1कुम्सो पपाइक्ब कली दाऊद आ कुम्सो। परमप्रभु यावे, गे आं कली नाक्शा तुइश्शो बाक्नीनी। भजन संग्रह ७:१०; येरमीया १७:१०
2गे आं निश्शो बोक्शो तुइश्शो बाक्नीनी। आं मिम्शो नेल्ल तुइक्नीनी।
3गे आं गाक्शो इप्शो थमा पा तुइक्नीनी। आं पशो नेल्ल गे तुइश्शो बाक्नीनी।
4परमप्रभु यावे, गे आं ब्वाक्चा क्येङा ङोंइती आं लोव़ नेल्ल तुइक्नीनी।
5गे आं एर ओंथ नेल्ल बाक्शा, इन गुइ आं तार वोइक्तीनी।
6मेको तुइक्तीके आं कली थम ठेयब बाक्ब। मिनु गो मेको रुप्ने मचाप्नुङ।
7मिनु गो इन सोक्त क्येङा ते लशा ख्रुइक्ने चाप्नुङा ङा? गो इन ङोंइती रे ते प्रोक्ने चाप्नुङा ङा?
8गो सरीङ लती हना यो, गे मेके बाक्नीनी। गो बेक्शो मुर आन बाक्तीकेम आं बाक्तीक सेल्ता हना यो, गे मेके बाक्नीनी। आमोस ९:२
9गो नां दाप्तीक सम्म बेरशा लती हना यो, शुश ङोन समुन्द्र तार लती हना यो, योना १:३
10गे मेकेर यो आं कली लां कोंइनीनी। मिनु गे इन सक्तिमी आं कली वारच पाइनीनी।
11मिनु गो “छिङछिङम आं कली सुम्शा, आ एर ओंथ ङा छेङछेङ नेल्ल नाक्दो खोदेंशो दुम्ल” देंती हना यो, अय्युब ३४:२२
12छिङछिङ इन कली छिङछिङ मदुम्ब। नाक्दो नाक्त खोदेंशो पा छेङछेङ दुम्ब। मारदे हना छिङछिङ इन कली छेङछेङ खोदेंशो बाक्ब।
13मिनु गे आं आगा ङा मारेइ मारेइ सेल्तीनी। गे आं कली आं ममा आ कोव़जम सेल्तीनी।
14गो इन कली ठेयब सेल्नुङ। मारदे हना गे आं कली छक लाक्चा ङा नु रिम्शो पा सेल्तीनी। इन गेय नेल्ल छक लाक्चा ङा बाक्नीम। गे आं कली थमा पा तुइश्शो बाक्नीनी।
15गो ख्रुइश्शा जोल्ना जोल्न बाक्ङानु, गे आं कली तशो बाक्तीनी। मेना गो रागी आगाम जोल्ना जोल्न बाक्शो नङ।
16गे आं मजोल्शो रां तशो बाक्तीनी। मिनु आं कली गेशो ब्रोंइतीक नाक्ती नेल्ले इन किताबम ब्रेक्शो बाक्तेक्म। मेको दुम्चा क्येङा ङोंइतीन ब्रेक्शो बाक्त। भजन संग्रह ३१:१६
17परमप्रभु, इन मिम्शो आं कली थम ठेयब बाक्ब। इन मिम्तीके शुश बाक्नीमी। भजन संग्रह ४०:६
18गो मेको आन कली हिक्चा माल्शो नङ हना, मेको बाल्वा क्येङा यो शुश दुम वा। गो सेंसीङानु, गो गे नु बाक्शो बाक्नुङ। भजन संग्रह ६३:७
19परमप्रभु, गे इन अरेशो मटीब आन कली साइक्नी हना, रिम्शो दुम वा। हुश ख्राक्श पोक्ब आं क्येङा ङोन लमल।
20मेकोपुकीमी इन पर्बम मरिम्शो लोव़ पाइनीमी। मिनु ठेयब लेश्शा, शुश मरिम्शो पाइब बाक्नीमी।
21परमप्रभु यावे, इन कली काइ मदाक्ब आन कली गो यो काइ मदाक्नुङमी। मिनु गो इन कली मरिम्शो पचा कली बोक्ब आन कली तशा ग्रांग्रा दित्नुङमी।
22गो मेको आन कली थमा पा काइ मदाक्नुङमी। मिनु गो मेको आन कली आं जोरी सत्रु मिम्नुङमी।
23परमप्रभु, गे आं कली नाक्शा, आं थुं कोव़यीनी। मिनु आं कली कोव़शा आं मिम्शो तुइक्तीन।
24गो आं थुंम इन अरेशो मटितीके बाक्म कों? कोव़ङीन। मिनु गे आं कली गेना हना यो ब्रोंइशा बाक्तीक लांम खुल्यीनी।
भजन संग्रह 139
भजन संग्रह 139:1-24