴ ኡፋይሳይ ሳሎን ሂንቴው ናጌቲዳ ጊሾሳ። ሂንቴ ቱማ ኪታ ጊዲዳ ዎንጌላ ኮይሮ ኣማኒዳ ዎዴ ሄ ኡፋይሳ ሲዒዴታ።

⁶ሂንቴ ሄ ዎንጌላ ሲዒዳ ዎዴኔ ፆሳ ኣꬎ ኬሃቴꬃ ቱማ ሻኪ ኤሪዳ ዎዴፔ ዶሚዲ ሂንቴ ጊዶን ሃኒዳይሳዳ ቢታ ኡባን ዲጪሼኔ ኣይፊሼ ዴዔስ።

⁷ሂንቴ ሄሳ ኑራ ኢሲፌ ኪሪስቶሳስ ኦꬂያ ኣማኔቲዳ፥ ዶሴቲዳ ኤጳፊራፔ ታማሪዴታ።

⁸ኢ ሄሳ ቦላ ጉጂዲ ኣያናይ ሂንቴው ኢሚዳ ሲቁዋባ ኑስ ኦዲስ።

⁹ሄሳ ጊሾ፥ ኑኒ ሂንቴባ ሲዒዳ ጋላሳፔ ዶሚዲ፥ ፆሳይ ባ ሼኒያ ሂንቴና ቤሳና ሜላኔ፥ ጌሻ ኣያናይ ኢሚያ ኤራቴꬃኒኔ ጪንጫቴꬃ ኡባን ሂንቴና ኩንꬃና ሜላ ኡባ ዎዴ ሂንቴው ፆሳ ዎሶስ።

¹⁰ሄሳዳካ፥ ጎዳይ ኮዬይሳዳ ሂንቴ ዳና ሜላ፥ ኡባ ዎዴ ኢያ ኡፋይሳና ሜላ፥ ሎዖ ኦሶ ኡባን ሂንቴ ኣይፌ ኣይፋና ሜላኔ ፆሳ ኣꬂ ኤሪሼ ዲጫና ሜላ ፆሳ ዎሶስ።

¹¹ፆሳ ቦንቾ ዎልቃይ ሂንቴ ኡባባ ጌንጫናዳኔ ዳንዳዓናዳ ባ ሚኖቴꬃ ኢሚዲ ሂንቴና ኡፋይሶ።

¹²ቃሲ ጌሻታ ፖዖ ካዎቴꬃ ላታና ሜላ ሂንቴና ኦꬂዳ ኣዋ ጋላቲቴ።

¹³ኢ ኑና ꬉማ ዎልቃፌ ኣሺዲ ባ ዶሲያ ናዓ ካዎቴꬃኮ ኤሂስ።

¹⁴ኢያን ዎዜቲዲ ኢያ ሱꬃን ናጋራ ኣቶቴꬂ ዴሚዳ።

¹⁵ኪሪስቶሲ ቤንቶና ፆሳስ ቱማ ሌሚሶ። ኢ ሜꬌቴꬃ ኡባፌ ባይራ።

¹⁶ኡባባይ ኢያ ባጋራ ሜꬌቲስ። ቤንቲያባቲኔ ቤንቶናባቲ፥ ዎልቃቲኔ ጎዳቲ፥ ሃሬይሳቲኔ ማታ ኣዋቲ፥ ሳሎኒኔ ሳዓን ዴዒያ ኡባይ ኢያዉኔ ኢያ ባጋራ ሜꬌቲስ።

¹⁷ኢ ኡባባፔ ካሴ ዴዔስ። ኡባባይ ኢያን ባ ቤሳን ቤሳን ኦይኬቲዲ ዴዔስ።

¹⁸ኢ ባ ኣሳቴꬂ ጊዲዳ ዎሳ ኬꬃስ ሁዔ። ኢ ኡባፌ ቦላ ጊዳናው ሃይቆፔ ዴንዶን ሲንꬄኔ ባይራ።

¹⁹ፆሳይ ባ ኩሜꬃ ፆሳቴꬃራ ኢያን ዳናው ኮዪስ።

²⁰ቃሲ ማስቃሊያ ቦላ ጉሲዳ ባ ናዓ ሱꬃን ሳሮቴꬂ ሜꬊዲ ሳሎኒኔ ሳዓን ዴዒያ ኡባ ኢያ ባጋራ ባራ ሲጌꬂስ።

²¹ሃይሳፌ ካሴ ሂንቴ ቆፋ ኢታቴꬃይ ሂንቴና ፆሳፌ ሻኪሲኔ ኢያራ ሞርኬ ኦꬂስ፤ ሂንቴ ኦሶይካ ኢታ።

²²ሺን ሃዒ ኪሪስቶሲ ኣሾን ሃይቂዳ ሃይቁዋ ባጋራ ፆሳይ ሂንቴና ባራ ሲጌꬂዲ፥ ጌሻታ፥ ቦሬይ ባይናይሳታኔ ፂሎታ ኦꬂስ።

²³ሂንቴ፥ ሂንቴ ኣማኑዋን ቃፆና ሚኒዲኔ ፃጲዲ ዳናው ቤሴስ። ሂንቴ ዎንጌላ ቃላ ሲዒዳ ዎዴ ኤኪዳ ኡፋይሳ ሚንꬂ ኦይኪቴ። ሄ ዎንጌላይ ሂንቴ ሲዒዳይሳኔ ቢታ ኡባን ሳባኬቲዳይሳ። ታ፥ ጳዉሎሲካ ሃ ዎንጌላስ ኦሳንቾ ጊዳስ።

²⁴ታኒ ሂንቴ ጊሾ ሃዒ ኤኪያ ዋያን ኡፋይታይስ። ኪሪስቶሲ ኢያ ኣሳቴꬂ ጊዲዳ ዎሳ ኬꬃስ ኤኪዳ ዋያ ታኒ ታ ኣሹዋን ፖላይስ።

²⁵ፆሳ ቃላ ሂንቴው ፖላዳ ኦዳና ሜላ ታው ኢሜቲዳ ማታን ዎሳ ኬꬃስ ኦሳንቾ ጊዳስ።

²⁶ሃ ቃላይ ካሴ ኣꬊዳ ዎዲያን ዬሌቴꬃ ኡባፌ ጌሚዲ ዴዒስ። ሺን ሃዒ ፆሳይ ሃ ፁራ ኣማኒያ ኡባስ ቆንጪሲስ።

²⁷ፆሳይ ኣይሁዴ ጊዶና ኣሳ ጊዶን ሃ ፁራ ቦንቾ ዱሬቴꬃ ቆንጪሲስ። ኢካ ቦንቾ ኡፋይሲ ጊዲዳ ሂንቴ ጊዶን ዴዒያ ኪሪስቶሳ።

²⁸ሄሳ ጊሾ፥ ኢሲ ኢሲ ኣሲ ኪሪስቶሳን ኩሜꬃ ኣሲ ኦꬂዲ ሺሻናው ጪንጫቴꬃ ኡባን ኣሳ ታማርሶኒኔ ዞሬን ኪሪስቶሳባ ሳባኮስ።

²⁹ፆሳይ ባ ጊታ ዎልቃን ታናን ኦꬂያ ጊሾ ሃዒ ጋካናው ኢያ ዎልቃን ባፄታይሲኔ ዳቡራይስ።