Sam 139:1-24

¹Dawid sasawa Iawe God, ne nuana bedewa banuitene ewaana, e ne atenidaneana.

²Ne wainedina ba enedina e atenaida, e nowa dauwoido wainiana tane insaisana uduudu atenaida.

³E ne ewaneiano leidina ba bubuantedina, dewa uduudu dewamodina e atena.

⁴Muriwa gagalo da moanawo nosepi, e bauta ateitiana muriwa ne wadina.

⁵E ipa gonaa rua ne pananeana, e mukaa debama mampe gonaaneana.

⁶E ne ateineiana atemba ipa debamaia, ne mai atenteapaa rua.

⁷Ne naepe anteapo e mai ewanea? Mai bola da wineipona bedewe anteapa, ne naepe antape wampona e sape wainiana.

⁸Ne odape uboo anteapa, e sape wainiana; ba bolala bolauwo iape anteapa, e sape wainiana.

⁹Naita ne omo wisediawo anteapa, ba omo pamediawo anteapa,

¹⁰e bola sa bedewe ne witana wadae banlanea, ita e mukaa mampe ne gonaanea.

¹¹Ne dubawa diapo wereganepi, ita sapa diapo iwinlepie dubalepi

¹²tane dubawa e mai bodeepia rua e manawo dubawa ipa walama sapawa rua. Dubawa ita sapa e manawo ipa deawau os.

¹³E ne etena moa daitada dewasaana, ita inana bupa bedewe awodeasae ituneana.

¹⁴E dewa pokawaa dewasae dewaneana baiwa wadaposiedina; nitu uduudu e dewamoiana ipa eubuida. Ne nuana uduudu mampe atenten.

¹⁵Ne neaina uduudu dewamoana, ita deaitopanee inana bupa bedewe ituneana, sape werego muntedino, e ateiten ne sape wainedine.

¹⁶E ne ewaneano muriwa munten. Ne wampaa walamawa umanawa e bukaa bedewe girumaiten ita muriwa walama sa ualen.

¹⁷God e insaisaa uduudu ne mai atentapatuwapia rua, ipawa e insaisaa uarakadinton!

¹⁸Ne mai wisiamopa rua ipawa e insaisaa ipa uaraia, nela wisiasiawaia rua! Ne itu bedewe enapawineapa, e ne tainawo onianeiana!

¹⁹God, ne menaidanedia e apana kadi dewasaia bomoa! Ne mainawo wita kadilala tanamowo nambe antopu.

²⁰Mo e wakadisaei, mo e eboa mai wiwirawantoipona.

²¹Iawe God, mo mida e dabuaeia ne dabuamodina. Mo e aiaa amboitusai.

²²Ne nuana kadiidaleide mo mampo; sa baiwa mo ipa ne emalawoana apanawa.

²³Ne nuana bedewa banuitee ewaa ita insaisana uduudu ateitaa.

²⁴Naita kadi dewalala intau asiasi antepina waeuwanea, ita e ina winakasala intawa asiasi banlanea.