1Kale bela banimane, naka weng mak kidili ayo abid tikin wanang kinim seng seng imi weng taw bako nadiw, “Got win kufodawum! Num Got aka kail bá takeikáyamin so lamlam so kitid so umi mit kayak alata ko!
2Kaleyo ami taktakin be atin tatun, kayo aka leiw wanang uyo sok gei kuw mafak dáse. Kale wanang uta ki ta bom anang bakan uyo ulum sakadinin ban keimin tuw kuw mafak dásu, kayo Got aka alam wok fakudin kinim anusiw imi yán ki kuw mafak dáse.”
3Kale ika asiki bako nadiw, “Got win kufodawum! Uka kainubu ade umi leik be alam kano tabe sun sun bokaba.”
4Beta kalomo gebom gebom mit dim kyáfako tade tow alalew ade kinim taw sinikso alalew iyo katun fakela, Got abin teinbe am suksuklaw bom nadiwade bako. “Afan ko. Got win kufodawum.” Kalbiw.
5Kale abin abemo kal weng mak bako, “adikum alam wok fakudin kinim kiba, nulum Got win kufodawin ade yak man so fasel so kan kiwta am win ata fingánbiw, kiba Got win kufádawin kala.” Kalba.
6Kale beta naka kinim gu seng seng imi weng bakanin taw be kidilomo wok fon budunin taw ade kimun budunin taw keida kidisi. Kale imi gánin dukum be bako, “Got win kufodawum! Nulum Kamokim Got kitid soim, ken kin moyámin Got!
7Kale nikil nuka kalfal bom idak tein bom ade Got win dukum kufádawum kala! Kale Siwsiw man ami wanang kudulono kalin atan namti tasu ade wanang um dabudulono kale bu uka faskobu.
8Kale wanang Siwsiw man dabudulono kalebu uka lim linen kidel lamlam so baim banim uyo kumama mikibu.” Kale lim linen kidel umi mit be Got wanang kinim abem imi kukuw kidel fakusiw uta ko.
9Kale beta ensel ayo bakonam, “bela godulalo! ‘Yak kan ita Siwsiw man ami wanang kudu nada liwliw wanumo kale gán dáyama tadiw, ika im kinim dása.’” Kale ensel aka bako, “bidi kalata atin Got weng tatun ko.” Kalane,
10naka ensel alam mit tem katun fakela suksuklawono kanamine, aka bakonam, “kanamin bá! Naka kafadow kalaw so kalam nikil fikal so makuw Got wok fakudaw bom Yesus ami sung tatun bakayamin kinim. Kale Got ata suksuklawo, watawo kaleyo bá, Yesus ami sung tatun ayo ki Sinik abem dim adikum lum senin kitid kukayaba kayo ko.” Kalesa.
11Naka abid tikin bisuda atami nalam kibi idimo be kinim mak auos gadok dang dim teinba am win ayo Aket Kukádawin ade Kidel Kanaminim kalesiw. Kale aka kukuw tatun abo afetu nadane wasi wako daudokaba.
12Am kin ayo as daung taw ade am gebom dim be win tabin manil seng seng keiba, aka win mak alam dim godusa, kata kan ata mak kal keisa banim, aka alata kuw alam kal.
13Kale aka ilim kimisung mikiba be kaim ki namat kalesa ade alam win be Got Ami Weng uta,
14kale abid tikin wasi ginanin kinim seng seng, ika lim namal so lamlam kal so mikibiw ade ika auos gadok dang dim tein fakadábiw. Ika kinim ami yán abodiw.
15Kale kinim ami bon tem be woksek midik fidá midik fidá ausa mak maek abeba, be anang bakan kuw tabodu wakel binodokaba. Kale aka ayen lafeng so alam kitid so tuw anang bakan kin modokaba. Aka alam yán tuw gadew gim iyo gebida wain wok tabokabu, be Got kitid kayakim ami atin keng dukum tabokabu uta ko.
16Kale alam lim dim so alam aing kun dim so be win belata godusiw ko. KAMOKIM ade KAMOK KAMOK IMI GEBOM. Kalesa.
17Kale naka ensel atanim dim todba ka, kale atami, ayo awon el fák fák kábiw iyo weng dukum kuw gán dáyam, “kiba Got ban imin liwliw dukum wanono, kale faskoba finang tada tada au nadiwo
18kiwta kamok kamok imi dam so un tabudin kinim imi kin moyámin kinim imi dam so kinim kitid soim imi dam so auos dam so im dang dim kámin kinim imi dam so kinim adikum imi dam so min bidiw imi dam so wok fakudin kinim imi dam so man so fasel so imi dam so uyo wanin kala.” Yakeisa.
19Kale beta naka kalomo sew iniman so bakan kamok kamok so ilim un tabudin kinim so iyo tada tada dek amki nadiw kinim auos dim teinba so alam un tabudin kinim so iyo tabuduw gelei wako dau ginanumo kana bidiw itamsi.
20Kata ika sew iniman so ibakanin lum senin kinim so ika sok gei imusiw. Kale ibakanin lum senin kinim ata sew iniman ami mudi mudín kukuw uyo kanadawusa. Kale alam mudi mudín kukuw tuw wanang kinim iyo kasen keiyamusa. Kale kasen keiyamusa wanang kinim bidi sew iniman ami fut uyo kuda bom nadiwade ami kit uyo suksukusiw ita ko. Kale alew bidi kaunsin imadála yak as daung tem unokabiw.
21Ade sew iniman alam un tabudin kinim itane, kinim auos dim teinba ami bon tem kalo woksek maek abesa tuw fukoda fikaliwe, awon adikum ita tabe im dam uyo adik wanediw mat weimyamsa ko.
