Pisalem 139:1-24

¹Meenei Dimaadua, Goe gu hagadina au, gei gu iloo e Goe au.

²Goe e iloo nia mee huogodoo ala e hai ko au, Goe e modongoohia agu hagamaanadu mai i di gowaa mogowaa.

³Goe e mmada mai gi di au, be au e ngalua be e hagamolooloo. Goe e iloo ogu hangahaihai huogodoo.

⁴I mua dagu helekai, gei Goe gu iloo dagu helekai dela gaa hai.

⁵Goe e haganiga au i nia baahi huogodoo, Goe e abaaba au gi oo mahi.

⁶Do iloo e Goe au la koia e haga goboina huoloo mai gi di au, e donu ngadaa huoloo ginai au.

⁷Ma dehee di gowaa e mee di hana ginai au, gei au gaa tanga gi daha mo do Hagataalunga? Di gowaa i hee e mee di lele ginai au bolo gii ngala au i di Goe?

⁸Maa nei bolo au ne hana gi nua gi di langi, gei Goe guu noho i golo. Maa nei bolo au ne hana gi di gowaa o digau mmade, gei Goe gu i golo.

⁹Maa nei bolo au ne maangi gi dua loo, be ne noho i di gowaa dela koia e mogowaa loo gi dai,

¹⁰gei Goe gu i golo i nia gowaa aalaa belee dagi au, gei Goe gu i golo belee hagamaamaa au.

¹¹Maa nei bolo au ga helekai gi di bouli bolo gi gahu ina au, be go di maalama dela e haganiga au gi bouli,

¹²malaa, di bouli dongoeho le e deemee di haga bouli ana mee adu gi di Goe, gei di boo le e maalama hua be di aa. Di bouli dongoeho mo di maalama le e hai hua be di mee e dahi i doo baahi.

¹³Goe ne hai nia mee huogodoo o dogu huaidina, gei Goe ne haga noho au i lodo tinae o dogu dinana.

¹⁴Au e hagaamu Goe i doo hai au hagahumalia ge haga goboina, au mee huogodoo ala e hai le e haga goboina gei e humalia huoloo. Au gu iloo eau di mee deenei mai i lodo dogu manawa hagatau.

¹⁵Di madagoaa hua ogu iwi ne haga noho hagahumalia gii donu i lodo tinae o dogu dinana, ga tomo aga i di gowaa ngala, gei Goe gu iloo bolo au gu i golo.

¹⁶I mua dogu haanau, gei Goe gu gidee au. Nia laangi ala e mouli iei au la gu hagailongo huogodoo gi lodo dau beebaa, mo i mua di daamada di laangi matagidagi o dogu mouli.

¹⁷Meenei God, do manawa le e modongoohia ngadaa mai gi di au! E logowaahee go au haga mamaanadu!

¹⁸Maa au gaa hai bolo e dau nia maa, ma koia e logowaahee i nia gelegele ala i tongotai! Au ne ala aga, gei au i doo baahi hua igolo.

¹⁹Meenei God, au e hiihai huoloo bolo Goe gi daaligidia gii mmade digau huaidu! Au e hiihai huoloo bolo digau daaligi dangada la gii hula gi daha mo au!

²⁰Digaula e helehelekai huaidu i di Goe. Digaula e helekai hagahuaidu do ingoo.

²¹Meenei Dimaadua, au e hagadugina eau digau ala e hagadugina e ginaadou Goe! Au e haga balumee digau ala e hai baahi adu gi di Goe.

²²Au e hagadugina huoloo i digaula. Au guu dugu digaula bolo nia hagadaumee ni oogu.

²³Meenei God, hagadina ina au, gi iloo e Goe dogu manawa. Hagamada ina au, gi iloo e Goe agu hagamaanadu.

²⁴Halahala ina be ma nia huaidu i dogu baahi, mo di dagi au gi di ala o di mouli dee odi.