Iosua 24:5-26

⁵Ma iau ga tulue Moses ma Aron, ma iau ga vakadik Aigipto, da iau ga pait ia pire diat; ma namur iau ga agure vairop avat.

⁶Ma iau ga agure vairop ra umana tama i vavat kan ra gunan Aigipto, ma ava ga tadav ra ta; ma ra tarai Aigipto dia ga korot mur ra umana tama i vavat ma ra lavur kiki na vinavana ure ra vinarubu ma ra tarai dia ki ra os, ma i ga tuk tar ta ra Ta Meme.

⁷Ma ba dia ga tangi tadav ra Luluai, i ga vaki ra bobotoi livuan ta vavat ma ra tarai Aigipto, ma i ga tulue ra ta taun diat ma dia ga dudu; ma ra mata i vavat i ga gire ra. lavur magit iau ga pait ia aro Aigipto, ma ava ga ki ta ra pupui mangoro na bung.

⁸Ma iau ga agure vaolo avat ta ra gunan kai ra tarai Amor nina dia ki ta ra papar a Iordan maro; ma dia ga varubu ma avat, ma iau ga nur tar diat ta ra lima i vavat, ma ava ga vatur vake kadia gunan; ma iau ga vakaina vue diat ta ra luaina mata i vavat.

⁹Namur Balak natu i Sipor a king Moab i ga tut na vinarubu ma ra tarai Israel; ma i ga vartuluai upi Balam natu i Beor upi na tata vabilak avat;

¹⁰ma iau, pa iau ga torom tai Balam, kari i ga tata vadoane ke avat; damana iau ga valaun avat kan ra limana.

¹¹Ma ava ga bolo lake ra Iordan, ma ava ga tadav Ieriko; ma ra tarai Ieriko dia ga varubu ma avat, a tarai Amor, a tarai Peres, a tarai Kanaan, a tarai Ket, a tarai Girgas, a tarai Kivi, ma ra tarai Iebus; ma iau ga tul tar diat ta ra lima i vavat.

¹²Ma iau ga tulue ra varubu kakap na lua ta vavat, ma dia ga korot vairop vue ra ura king kai ra tarai Amor ta ra luaina mata i vavat, vakir kaum pakat na vinarubu ma kaum panak, patana.

¹³Ma iau ga tul tar ra gunan ta vavat, a gunan ba pa ava ga palum ia, ma ra umana pia na pal ba pa ava ga pait diat, ma go ava ki tana; ma ava ian ta ra vuai na uma na vain ma ra uma na oliva nina pa ava ga vaume.

¹⁴Kari go avat a ru ra Luluai, ma avat a torom tuna tana ma ra dovotina, ma avat a vung vue ra lavur god nina ra umana tama i vavat dia ga torom ta diat ta ra papar a Tava Alir maro ma aro Aigipto; ma avat a torom tai ra Luluai.

¹⁵Ma ona pa ava mainge ra tinorom tadav ra Luluai, io, avat a pilak pa nina ba ava mainge ra tinorom tana gori, ra umana god bar nina ba ra umana tama i vavat dia ga torom ta diat ta ra papar a Tava Alir maro, ba ra umana god kai ra tarai Amor nina ava ki ta kadia gunan go ieri; ia kaka iau, avet ma diat ta ra kubagu, avet a torom tai ra Luluai.

¹⁶Ma ra tarai dia ga tata bali ia ma dia ga biti: Koko muka avet a vana kan ra Luluai, upi avet a torom ta ra umana enana god;

¹⁷tago ra Luluai kada God iat i ga agure vairop dat ma ra umana tama i dat kan ra gunan Aigipto, kan ra kuba i ra umana vilavilau, ma ia iat i ga pait ra umana ngala na vakilang ta ra luaina mata i dat, ma i ga mataure dat ta ra lavur nga da ga vana tana ma ra lavur tarai da ga vana alalu livuan ta diat;

¹⁸ma ra Luluai i ga korot vairop vue ra tarai par ta ra luaina mata i dat, ra tarai Amor nina dia ga ki ta ra gunan; kari avet bula avet a torom tai ra Luluai, tago ia iat kada God.

¹⁹Ma Iosua i ga biti tai ra tarai: I dekdek upi avat a torom tai ra Luluai, tago ia ra lia na God, a tena ongor; pa na pun vue kavava varpiam ma kavava lavur nirara.

²⁰Ona ava vana kan ra Luluai ma ava torom ta ra umana enana god, na vana tapuku ma na pait ra magit i bilak ta vavat, ma na vapanie vue avat, ma a dovotina lua i ga pait ra boina ta vavat.

²¹Ma ra tarai dia ga biti tai Iosua dari: Koko; avet a torom uka tai ra Luluai.

²²Ma Iosua i ga biti tai ra tarai: Avat a umana tena varvai kapa ure mule avat, ba ava tar pilak pa ra Luluai upi avat a torom tana. Ma dia ga biti: Avet a umana tena varvai tana.

²³Ma i ga biti: Io, avat a vung vue ra lavur enana god livuan ta vavat, ma avat a bala upi ra Luluai ra God kai Israel.

²⁴Ma ra tarai dia ga biti tai Iosua: Avet a torom tai ra Luluai kaveve God, ma avet a valongore ra nilaina.

²⁵Ma Iosua i ga pait tika na kunubu pire ra tarai ta nam ra bung, ma i ga vatur tika na vartuluai ma ra varkurai pire diat aro Sekem.

²⁶Ma Iosua i ga tumu go ra lavur tinata ta ra buk na varkurai kai God, ma i ga tak pa tika na ngala na vat ma i ga vatur ia ta ra vavai ra iban nina i tur pire ra gomgom na pal kai ra Luluai.