يٌسُوٍ 24:5-26

⁵«ﭑ نَشَ مُنسَ نُن هَرُنَ شّي مِسِرَ بْشِ مَ، ﭑ قَ حَشَنكَتّ وُيَشِ دْشْ مِسِرَكَيٍ مَ عٍ سَابُي رَ. نَ كُي ﭑ نَشَ وٌ رَ مِنِ مِسِرَ رَ.

⁶ﭑ تٌ وٌ بَبَيٍ رَ مِنِ، مِسِرَكَيٍ نَشَ بِرَ عٍ قْشْ رَ هَن شُلُنيُمِ بَا دّ رَ. عٍ بَكِشِ سْورِ رَفِسٍيٍ نُن سٌي قَرِ.

⁷وٌ بَبَيٍ تٌ فبٍلٍفبٍلٍ عَلَتَلَ رَ، عَ نَشَ دِ مِ رَ سِن عٍ نُن مِسِرَكَيٍ تَفِ. مِسِرَكَيٍ تٌ بِرَ وٌ بَبَيٍ قْشْ رَ بَا تَفِ، عَلَتَلَ نَشَ بَا رَدِن عٍ شُن مَ. وٌ يَيٍ بَرَ نَ بِرِن تٌ، عَ نَشَن نَبَشِ مِسِرَكَيٍ رَ. نَ دَنفِ شَنبِ، وٌ نَشَ تّمُي شْنكُيٍ رَبَ فبٍنفبٍرٍنيِ مَ.»

⁸«ﭑ نَشَ وٌ شَنِن عَمٌرِكَيٍ شَ بْشِ مَ دّننَشّ نَ يُرُدّن كِرِ مَ. عٍ نَشَ وٌ فٍرٍ، كْنْ ﭑ نَشَ عٍ سَ وٌ بّلّشّ عِ، ﭑ عٍ كٍرِ وٌ يَ رَ، وٌ قَ عٍ شَ بْشِ مَسْتْ.

⁹سِثٌرٌ شَ دِ بَلَكِ، نَشَن قِندِشِ مٌوَبَ مَنفّ رَ، عَ قَن نَشَ كٍلِ عَ شَ عِسِرَيِلَ فٍرٍ. عَ نَشَ بٍيٌرِ شَ دِ شّمّ بَلَمِ شِلِ، عَلَكٌ عَ شَ وٌ دَنكَ،

¹⁰كْنْ ﭑ تٌ مُ وَ ﭑ تُلِ مَتِقٍ نَ دَنكّ رَ، بَلَمِ شَ وْيّنيِ نَشَ مَقِندِ، عَ قَ دُبَ وٌ بّ. نَ كُي ﭑ نَشَ وٌ بَ عَ بّلّشّ عِ.»

¹¹«وٌ تٌ يُرُدّن عِفِرِ، وٌ نَشَ يٍرِكٌ لِ. يٍرِكٌكَيٍ نَشَ وٌ فٍرٍ، عَلْ عَمٌرِكَيٍ، ثٍرِ سِكَيٍ، كَنَانكَيٍ، شِتِكَيٍ، فِرِفَسَكَيٍ، هِوِكَيٍ، نُن يٍبُسُكَيٍ قَن نَبَشِ كِ نَشّ، كْنْ ﭑ نَشَ عٍ بِرِن سَ وٌ بّلّشّ عِ.

¹²ﭑ قَ حُرِ ندٍ رَدِن عَمٌرِ مَنفّ قِرِنيِيٍ مَ وٌ يَ رَ. عَ نَشَ عٍ كٍرِ، كْنْ نَ مُ قِندِ وٌ يّتّ شَ سَنتِدّفّمَ نُن وٌ شَ شَلِ رَ.

¹³ﭑ بْشِ نَن قِشِ وٌ مَ وٌ مُ نَشٍيٍ رَوَلِشِ. ﭑ تَايٍ نَن قِشِ وٌ مَ، وٌ مُ نَشٍيٍ تِشِ. ﭑ وّنِ بِلِيٍ نُن عٌلِوِ بِلِيٍ نَن قِشِ وٌ مَ، وٌ مُ نَشٍيٍ سِشِ. وٌ نَ بَلٌقٍ نٍيٍ نَن شُن نَ يِ كِ.»

¹⁴«يَكْسِ وٌ شَ فَاشُ عَلَتَلَ يَ رَ، وٌ شَ عَ رَبَتُ حَنِفٍ قَنيِ نُن تِنشِنيِ رَ. وٌ شَ فبِلٍن نَ عَلَيٍ قْشْ رَ وٌ بَبَيٍ نَشٍيٍ بَتُشِ شُرٍ كِرِ مَ نُن مِسِرَ بْشِ مَ. وٌ شَ عَلَتَلَ بَتُ!

