Text copied!
CopyCompare
Kâte Bible - Ŋicwofuŋ II

Ŋicwofuŋ II 14

Help us?
Click on verse(s) to share them!
1Joahaʒire ŋokâ Jehoasi e Israe ŋicwofuŋ jume jara jajahec eha Juda ŋicwofuŋ Joasire ŋokâ Amaziazi fuŋkerâ ŋicwofuŋ ewec.
2E jara‐ticne 25 bazurâ fuŋkerâ ŋicwofuŋ ehuc jara 29 Jerusalem haeo juwec. Neŋgoc‐ticne ʒâŋene Joadaŋ e Jerusalem haeonec.
3Amazia e Wofuŋte ʒâŋe faio wiac sasawa ebac eme sâcke‐fârewec. Erâ ine apa‐ticne Dawidire sâc wâc mâcne, e wiac gâcne ewec i mamac‐ticne Joasizi ewec sâc ijaha ewec.
4Erâ furu mâreŋ mi bârârie‐fârewecte ŋic ŋokac jaŋe furu mâreŋkoa taha bâzi â hosâc âsu i rikehuc jumbiŋ jaha.
5E ŋicwofuŋ ŋeŋe‐ticnao ŋesanaŋkehuc mamac‐ticne ŋicwofuŋ juhame qâhâmombiŋ, kiŋaŋ qaqafâcne i jaŋe iŋuc jaha qâhâmoc‐jopawec.
6Ehuc Mosere sâcmutâc dâŋte papia qizecko Wofuŋte mumutâc dâŋ ʒiŋuc qâreŋkekicne fokac irec sâcko mamac‐ticne qambiŋ jaŋere ɋâricfâc mi qâhâmoc‐jopawec: “Naru motec jaŋere erâ mamacfâc‐jeŋic mi qâhâmoc‐jopazo, me mamac jaŋere erâ naru motecfâc‐jeŋic mi qâhâmoc‐jopazo. Ŋic buc buc jaŋe jaŋacne sâqocnere erâ hâmonʒepieŋ.”
7Eme Amazia e mâreŋ ŋondeŋ moc ʒâŋene Hâwec Wâneŋ ira Edomŋic 10 tauseŋ qâhâmoc‐joparâ Sela hae ro rauc ehuc ʒâŋene Joketele muwec. Eme ʒâŋe i dameŋ ʒi fokac jaha.
8Eme Amazia e Joahaʒire ŋokâ, Israe ŋicwofuŋ Jehoasi, Jehu ŋosa‐ticne hâcne, erao kiŋaŋ sorec‐jopahuc ʒiŋuc muwec: “Go waretec nâhâc tâpiri‐nâhecte fuŋne nowac gowatuŋ ezeperec.”
9Iŋuc mume Israe ŋicwofuŋ Jehoasizi Juda ŋicwofuŋ Amaziarao dâŋ ʒiŋuc râeme rawec: “Lebanoŋ mâreŋko ʒârâ moczi Lebanoŋ mâreŋkoa jâmâzâc jâctao ʒiŋuc muhuc dâŋ râewec: ‘Go otâge ŋokâ‐nanere ŋonâŋ eocte râecnec.’ Iŋuc muhame Lebanoŋ mâreŋkonec jaha kâte qowi moczi fotâcnehuc ʒârâ i âtenʒaŋnewec.
10Go jâmbomac Edomŋic jopameŋ; eme irec erâ maŋfefe ekomec. Go eri qaraweŋgere manatec sâckeha haegaoa juc. Go wemocte gahacne mecne â Juda kikefuŋ mecne ŋoŋe mâmâc jaha waha ŋopaocte suru jâiŋ ehuc bahac bâfuacmurâ giene bakomec?”
11Iŋuc mume Amazia e dâŋ i mi manawec. Eme Israe ŋicwofuŋ Jehoasi e ferâ Amaziahec Juda hae moc ʒâŋene Bete‐Semesi ira bâbâfuac erâ qaqac epic.
12Ehuc Israe ŋic jaŋe Judaŋic bawahac‐jopapie wiserâ hae‐jeŋic sâc rambiŋ.
13Eme Israe ŋicwofuŋ Jehoasizi Joasire ŋokâ, Ahaʒia ŋosa‐ticne, Juda ŋicwofuŋ hâcne e Bete‐Semesi haeo rorâ Jerusalem haeo barawec. Erâ haesac i 400 kubi irec sâc Eferaim Motâckonec heropieha raku Tuturuŋ Motâcko fisiwec.
14Ehuc gol â siliwa â kuʒi râqâc wiac Wofuŋte ufuŋko fowec i mecne â ŋicwofuŋte ficko ʒeŋaŋ wiac fowec i mecne, erâ wâc ŋic ŋokac mecne mâmâc amec susuc‐joparâ Samaria haeo risiewec.
15Eme Jehoasizi wiac sasawa ebac ewec â tâpiri‐ticnere fuŋne irec dâŋ mecne erâ Juda ŋicwofuŋ Amaziahec qaqac epic irec binaŋ sasawa i mâmâc Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
16Juku Jehoasi e hâmome apa ŋosafâcne jaŋerao ʒuhuckerâ Israe ŋicwofuŋ jaŋe fombiŋkoa Samaria haeo duckembiŋ. Ehame ŋokâ‐ticne Jeroboamzi tucticne qarâ ŋicwofuŋ juwec.
17Juda ŋicwofuŋ Joasi ere ŋokâ Amazia e Israe ŋicwofuŋ Joahaʒire ŋokâ Jehoasizi hâmome jara 15 ʒuhuckerâ juwec.
18Eme Amaziazi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.

