1कुम्सो पपाइक्ब कली दाऊदमी बाथ्शेबा नु हेंथे पवा नोले नाथान जाक्मेनु, पशो दाऊद आ कुम्सो। २सामुएल १२:१-१५ परमप्रभु इन गेना हना यो दाक्तीकेमी आं कली शिशी पने। इन शुश शिशीमी आं हेंथे पशो क्याम्दीन। लूका १८:१७
2परमप्रभु, इन शिशी पतीकेमी आं मरिम्शो पशो नेल्ल मुरशा गेयीनी। मिनु आं कली पाप रे प्रोंइयीनी।
3मारदे हना गो आं मरिम्शो पशो तुइक्नुङ। मिनु आं पाप गेना हना यो मिम्नुङ।
4गो इन ङोंइती ला पाप पाता। इन ङोंइती इन मदाक्शो पाता। गे आं कली निसाफ पा, ठीक पाइब बाक्नीनी। आं कली निसाफ पा सजाइ गेतीनी, गे मेको आ पर्बम दोस मताइब बाक्नीनी।
5थमा पा, गो जरमेसी ङा रेन मरिम्शो पाइब बाक्ती। आं ममा आ कोव़जम जोल्ङा रेन मरिम्शो पाइब बाक्ती। रोमी ३:४; यूहन्ना ३:६
6गे आंम पर्बम आंम थुं ङा थमा मिम्तीकेम दाक्नीनी। मोपतीके गे आं थुं कली जोक्तीक तुइक्तीक शेंदीने।
7गे हिस्सोप के ब्राक्सुमी आं पाप क्याम्दीन। मिनु आं पाप क्याम्सीशो बाक्ब। मिनु आं कली चिक्तीनी। मिनु गो फुं क्येङा बुश दुम्नुङ। प्रस्थान १२:२२-२३; यसैया १:१८
8आं कली ग्येरतीके नु थुं नाइक्तीके लोव़ नेंपाइय्यीनी। मिनु इन फस पोक्शो आं रुश लेंशा ग्येरसमल। भजन संग्रह ३२:३-४
9इन कुल आं पाप रे ख्रुइक्तीन। मिनु आं मरिम्शो पशो नेल्ल क्याम्दीन।
10परमप्रभु, आं थुं क्येख सुन खोदेंशो सेलीन। मिनु नक नु ठीक पाइब सोक्त गेयीनी। मत्ती ५:८; इजीकीएल ३६:२६-२७