Ŋicwofuŋ II 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

¹Jehu e jara 7 ŋicwofuŋ juha Joasizi ŋicwofuŋ gie rorâ Jerusalem haeo jara 40 juwec. Neŋgoc‐ticne ʒâŋene Zibia e Bere‐Seba haeonec.

²Joasi e taha bapa Jojadazi wiac sasawa âzâcne qazuc ewecte ebac eme Wofuŋte ʒâŋe faio sâcke‐fârewec.

³Erâ ine furu mâreŋ i mi imacke‐fârekicne. Irec ŋic ŋokac jaŋe ʒuhuckerâ furu mâreŋko taha â hosâc âsu rike jumbieŋ.

⁴Eme Joasizi taha bapa ʒiŋuc jazawec: “Moneŋ wiac irec me irec taha ufuŋko bafekicne me ŋic moczi wiac irec me irec moneŋ râeocte mukicne, me ŋic moczi e jahacne maŋte Wofuŋte ufuŋko bafisiocmu;

⁵taha bapa ŋoŋe ŋic manac‐jopaŋgopieŋ sâc ronʒepieŋ. Ehuc moneŋ izi ufuŋte wiac i me i bâbâpiaŋkenere sâc ekac i honerâ bâpiaŋkenʒepieŋ.”

⁶Eme ŋicwofuŋ Joasi ere jara 23 tarame taha bapa jaŋe ufuŋ i sifu mi bâpiaŋkembiŋ.

⁷Irec ŋicwofuŋ Joasizi taha bapa Jojada â taha bapa gâcne hetumaŋ‐joparâ ʒiŋuc jazawec: “Ŋoŋe wemocte ufuŋ mi bâpiaŋkeŋgopieŋ? Ŋoŋe âgofâc‐ŋeŋic jaŋeraonec moneŋ mocwâc mi ronʒepieŋ. Moneŋ i ufuŋ bâpiaŋkezo irec biŋe qanʒepieŋ.”

⁸Iŋuc jazame taha bapa jaŋe ŋic ŋokac jaŋeraonec moneŋ mocwâc mi roniŋte maŋ mocjaha embiŋ. Erâ jaŋe ufuŋ i mi bâpiaŋkeniŋte manapie sâckewec.

⁹Eme taha bapa Jojada e katapa moc rorâ tapanao hawecne bâsurâ ŋic jaŋe Wofuŋte ufuŋko fec wahac ejumbieŋ ira fâreopec alata heririŋko heme ŋewec. Ehame taha bapa motâc soŋaŋ domambiŋ jaŋe moneŋ Wofuŋte ufuŋko bafisikicne i rofârerâ ira râepie huwec.

¹⁰Eme dameŋ ira me ira katapao moneŋ bocjaha ŋeme honerâ ŋicwofuŋte qâqâreŋ ŋic â taha bapa fekicne jaŋe fisirâ Wofuŋte ufuŋko moneŋ ŋewec i woserâ kânoŋko ropie hume micne bândeŋne jumbieŋ.

¹¹Erâ moneŋ i honepie sâckeme gie soŋaŋ jaŋerao râepie jaŋe fic bapa ŋic ufuŋ ira gie bambiŋ jaŋe

¹²â qânâ rârâe â he qanʒaŋ ee ŋic jaŋe gie furi jare jumbieŋ. Erâ moneŋ gâcne katapa â qânâ he qanʒaŋ ekicne erâ wiac i me i Wofuŋte ufuŋ bâpiaŋkeniŋte basambiŋ ira rawec.

¹³Erâ Wofuŋte ufuŋko moneŋ bafisimbiŋ izi Wofuŋte biŋe siliwa râqâc me waha bâbâhâpo gunu me soc titie râqâc me qeŋ me gol â siliwa râqâc gâcne mi bambiŋ.

¹⁴Moneŋ i Wofuŋte ufuŋ bâbâpiaŋke â ŋic ira gie bambiŋ jaŋere biŋe sawa ewec.

¹⁵Jaŋe manapie sâckeha gie bambiŋte ŋic gie furi jareniŋte moneŋ mejeŋicko râembiŋ jaŋerao fuŋnere mu wioc moc mi embiŋ. Jaŋe gie‐jeŋic i aijakic jaha bambiŋ.

¹⁶Mâc kiŋ â sâqocne tâtâmire taha irec moneŋ i ine Wofuŋte ufuŋko mi bafisimbiŋ. Moneŋ izi ine taha bapa jaŋere biŋe ewec.

¹⁷Eme dameŋ ira Siria ŋicwofuŋ Haʒaelezi ferâ Gati haeo ʒika qahuc hae i rowec. Erâ Jerusalem haeo ʒika qaocte fezo hata fuŋkewec.

¹⁸Ehame Juda ŋicwofuŋ Joasizi mamac apa ŋosafâcne Juda ŋicwofuŋ raŋɋane Josafata â Joram â Ahaʒia jaŋe wiac sasawa mumupaŋko râehuc bâtirimbiŋ i â e jahacne wiac tirine, erâ Wofuŋte ufuŋko â ŋicwofuŋ ficticnere kânoŋko gol fowec i rorâ Siria ŋicwofuŋ Haʒaelerao râeme rawec. Iŋuc eme Haʒaele e Jerusalem hae i râpeckerâ rawec.

¹⁹Joasizi wiac sasawa ebac ewec i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.

²⁰Joasi e jahacne kiŋaŋ qaqafâc jaŋe râŋgeŋkecnehuc faharerâ Sila haeo hata rakac ira Milore ficko qâhâmombiŋ.

²¹Erâ i kiŋaŋ qaqa jahec‐ticne Simeatire ŋokâ Joʒakari â Somerire ŋokâ Joʒabada jahe qapire hâmowec. Hâmome apa ŋosafâcne jaŋerao ʒuhuckehuc Dawidire hae qizecko duckembiŋ. Ehame ŋokâ‐ticne ʒâŋene Amazia eki tucticne qarâ ŋicwofuŋ juwec.