¹⁵شَ وٌ مُ تِنمَ نَ رَ، وٌ شَ نَتّ تٌنفٌ وٌ عَلَيٍ نَشٍيٍ بَتُمَ، عَلْ عَمٌرِكَيٍ شَ عَلَيٍ عٍ نَشٍيٍ بَتُمَ يِ بْشِ مَ، شَ نَ مُ عَلَيٍ وٌ بَبَيٍ نُ نَشٍيٍ بَتُمَ شُرٍ كِرِ مَ. كْنْ وٌ شَ عَ كٌلٌن عَ ﭑ تَن نُن ﭑ مَ دٍنبَيَ، مُشُ عَلَتَلَ نَن بَتُمَ.»

¹⁶حَمَ نَشَ عَ يَابِ يِ وْيّنيِيٍ رَ، «نَ شَشِلِ مَكُيَ مُشُ رَ فبِلٍنقٍ رَ عَلَتَلَ قْشْ رَ، مُشُ مُ نْمَ بِرَدٍ عَلَ فبّتّيٍ قْشْ رَ،

¹⁷بَرِ مَ عَلَتَلَ نَن نَ وٌن مَرِفِ عَلَ رَ. عَ تَن نَن مُشُ رَ مِنِ مِسِرَ بْشِ رَ، كٌنيِيَ كُي، مُشُ تَن نُن مُشُ بَبَيٍ. عَ فٍرٍ سٌ نّ مُشُ بّ مُشُ يَ شْرِ يِ كَابَنَكٌ بٍلٍبٍلٍيٍ رَ. عَ نَشَ مُشُ كَنتَ مُشُ شَ حّرّ بِرِن كُي، نُن حَمَيٍ تَفِ مُشُ دَنفِشِ نَشٍيٍ بِرِن نَ.

¹⁸عَلَتَلَ بَرَ حَمَ بِرِن كٍرِ مُشُ يَ رَ، عَ نُن عَمٌرِكَيٍ نَشٍيٍ سَبَتِشِ يِ بْشِ مَ. مُشُ تَن قَن عَلَتَلَ نَن بَتُمَ، بَرِ مَ عَ تَن نَن نَ مُشُ مَرِفِ عَلَتَلَ رَ.»

¹⁹يٌسُوٍ نَشَ عَ قَلَ حَمَ بّ، «وٌ مُ نْمَ عَلَتَلَ بَتُدٍ، بَرِ مَ عَلَتَلَ سّنِيّن، عَلَ تْونّشِ نَ عَ رَ. عَ مُ دِحّمَ وٌ شَ مَتَندِ نُن وٌ شَ يُنُبِ مَ.

²⁰شَ وٌ عَلَتَلَ قِنسِرِوَلِ بِرَقٍ عَلَ فبّتّيٍ قْشْ رَ، عَ فبِلٍنمَ نّ عَ شَ قٍ قَنيِيٍ قْشْ رَ عَ نُ نَشٍيٍ رَبَمَ وٌ بّ، عَ قَ فبَلٌي رَ مِنِ وٌ مَ، هَن عَ وٌ رَحْن.»

²¹حَمَ نَشَ عَ قَلَ يٌسُوٍ بّ، «عَدٍ، مُشُ عَلَتَلَ نَن بَتُمَ.»

²²يٌسُوٍ نَشَ عَ قَلَ حَمَ بّ، «وٌ بَرَ قِندِ وٌ يّتّ كَن مَ سٍيدٍيٍ رَ. وٌ تَن نَن يّتّ يَتِ عَلَتَلَ سُفَندِشِ عَلَكٌ وٌ شَ عَ بَتُ.» عٍ نَشَ يٌسُوٍ يَابِ، «مُشُ بَرَ قِندِ سٍيدٍيٍ رَ.»

²³يٌسُوٍ مَن نَشَ عَ قَلَ عٍ بّ، «يَكْسِ وٌ شَ فبِلٍن عَلَ فبّتّيٍ قْشْ رَ، نَشٍيٍ نَ وٌ تَفِ. وٌ شَ وٌ شَشِلِ تِ عَلَتَلَ رَ، عِسِرَيِلَ مَرِفِ عَلَ.»

²⁴حَمَ نَشَ عَ قَلَ يٌسُوٍ بّ، «مُشُ مُشُ مَرِفِ عَلَتَلَ نَن بَتُمَ، مُشُ عَ شُي رَبَتُ.»

²⁵نَ لْشْي، يٌسُوٍ نُن حَمَ نَشَ سَاتَ. عَ نَشَ سّرِيّ نُن يَامَرِيٍ سٌ حَمَ يِ رَ سِكٍمِ.

²⁶يٌسُوٍ نَشَ يِ قٍ بِرِن سّبّ عَلَ شَ سّرِيّ كِتَابُي كُي. عَ نَشَ فّمّ بٍلٍبٍلٍ تٌنفٌ، عَ نَشَ عَ تِ وُرِ تٌقَنيِ بُن مَ نَشَن نُ نَ عَلَتَلَ شَ هْرْ مْلِنفِرَ يِرٍ.