1Eme Porofete Elisazi porofete jaŋere motecfâc jaŋeraonec moc hefârehuc âzâcnerâ muwec, “Becsahacge jomarâ wokemaŋ ʒopo rorâ Ramoti‐Gileade haeo rac.
2Erâ haeo fisirâ Josafatare ŋokâ Nimisi ŋosa‐ticne Jehu e basazemec. Ehuc ficko ferâ âgofâcne jaŋere guruonec ecnetec fahareme jowatec ficmaŋ ʒâʒâŋiŋ mocko raʒizepirec.
3Eme wokemaŋ ʒopo i rorâ qizec‐ticnao hoŋkehuc dâŋ ʒiŋuc muzemec: ‘Wofuŋ e ʒiŋuc mukac: No Israe ŋic jaŋere ŋicwofuŋ jucmurâ wokemaŋ rua‐garekopac.’ Iŋuc erâ dameŋ ʒora mi juhuc motâc rorâ izia wisezemec.”
4Iŋuc muhuc âzâcneme porofete ŋicmotec e Ramoti‐Gileade haeo rawec.
5Raku haeo fisirâ honeme momori micne jaŋe tutumaŋko ŋembiŋ. Ŋepie muwec, “O momori jaŋere micne, no gore dâŋ moc bajukopac.” Iŋuc mume Jehuzi wiocnerâ muwec, “More mukic?” Wiocneme muwec, “O momori jaŋere micne, gore mukopac.”
6Iŋuc mume Jehu e faharerâ ficmaŋko raʒime porofete ŋicmoteczi ʒiŋuc muhuc qizec‐ticnao wokemaŋ ruacnewec: “Israere Wofuŋ Anutu e ʒiŋuc mukac: No wokemaŋ rua‐garehuc Israe ŋicfâc‐nane jaŋere ŋicwofuŋ âkendâŋgukopac.
7Irec go bomboŋge Ahabare kikefuŋ jaŋe jopazemec. Eme no porofete â kiŋaŋŋicfâc‐nane sasawa jaŋere socte okacne Iseberao bazupemu.
8Iŋuc epe Ahabare kikefuŋ jaŋe hâcne ʒeŋgoma omaenʒepieŋ. Eme no Israe maŋnao Ahabare ŋic sasawa juŋgopieŋ, kiŋaŋ qaqa me rambaŋko juju jaŋe bârâriec‐jopa‐fârepemu.
9Ehuc Nebate ŋokâ‐ticne Jeroboamte kikefuŋ â Ahia ŋokâ‐ticne Basa ere kikefuŋ jaŋe wiac ejarepo sâc ijaha Ahabare kikefuŋfâc jaŋerao bâfuapemu.
10Ehame Jesere mâreŋko Isebere qâŋɋâŋ moczi moc mi duckehame qâto jaŋe nâfârenʒepieŋ.” Iŋuc mutararâ motâc rorâ hurâ wisewec.
11Eme Jehuzi mocwâc bomboŋ‐ticnere kiŋaŋ qaqafâc jaŋerao fisime wiocnerâ mumbiŋ, “Weniŋuc, ŋic maŋsifucnehec keci wemocte gorao warejec?” Wiocnepie ʒiŋuc jazawec: “Ŋoŋe ŋic e manaŋgopieŋ â dâŋ eekac i wâc manaeŋgopieŋ.”
12Iŋuc mume mumbiŋ, “Go sioc ekic, dâŋ gazajec i nâzâ‐jâmbâŋkec.” Iŋuc mupie jazarâ muwec, “No dâŋ nazajec i jâmbâŋ ŋazape mananiŋ: ‘Wofuŋ e ʒiŋuc mukac: No wokemaŋ rua‐garehuc Israe ŋicwofuŋ âkendâŋgukopac.’”