19Eme ŋic gâcne jaŋe Jerusalem haeo râsi rocnepie wiserâ Lakisi haeo rawec. Ehame kiŋaŋ sorec‐jopapie Lakisi haeo rarâ ira qapie hâmowec.
20Hâmome becâsicko râerâ bara Dawidire hae qizecko Jerusalem ira apa ŋosafâc‐ticne fombiŋkoa duckembiŋ.
21Ehuc Juda ŋic jaŋe ŋokâ‐ticne Uʒija jara‐ticne 16 bazuwec, e rorâ mamac‐ticne Amaziare tuc qarâ juocte ŋicwofuŋ âkendâŋnembiŋ.
22Eki hâcne ŋicwofuŋzi hâmome apa ŋosafâcne fombiŋkoa duckepie foha Elata hae barâ Judaŋic mocwâc bârisie‐jarewec.
23Joasire ŋokâ Amazia e Juda ŋicwofuŋ jume jara 15 eha Israe ŋicwofuŋ Jehoasire ŋokâ Jeroboamzi fuŋkerâ Samaria haeo ŋicwofuŋ gie rorâ jara 41 ŋicwofuŋ juwec.
24Ehuc Wofuŋte ʒâŋe faio wiac mamakâcne ewec. E Nebatere ŋokâ Jeroboamzi Israe ŋic ejareme hehesic bâfuambiŋ hehesic i mi râpeckewec.
25E Israere Wofuŋ Anutuzi kiŋaŋŋic‐ticne Amitaire ŋokâ Jona, Gatehefe haeonec, erao dâŋ muwec i deŋkeocte Israe ŋic jaŋere mâreŋ ma Hamati haeonec raku Araba Hâwecko fisikac i mocwâc bârisie‐jarewec.
26Wofuŋ e Israe ŋic jaŋere fific guguriŋ hâtâne i honewec hâcne. Ehame ŋic rambaŋko jujune me niŋgiŋko jujune jaŋeraonec moczi moc Israe ŋic babafic‐jopare sâc mi juwec.
27Erâ Wofuŋ e mâreŋko Israe ʒâŋe biŋe bârârâŋneocte moc mi muwec, irec Jehoasire ŋokâ Jeroboam manacnehame eki bafic‐jopawec.
28Eme Jeroboamzi wiac ebac ewec â ʒika qawec â tâpiri‐ticnere fuŋne erâ Damasko â Hamati hae i Judaŋic jaŋeraonec rorâ Israe ŋic bârisie‐jarewec irec binaŋ i sasawa Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
29Eme Jeroboam e apa ŋosafâc‐ticne Israe ŋicwofuŋ jaŋerao ʒuhuckerâ hâmome ŋokâ‐ticne Ʒekariazi tucticne qarâ ŋicwofuŋ juwec.