Yosuwe 24:5-26

⁵K'isom Musa kɔ Aruna kədemar afum anu. K'isut Misira fɔr yonu kiriŋ a k'indewurɛnɛ afum anu di.

⁶Ntɛ iwurɛ awisi aŋa Misira, kɔ nəmbəp dəkəba mɔ. Kɔ aka Misira ŋaŋcəmɛ ŋa darəŋ kəbɛləs haŋ nde Kəba ka Cəŋkɔlma, ŋac-bɛləs ŋa dəfəlɛs kəroŋ kɔ cibil ca kəwan.

⁷Ntɛ awisi aŋa ŋawes-wes kəmar ka Kanu Kəpɔŋ mɔ, kɔ kəntorɛ kubump kəpɔŋ aka Misira kɔ nəna dacɔ. Kɔ Kanu kəŋgbətəs ŋa dəkəba. Nənatəŋnɛ mes mmɛ inayɔ Misira mɔ fɔr yonu kiriŋ. Kɔ nəwon kəndɛ dətɛgbɛrɛ meren mɛlarəm.

⁸Tɛm tatɔkɔ t'inakekər' on antɔf ŋa aka Amɔr aŋɛ ŋanandɛ Yurdɛn kəsək ntende dec dɛmpɛ mɔ. Kɔ nəsutɛnɛ kɔ ŋa, mba k'ilɛk aka Amɔr k'imbɛr'un ŋa dəwaca. Kɔ nəmbaŋər ŋa antɔf ŋaŋan, k'imələk ŋa fɔr yonu kiriŋ.

⁹Kɔ Balak wan wəka Sipɔr wəbɛ wəka Mohab ɛwɛkərnɛ aka Yisrayel. K'osom Balam wan wəka Beyɔr a pətolan' on pəlɛc,

¹⁰mba k'ifati kəcəŋkəl kɔ. Pətɔt gbəcərəm pɔ Balam oŋc-tolan' on, k'iyac nu fənɔntər fɔn.

¹¹Kɔ nəŋcali kəŋgbɔkɔ ka Yurdɛn, kɔ nənder Yeriko. Kɔ aka Yeriko kəlɛkɛnɛ aka Amɔr, aPerisi, aKanahan, aHit, aKirkasa, aHiwy, kɔ aYebus ŋasutɛnɛ kɔ nəna, k'ilɛk ŋa k'imbɛr' un dəwaca.

¹²K'isom deme ndɛ dɛnayi nu kiriŋ kɔ dɛmbɛləs abɛ a Amɔr mɛrəŋ mɔ. In' ɛnasɔŋ on kətam ŋa. Bafɔ sakma sonu, bafɔ mbəŋcəran yonu yɔ nənatamɛ aterɛnɛ anu de!

¹³In' ɔsɔŋ un antɔf nŋɛ nəntɔbəc haŋ nətaka mɔ, kɔ nəndɛ sədare nsɛ nəntɔcəmbərɛ waca wonu mɔ. Kɔ nəndi yeri ya sədalɛ nsɛ nəntɔbifti mɔ, nəc-di yokom ya tɔk nyɛ nəntɔbɔf mɔ.›

¹⁴Ndɛkəl oŋ nənesɛ Kanu Kəpɔŋ, nəkornɛ Kanu kɔ bəkəc yosoku pɛs! Nəcəmɛ kɔ darəŋ tɛm fəp. Nəce canu ncɛ atem anu ŋaŋc-kornɛ nde kəŋgbɔkɔ ka Efərat ntende dec dɛmpɛ kɔ nde Misira mɔ. Nəkornɛ oŋ Kanu Kəpɔŋ!

¹⁵Kɔ nəntɔwosɛ oŋ kəkornɛ Kanu Kəpɔŋ-ɛ, nəboŋc mɔkɔ anɔ nənde nəc-kornɛ-ɛ, kɔ pəyɔnɛ canu ncɛ atem anu ŋaŋc-kornɛ ntende Efərat kəca ka ntende dec dɛmpɛ mɔ, kɔ pəyɔnɛ fɛ ti-ɛ, canu ca aka Amɔr aŋɛ nəyi kəndɛ antɔf ŋaŋan mɔ. Mba ina kɔ aka kəlɔ kem disrɛ Kanu Kəpɔŋ kɔ sənde səc-kornɛ!»

¹⁶Kɔ afum ŋaluksɛ kɔ: «Səmbɔlɛnɛ kəsak Kanu Kəpɔŋ a səc-kornɛ canu cəlɔma! Səfɔtam kəyɔ tatɔkɔ!

¹⁷Kanu Kəpɔŋ kənawurɛ atem asu kɔ səna dacar dəndo antɔf ŋa Misira, Kənayɔ mɛgbɛkərɛ mɔpɔŋ nde fɔr yosu kiriŋ. Kəc-bum su dɔpɔ kəc-mar su kəcepər tɔf ya afum alarəm.

¹⁸Kanu Kəpɔŋ kənabɛləs afum aka tɔf yayɔkɔ fəp, kəlɛkɛnɛ aka Amɔr aŋɛ ŋanandɛ di mɔ. Səna sɔ səndekornɛ Kanu Kəpɔŋ, bawo Kanu kosu k' ɔyɔnɛ!»

¹⁹Kɔ Yosuwe oloku afum: «Nəfɔdetam kəc-kornɛ Kanu Kəpɔŋ, bawo kəcempi kɔ ɔyɔnɛ! Kanu kɔ nkɛ kəyɔ kəraca mɔ nkɛ kətɔŋaŋnɛnɛ kətaŋ konu ləŋəs, kɔ kiciya konu mɔ.

²⁰Kɔ nəlukus Kanu Kəpɔŋ darəŋ-ɛ, kɔ nəkornɛ canu cəcuru-ɛ, Kanu kəndekafəlɛ kətɛfərnɛ nəna. Kəndeləsər on mes, kəndemələk nu, ali ntɛ cɔkɔ-cɔkɔ kənay' on pətɔt mɔ.»

²¹K'afum ŋaluksɛ Yosuwe ntɛ: «Ala, səndekornɛ Kanu Kəpɔŋ!»

²²Kɔ Yosuwe oloku afum: «Nəwosɛ kəyɔnɛ sede sa ntɛ nəloku mɔ ba? Antəŋnɛ oŋ a Kanu Kəpɔŋ kɔ nənde nəckornɛ!» Kɔ afum ŋaloku: «Atəŋnɛ a ti ŋɔ səyɔnɛ!»

²³Kɔ Yosuwe oloku: «Awa, nəsak canu cəcuru ncɛ cəyi nu dacɔ mɔ, nəcəmɛ Kanu Kəpɔŋ Kanu ka Yisrayel darəŋ kɔ abəkəc ŋosoku pɛs!»

²⁴Kɔ afum ŋaloku Yosuwe: «Səndekornɛ Kanu Kəpɔŋ Kanu kosu, Ki kɔ səndecəŋkəl!»

²⁵Dɔsɔk dadɔkɔ dəndo Sɛkɛm kɔ Yosuwe eŋcicəs mes ma danapa ndɛ ŋasek mɔ, k'ɔlɔmər afum a Yisrayel tiŋ tiŋ tiŋ mɛfaŋ fəp kɔ sariyɛ nsɛ Kanu kənabocər kɔ mɔ.

²⁶Kɔ Yosuwe eŋcicəs moloku mmɛ dəbuk ba sariyɛ sa Kanu. K'ɛlɛk tasar tɔpɔŋ k'ɛŋcəmbər pi kətɔk tantɔf nde aŋgbaŋcan ŋa Kanu.