1Ning i rop a ututnala ne, a longor a tnan agaia lar a elngen a tnan kunum a taraila saot na langit, la kukukuk mang, “Haleluia! E God anundalai ka alaun pas dala, pa a matatar pa a rakrakai anunai ka,
2anasa anuna warkuraila i momol pa i tostos. Ka warkurai a pamuk a hane ning a risana i han sarara ana nuna toltol laulau, esaning i alaulau a rakrakan hanua ana nuna na pamuk a toltol. E God ka saran tar a warkurai a arkeles teteki, anasa ana suluk anuna tena titol orosla, ning i um kol sen la.”
3Pa la kukukuk ulak mang, “Haleluia! Pa sasawan a hane ning i han kas usaot bel ir rop pa bel ir rop.”
4Naur a bonot pa pisir diat a ningnigo pa diat a lalaun na akakes la punga hanrawai, pa la lotu tetek e God, esaning i kes ana nuna keskes a king pa la atongi mang, “Amen, Haleluia!”
5Pa elngen takai i hanot miting na keskes a king, i atongi mang, “Mulor atong aitna pas anundala a God, mulo anuna tena titol orosla, mulo ning bel al risamulo pa mulo ning mulo leklek, mulo ning mulo hanrawai teteki!”
6Pa longor a agaia lar a elngen a tnan kunum a tarai, pa unga na malum ning i naro pa a rakrakai a pungpugur, i kukukuk mang, “Haleluia! Anasa anundala a Leklek e God, ning i rakrakai kol, i kes na king.
7Dalar gas, pa dalar saran a matatar teteki! Anasa a pukakiar a tinaulai anuna Nat a Sipsip ka hanot, pa nuna hane ka sang.
8Di ka saran tar na wakak a kaen, ning i talapor pa i toh tetek a hane, suir mermer ono.” Na wakak a kaen ning, i tur aslang na tostos a toltol ana tarai ane God.
9Pa angelo i atai iau mang, “Ur tumusi larne: La ning di atai pas la sur a ngasa na tinaulai ana Nat a Sipsip, la angis!” Pa i atongi otleng mang, “Na warwara ne na momol a warwara ot ane God.”
10Lamur a punga hanrawai napir naur a hana suar lotu teteki. Ika i atai iau mang, “Gong! Iau otleng a tena titol oros ka lar u pa na tastasim ning la tong akes a warwara talapor o e Iesu. Ur lotu tetek e God! Anasa a warwara talapor o e Iesu i akamtur a tarai sur lar warwara na propet.”
11A oroi a langit ka sapang pa oroi a kokok a hos i tur salanigo tak. Pa esaning i kes saot ono di atongi mang “I sira tolsot anuna titol” pa “I momol.” Anuna warkurai pa anuna harum i tostos.
12Naur a kalso matana i arlar ana irnga na iah, pa a galis a kukuh a king kanisaot na pukulna. Pa di ka tumus tar a rising ting na palaona, ning bel tik i tasmani, i sot ka i tasmani.
13I mermer ana kaen ning di amurungi ting na suluk. Pa a risana, “A Warwara ane God.”
14A kunum a tarai a harum misaot na langit la kas na kokok a hos pa la muri. La mermer ana wakak a totoh na kokok a kaen.
15Pa liwan na harum ning i harat kol kaning na pahana i gom pasi, suir kot na tarai miting na matanitula ono, pa ir warkurai rakrakai la ana bulse na aen. I pas gingini a wana wain ting na tung a hat ning i tur aslang a ngalngaliah a balakut ane God, esaning i rakrakai kol.
16Ting na nuna kaen pa ting na kinwar a hana, di ka tumus tar a risana larne,
17Pa oroi ning a angelo i tur tar ting na kamis, pa i arkabah ana tnan elngena tetek a manila rop ning la rowoi saot na solsolna mang, “Mulo rowoi ute, mulor han taum ana tnan ngasa ane God,
18sur mulor ien a sis a palaona kingla, na ningnigo anuna tarai a harum, a tarai a harum, na hos pa la otleng ning la kas on la, pa sis a palaona tarai rop, na tena titol oros, pa la ning bel na tena titol oros, la ning bel al risanla pa la ning la leklek.”
19Lamur a oroi a rokoio a inagoi pa kingla mite na rakrakan hanua, pa anunla na kunum a tarai a harum ning la han taum sur lar harum taum o esaning i kas ana hos pa nuna kunum a tarai a harum.
20Ika di tong akes pas a rokoio a inagoi pa asasongo na propet, esaning ka tol a akinalangla ana risana rokoio a inagoi. Ning i tol a akinalangla ning, i asongo pas la ning a akinalang ana rokoio a inagoi kaning on la, pa la lotu tetek a manar a rokoio a inagoi. Di minggen lalaun tar a asasongo na propet pa rokoio a inagoi ting na tnan tung a iah ning i irnga ana salfa.
21Di um kol sen a nundiau a kunum a tarai a harum ana liwan a harum kaning na pahana esaning i kas ana hos. Pa manila rop la ien a sis a palaonla pa lar masur onoi.