13Iŋuc jazame jaŋe ŋaqi‐jeŋic hetararâ maŋfuŋnaoa ririo guruckembiŋ. Erâ qeŋ qarâ musokahuc mumbiŋ, “Jehu e ŋicwofuŋ ekac.”
14Jehoram â Israe ŋic jaŋe Ramoti‐Gileade hae ŋezickehuc Siria ŋicwofuŋ Haʒaelehec qaqac ehuc juhapie Josafatare ŋokâ Nimisi ere ŋosa Jehu e Jehoram qaocte manasu biric ewec.
15Â ŋicwofuŋ Jehoram e ine Siria ŋicwofuŋ Haʒaelehec qaqac ehapire Siria ŋic jaŋe ʒâpâ qambiŋ wic i somieocte Jesere haeo risiewec. Eme irec Jehuzi ʒiŋuc muwec: “Ŋoŋe norao qohotaŋgopieŋko ine moczi moc hae ʒirecnec fosiroŋnerâ Jesere haeo rahuc biŋedâŋ kosa mi muzejec.”
16Iŋuc murâ Jehoram e Jesere haeo fohuc juwecte Jehuzi keretac‐ticnao ferâ hae ira rawec. Ehame Juda ŋicwofuŋ Ahaʒia e wâc Jehoram iqickeocte wahawec.
17Eme ruc bapa ŋic e Jesere haere ficʒaeo domaku Jehure gurufâc fisipie honec‐joparâ muwec, “No ŋicguru moc honec‐jopakopac.” Iŋuc mume Jehoramzi muwec, “Becâsicko rara ŋic moc bâfuarâ sorepie bâfuac‐jopaocte raoc. Ehuc ʒiŋuc wio‐jareoc: ‘Ŋoŋe wamao wareŋgopieŋ me?’”
18Iŋuc mume ŋic moczi becâsic faio ferâ Jehu bâfuaocte rawec. Raku bâfuarâ ʒiŋuc âzâcnewec: “Ŋicwofuŋ e ʒiŋuc wiokac: ‘Ŋoŋe wamao wareŋgopieŋ me?’” Iŋuc mume Jehuzi muwec: “Wamazi wemo ezo? Go ware fâ râpe‐nâŋecko rac.” Eme ruc bapa ŋic e muwec, “Kiŋaŋŋic e ra bâfuac‐jopajec, erâ ine mi risiekac.”
19Iŋuc mume ŋicwofuŋ e harierâ becâsicko rara ŋic moc soreme ra jaŋerao fisirâ ʒiŋuc muhuc jazawec: “Ŋicwofuŋ e ʒiŋuc wiokac: ‘Ŋoŋe wamao wareŋgopieŋ me?’” Iŋuc mume Jehuzi dâŋ ʒiŋuc bâtikiecnewec, “Wamazi wemo ezo? Go ware fâ râpe‐nâŋecko rac.”
20Eme ruc bapa ŋic e mocwâc muwec, “E ra bâfuac‐jopajec, erâ ine mi risiekac. Ŋic guriŋ bakac e honepe Nimisi ŋosa‐ticne Jehu tinac ekac. E fâro fâro jâmbâŋ guriŋ bakac.”
21Eme Jehoramzi muwec, “Ajoc, ʒawiezo!” Iŋuc mume keretac‐ticne baʒawiembiŋ. Eme Israe ŋicwofuŋ Jehoram â Juda ŋicwofuŋ Ahaʒia jahe mâmâc jaha keretac‐jekic sâc ferâ rapic. Jahe Jehu bâfuanicte raku Jesere ŋic moc ʒâŋene Naboti ere gie hatao bâfuapic.
22Eme Jehoramzi Jehu honerâ wiocnerâ muwec: “Jehu, go wamao warekic me?” Wiocneme muwec, “Neŋgocge Isebe ere sasec gie â hafec qaŋgeczi boc fokacko wemo wama jaha foocmu?”
