Kap 51:1-10

¹Dewit da Batsiba kon yumabi aban don kombɨ amɨn Natan da yokwini yolɨgɨt. Aban Dewit da yokwini do nandaŋek kap on mandagɨt. Kap on kap yoŋ dakon kɨla amɨn do mandabi. Piŋkop, gak bɨsapmɨ bɨsapmɨ amɨn do but dasi galak taŋ yomɨsal, do nandaŋ yawok nabi. Bupmɨgo madepsi do nak dakon dɨwarɨno yɨpmaŋ nabi.

²Sugaŋ aŋmɨlɨp aŋaki aŋpak yokwino mudoni. Dɨwarɨno wɨrɨrɨk namɨŋaki kɨlek tokeŋ.

³Gulusuŋ at yaŋsi nandɨsat. Uŋun gulusuŋno toktogɨsi taŋba nandɨsat.

⁴Nak gulusuŋ gak naŋgɨn aŋ gamɨsat. Gak da dabɨlon yokwisi at. Yaŋdo, gen pikon nepmaŋek gen yaŋ nabi uŋun tagɨsi. Gen kokwin kɨlegɨsi aŋek kobogɨ namdɨsal.

⁵Asisi, yokwi gat kɨsi altagɨm. Meŋ da butgwan wasaŋek yɨkgɨm bɨsapmon yokwi gat kɨsi yɨkgɨm.

⁶Asi, nin butninon da topmɨ mɨni egɨpneŋ do nandɨsal. Do gak da nandaŋ kokwingo tagɨsi butnokon nayɨŋ dekgi do nandɨsat.

⁷Yokwino wɨrɨrɨkbɨ kɨlegɨsi egɨpbeŋ do nandɨsat. Sugaŋ nepbɨ ais kwakwagɨsi uŋun da tɨlak kɨlegɨsi egɨpbeŋ.

⁸Butno aŋtagap abɨ aeno kɨsɨk kɨsɨgɨ toŋ egɨpbeŋ. Asi, wagɨlsi abɨŋ nepgul, mani aeno kɨsɨk kɨsɨk abeŋ do nandɨsat.

⁹Dɨwarɨno aego dɨma pɨndakgi. Yokwino kɨsi wɨrɨrɨk mudoki.

¹⁰Piŋkop, butno aŋkaluk abɨ kɨlegɨsi asak. Butno aŋkaluk abɨ gak naŋgɨn golbeŋ.