1Remalia ŋokâ‐ticne Peka e ŋicwofuŋ gie bahuc jume jara 17 eha Juda ŋicwofuŋ Jotamte ŋokâ Ahaʒizi fuŋkerâ ŋicwofuŋ ewec.
2Erâ Ahaʒi e jara 20 bazurâ ŋicwofuŋ gie rorâ jara 16 Jerusalem haeo ŋicwofuŋ juwec. Ehuc apa‐ticne Dawidizi wiac ewec irec sâcko mi ehuc Wofuŋ Anutu‐ticnere ʒâŋe faio wiac ebac eme mi sâckewec.
3E Israe ŋicwofuŋ jaŋere hata bâjâpewec. Ehuc ŋokâ‐ticne qarâ taha bâzi rikewec. E Israe ŋic jaŋe ŋic gurune gurune jaŋere mâreŋko raʒiniŋte Wofuŋzi mâreŋ rune jopa jâpec ejarewec jaŋere eebapa sâqocne i hâcne ewec.
4Erâ furu mâreŋko â tiki faio erâ jâc dodomanere fuŋnao taha bâzi â hosâc âsu rikehuc juwec.
5Ehame Siria ŋicwofuŋ Reziŋ â Remalia ŋokâ‐ticne Israe ŋicwofuŋ Peka jahe Jerusalem haeo râsi fisirâ Ahaʒi somâckehuc bawahanicte eipiepic.
6Dameŋ ira hâcne Siria ŋicwofuŋ Reziŋzi Judaŋic Elata haeonec jâpec‐jopahuc hae i Edomŋic bâtikie‐jarewec. Ehame Edomŋic jaŋe Elata haeo fisirâ jumbiŋzi dameŋ ʒiŋuczia juŋgopieŋ jaha.
7Iŋuc epie Ahaʒizi Asiria ŋicwofuŋ Tigela‐Pileserao kiŋaŋ sorec‐jopahuc ʒiŋuc muwec: “No kiŋaŋ qaqa â ŋokâge. Irec go wefurâ Siria ŋicwofuŋ â Israe ŋicwofuŋ kisâ enarekopirec jahere meonec bataracnuc.”
8Ahaʒi e iŋuc murâ Wofuŋte ufuŋko â ŋicwofuŋ ficticnere kânoŋko siliwa â gol fowec i rorâ Asiria ŋicwofuŋ bubiaŋ qacnehuc râeme rawec.
9Eme Asiria ŋicwofuŋ e Damasko haeo râsi fisirâ hae i rohuc hae rune rocjoparâ Kiri haeo bacjopa rawec â Reziŋ ine qâhâmowec.
10Ehame ŋicwofuŋ Ahaʒi e Damasko haeo Asiria ŋicwofuŋ Tigela‐Pilese bâfuaocte rarâ hae ira alata ŋewec i honewec. Ehuc alata irec hawari i sâcticnehec aimuŋ jaha bafârerâ taha bapa Uriarao râeme rawec.
11Eme Uria e ŋicwofuŋ Ahaʒizi Damasko haeo juhuc alatare mumutâc râecnewec irec sâcko ŋicwofuŋ e biac mi risiehame baku bafârewec.
12Eme ŋicwofuŋ e Damasko haeonec risierâ alata i honewec. Ehuc alata ira raferâ
13qowi bâzi â nânâ bâzi rikewec. Erâ waiŋ hoŋkerâ wamare soc alata fainao tiewec.
14Erâ aeŋ bâbâroŋzi Wofuŋte alata bakicne, Wofuŋte ufuŋ motâc maickehuc e jahacne alata â Wofuŋte ufuŋ ŋoŋondeŋ‐jekicko ŋewec i bârârierâ e jahacne alata faicnaopec hewec.
15Ehuc ŋicwofuŋ Ahaʒi e taha bapa Uria ʒiŋuc muhuc sâcmutâc ecnewec: “Go alata sâko ʒirec faio furic bâzi â ŋafe bâzi rikezemec. Erâ ŋicwofuŋte qowi â nânâ bâzi rikehuc ŋic ŋokac jaŋere qowi â nânâ bâzi erâ waiŋ bâzi i mâmâc rikezemec. Erâ qowi bâzi rikecmu irec soc mecne â qowi taha bacmu irec soc i mâmâc alata faio tiezemec. Â aeŋ bâbâroŋzi alata bakicne i ine Wofuŋ mu wioc eecnere biŋe ŋenarezejec.”
16Eme taha bapa Uria e ŋicwofuŋ Ahaʒizi mutâcnecnewec i sasawa efârewec.
17Eme ŋicwofuŋ Ahaʒi e keretac bakicne irec jâc wiac i hetâtierâ râqâc rorâ bârârie‐fârewec. Erâ bulimakao hawari doma rambiŋ jaŋere faio opâ râqâc sâko aeŋ bâbâroŋzi bapie ŋewec i wâc bârârierâ hobeteŋ fowec qânâ irec faio râewec.
18Erâ sabata hombaŋko rac warec eniŋte ufuŋko hata qaŋeŋne bupunehec bakicne i mecne erâ wâc ŋicwofuŋte motâc ufuŋ sahacnao fowec i mâmâc Asiria ŋicwofuŋzi maname sâckeocte Wofuŋte ufuŋkonec bârârie‐fârewec.
19Eme Ahaʒizi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
20Eme Ahaʒi e hâmome apa ŋosafâc‐ticne jaŋerao ʒuhuckehuc jaŋe fombiŋkoa Dawidire hae qizecko duckembiŋ. Ehame ŋokâ‐ticne Hisikiazi tucticne qarâ ŋicwofuŋ juwec.