23Iŋuc mume Jehoramzi becâsicfâc‐ticne ŋâŋârâczi qâʒâic‐joparâ wisehuc Ahaʒia âzâcnerâ muwec, “O Ahaʒia, eeatuc fuakac!”
24Eme Jehuzi tâpirihec jaha tepe‐ticne âpârehuc qâtâcnerâ haporocnao muruhuc buhândâŋne muru fâuckeme keretac‐ticnaoa waha fowec.
25Eme Jehuzi micne‐ticne Bidakari âzâcnerâ muwec, “Rorâ Jesere ŋic Nabotire mâreŋ ŋondeŋ ʒira behetec raoc. Ehuc nâhâc dameŋ mocko mamac‐ticne Ahabare râpefuŋko keretac faio decgiŋ rahapere Wofuŋzi dâŋ ʒiŋuc muwec i manasuzemec:
26‘Wofuŋzi mukac: No jacne Naboti â ŋokâfâcne jaŋere soc hone‐jâmbâŋkepac irec erâ okacne mâreŋ ŋondeŋ ʒijaha bazu‐garepemu.’ Irec e rorâ Wofuŋte dâŋte sâcko mâreŋ ŋondeŋ ʒijaha behezemec.”
27Eme Juda ŋicwofuŋ Ahaʒia e wiac i honerâ Bete‐Hagaŋ haeopec wiserâ rawec. Rame Jehuzi jâpehuc muwec, “E wâc muruzo.” Iŋuc mume ŋicfâcne jaŋe keretac‐ticnaoa Guru haere heâŋ Ibeleam hae heririŋnao ira murumbiŋ. Murupie Megido haeo rarâ ira hâmowec.
28Hâmome kiŋaŋ qaqafâcne jaŋe keretac mocko râerâ Jerusalem haeo barambiŋ. Ehuc Dawidire hae qizecko ŋosafâc‐ticne ducjopakicne ira e jahacne ʒâŋeruŋko duckembiŋ.
29Ahabare ŋokâ Jehoram e ŋicwofuŋ jume jara 11 eha Ahaʒiazi fuŋkerâ Juda ŋicwofuŋ juwec.
30Jehuzi Jesere haeo fisime Isebe e biŋe manarâ jâweczi ʒâŋe‐ticne rikerâ qizec‐ticne erickewec. Iŋuc erâ qâqâtâc kataŋko fime rawec.
31Eme Jehu e haesac motâcko raʒihame ŋokac e muwec, “Ʒimiri, go bomboŋge qameŋzi wamao warekomec me?”
32Iŋuc mume Jehu e qâqâtâc kataŋko fime feha muwec, “Mozi nore âgo jukac?” Iŋuc mume kiŋaŋŋic jajahec me jahec â moc jaŋe erao fipie wahawec.
33Fipie wahame jazarâ muwec, “Sârockepie wahaoc!” Eme jaŋe sârockepie wahame socticne gâcne sâpeo â becâsicko hewec. Iŋuc eme jaŋe fainao âtehuc âtenʒaŋnembiŋ.
34Eme Jehu e ficmaŋko raʒirâ nânâ opâ nâwec. Ehuc muwec, “Ŋokac sâwec‐kekicne keci e ŋicwofuŋte otâ, irec honerâ duckeniŋ.”
35Iŋuc mume jaŋe rorâ duckeniŋte rarâ ŋokac e basahuc utu siec‐ticne â kike jahecne â metape jahecne iŋuc sawa fome honembiŋ.
36Iŋuc honerâ risie âzâcnepie muwec, “Wofuŋ e kiŋaŋŋic‐ticne Tisibe ŋic Elia erao dâŋ ʒiŋuc muwec: ‘Jesere mâreŋko qâto jaŋe Isebe ere biuc nânʒepieŋ.
37Ehame Jesere mâreŋko ʒira qâŋɋâŋ‐ticnezi ho iŋucne gieo ŋerame moczi ʒâŋitarâ ʒiŋuc sâcne mi muocmu: Ʒi Isebe.’”
