SAM 139:1-24

¹Buyambam tapa, gata natane musipma gwa usanzike nae asiknga nataayak.

²Siakan. Sanga nata tasinggau kuupbamu gata atnataayak. Ngan, nata pukuyuwit ba dandam tangan yuwit siwan ngana gata keu komdune maa yukengu sanga tasinangge nataau atnataayak.

³Ngan, nata epuke kuwit ba dapuna petnangge tasiwit, siwan ngana gata natane yuyuknga kuupbam atnataayak.

⁴Buyambam tapa, nata wamu takngatu ba yanangge tasiwanu wamu waaknga gata gambok nataayak.

⁵Natake gata na zaneka kuwawanu gata nandukakaike na gikane kekeknga akngane nanduyuwayak.

⁶Siwan gatane natdetdetda unzing wa nataayak kaknga enane siknga. Siwan natane natdetdetna ayapbikgak.

⁷Siwan nata zane kuke gatane waung kapaka yuwau tewit? Ngan, nata zane datakuke gae kusopuwit?

⁸Sike nata yekaune akoke yuwiu, ga yekaune ayuayak. Gatu nata aminu gwa kumbingga yuaingune paku yuwiu gakaya waomune ayuayak.

⁹Siwan nata tembana siknga enake kwaitda binga bepmake maa siknga yanggabam gwene kautdu saak komune ba kuwit, ba paku gunzitda akonggaune ba pukunggaune ba kuwit. Ga waomune kuut ayuayak.

¹⁰Ga waomuneaya ayuke kepina tanomanuke gata na katakgata take akgatangamuya.

¹¹Sike nata gatu anzing ba yawit, “Zikaandakata na takusopuwik. Siwan kakaa gunzitdaneta na takumbasiwanu wa zikaandaka siwik,” ngang yawit.

¹²Siwan ngana undanga, gata zikaa wandaka kawi zikaa daka kakaa gunzitda binga isinggak. Zikaandaka kawi kupakupan gunzitda tasinggak binga singgak. Dasingge, zikaandaka gatu kakaa aknga ngangu gae kaine ina unzakan.

¹³Siwan gata sanga natane gupma apaatang yuaingu kuupbam gata pasikuyak. Sike gata na mingae musipnaatang yukum komune, natane gupmaat gatu kwatana ngang gata pasike peke tanomanukuyak.

¹⁴Siakan. Duya kekeknga takngatu takngatu pasikuyak binga. Unzingge nata gatane umanda ayatangenakgat. Sangabamu gata pasikuyau inata siknga siwan gwaam siknga. Siwan nata sanga waakngae katak siknga atnataat.

¹⁵Sike tapduu na mingae musipnaatang yukum komune natane gupma ba kwatana kuut gikane kaikane kusopuknga dua yukut. Ngan. Nata mingatane musiaatang kusopuke wepda wepda takakumu gata kaawi kwatana unekan apuke ngwakapan kakuyak.

¹⁶Gata na mingata dua tangaiwawanu gata na atnandupbuyak. Nata keu andakane dua apuwawa nae buu gikane gopatangu nata keu andakane tapdukbamu yuwitde gwa matakuyak.

¹⁷Anutu, gatane natdetdetdae natapa sanga gwaam siknga singgak. Gatane natdetdetda mateknga dua, siwan nata natdetdetdae kepi tawake natdetnanga dua.

¹⁸Sike nata sanga gata nataaunin kendetnangge tasiwanu, saisai yanggabam gwende kwaimune yuaing binga siwik. Kendetnanga dua singgak. Siwan, tapduu nata dapun pesika enakgaunen, gaat naat kuut yuamak.

¹⁹Anutu, nata wai aminu atzipi kumningge nataat. Ngan, ginu aminu amak tasike amin zipa kungwakaing aminu napmake kunong.

²⁰Aminu waakwakga gae wamu waiaknga yakaing. Ngan, gae umandae wamu wai aknga aknga yakaing.

²¹Buyambam tapa, nata aminu gae apbitakaing aminde nakaya apbitanggat. Siwan aminda gae yamandet sikaingge nata musipmaik natayamunggat.

²²Siakande siknga, nata waaminde asiknga bitanggat. Nata waaminu kawa natane iwana singgak.

²³Anutu, gata na katak siknga natdetdetna gatu musipmaatang yuaingu usanzike kayo. Tanzit tasike nata nangaakan nataau kuupbam usanzike kayo.

²⁴Na katak siknga usanziyo, sanga tasiwa aminda nandupa wai siwik kaknga kundu natdetdet naatang yutnang. Kake gata na nanitakuwi kepi kayuu asinggan yutnanga akngane sukuwit.