1Eme Jojakim e ŋicwofuŋ juhame Babe ŋicwofuŋ Nebukanezazi fisime jara jahec â moc ere kiŋaŋŋic juwec. Juku ine maŋrâŋgeŋ bâfuacnewec.
2Eme Wofuŋzi kiŋaŋŋicfâc‐ticne porofete jaŋere micko dâŋ râewec irec sâcko râsi fisihuc Juda bâsiroweniŋte Wofuŋzi ŋic guru ʒiŋuc sorec‐jopawec: Kaldea ŋic â Siria ŋic â Moabi ŋic erâ Amoŋŋic.
3Erâ Manasezi hehesic sasawa ebac ewec irec erâ Wofuŋzi ʒâŋe mai‐ticnaonec bârâriec‐jopaocte e jahac mutâcnewec iŋuc hâcne Judarao fuawec.
4Erâ Manase e bahac tâmiricko soc hoŋkewec irec wâc mâmâc. E bahac tâmiricko soc hoŋkeme Jerusalem hae sâcke‐fârewec hâcne. Irec wemocko Wofuŋzi kiŋ bebehere moc muzac.
5Jojakimzi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
6Eme Jojakim e apa ŋosafâcne jaŋerao ʒuhuckehuc hâmome ŋokâ‐ticne Jojakiŋzi tucticne qarâ ŋicwofuŋ juwec.
7Iŋuc eme Babe ŋicwofuŋzi Aigita ŋicwofuŋte mâreŋ sasawa Aigita opâonec raku Eufrata opâo mickekac i rofârewecte Aigita ŋicwofuŋ e mâreŋ‐ticne beherâ ira me ira mocwâc mi rawec.
8Jojakiŋ e jara 18 bazurâ fuŋkerâ ŋicwofuŋ ehuc mosa jahec â moc Jerusalem haeo juwec. Neŋgoc‐ticne ʒâŋene Nehusita e Jerusalem haeonec ŋic moc ʒâŋene Elenataŋ ere otâ.
9Jojakiŋ e mamac‐ticnezi wiac sasawa ebac ewec irec sâc jaha ehuc Wofuŋte ʒâŋe faio wiac mamakâcne bâfuawec.
10Ehame dameŋ ira Nebukanezare kiŋaŋ qaqafâc jaŋe Jerusalem haeo fisirâ hae i somâckembiŋ.
11Eme somâckehuc fohapie jaha Babe ŋicwofuŋ Nebukaneza e Jerusalem haeo fisiwec.
12Ehame Juda ŋicwofuŋ Jojakiŋ e jahacne neŋgoc‐ticne â kiŋaŋ qaqafâcne, erâ ŋic fekicne â ŋicwofuŋ ficticnere micne jaŋe ʒeŋgoma Babe ŋicwofuŋte meo fefârembiŋ. Jojakiŋ e ŋicwofuŋ jume jara 8 ehame Babe ŋicwofuŋzi kâpâcwâru barâ barawec.
13Ehuc Wofuŋte ufuŋko â ŋicwofuŋte ficko ʒeŋaŋ wiac ŋewec i mâmâc bawisewec. Erâ Wofuŋzi mutâcnewec irec sâcko Israe ŋicwofuŋ Salomozi Wofuŋ ufuŋ‐ticnere râqâc wiac golzi bawec i wâc mâmâc henʒaŋ qanʒaŋnerâ bawisewec.
14Erâ Jerusalem hae rune â ŋic fekicne erâ tai tâpiri‐jeŋichec 10 tauseŋ kâpâcwâru bacjopa rawec. Erâ metâ bapa ŋic â aeŋzi wiac bapa ŋic jaŋe wâc mâmâc, ŋic tâpirihec moczi moc mi juhuŋgaŋkewec. Mâc, ŋic ŋokac hapetac jâmbâŋ jaŋe sawa behec‐jopame mâreŋ ira jumbiŋ.
15Eme ŋicwofuŋ e Jojakiŋ rorâ Babe mâreŋko barawec. Ehuc neŋgoc‐ticne â ŋonâŋfâc‐ticne â micnefâc‐ticne erâ mâreŋ irec ŋic fekicne jaŋe rocjopa‐fârerâ kâpâcwâru bacjopahuc Jerusalem haeonec Babe mâreŋko amec‐jopa rawec.
16Babe ŋicwofuŋ e ŋic ʒiŋuc kâpâcwâru bacjoparâ Babe mâreŋko amec‐jopa rawec: Ŋic tai tâpiri‐jeŋichec 7 tauseŋ, erâ metâ bapa â aeŋzi wiac bapa ŋic 1 tauseŋ. Jaŋe tâpirihec â ʒika qaqare sâc sasawa.
17Erâ Babe ŋicwofuŋzi Jojakiŋte mamac pitic, ʒâŋene Matania e Jojakiŋte tuc qarâ ŋicwofuŋ juocte âkendâŋnewec. Ehuc ʒâŋe‐ticne herisierâ Zedekia muwec.
18Zedekia e jara‐ticne 21 bazume ŋicwofuŋ âkendâŋnepie juwec. Erâ Jerusalem haeo ŋicwofuŋ gie‐ticne bahuc jukuhame jara 11 tarawec. Neŋgoc‐ticne ʒâŋene Hamuta e Libina haeonec Jeremia wase‐ticnere otâ.
19Zedekia e Wofuŋzi wiac honeme sâqoreekac i hâcne ehuc juwec, ine Jojakimzi ejujec irec sâcko jâmbâŋ.
20Eme Wofuŋ e juku kimbeŋ‐ticnere erâ Jerusalem â Juda behec‐jofawec. Eme Zedekiazi Babe ŋicwofuŋ maŋrâŋgeŋ bâfuacnewec.
