Uqafíqoo ufafa 19

1

2

3

4

5

6

7

8

9

10

11

12

13

14

15

16

17

18

19

20

21

22

¹Mi-qangiroofá Babiroonia máqusara ufa qímasoofaqa quandáfi ufa firaaná innaarúnai qífu pisipasamásoonaki máridaqa íriqiafana. Mi-ufáfa faiqí moómoo suqíqa máridara foora qínoo maaqí qiqau. Ánutuna amooqiaqa. Faiqí asumu máree maríana faqa káaqa qárana faqa firaa afeeka faqa maasá Ánutunaindi máridanoo.

²Mifá mi-umuari mari anaaseefá maqásaaqaraasa putaamánnimaqée marúnna ákiaqara Ánutufa miná árinau. Miqúnara miná ufa nímirafa kúqaa andeeqárafa máridanoo. Mi-anaaseefá Ánutuna aináinira fasiqauqa kuqá nárunara Ánutufa árínau.

³Misá kafáa fáaqariqa qiqau. Ánutuna amooqíaqa. Mi-maqusána, Babiroonia máqusa idámuna fannoo náaru náaru óoru fímariannoo.

⁴Miqí qímasoofaqa faiqí firaasa moodáa fasiqá faqa qaara faqa qaara faqa Ánutuna qaarí fíqu fíqu iqá márusa faqa aandáu̱ qaara faqa qaara faqa márusa faqa Ánutuna óorisaa nóorindari maqásaa áqufidaqa Ánutuna amooqídaqa qiqau, misá kúqaa qídaqia, Ánutuna amooqiaqa.

⁵Miqí qímasoofanoo ufa moó Ánutuna qaarísaaqari qufaqa íriqiafana. Aiqáma Ánutuna aináinimárusa minára rufíeemarusa, káqiqeesa faqa úriqararausa faqa aiqáma maasá Ánutunara amooqiaqa.

⁶Miqí qímasoofanoo ufa moó faiqí moómoosa suqídara foora firaa oondainní nammári áqufidanoora foora innaarúnai qínoora foora miqíra ufa fannoo maaqí qinau. Ínnee aiqámausa Ánutuna amooqiaqa. Karaambáiqa maasá úriqarara Ánutufa afeeka uqanna mifá narí aiqámai rakísinnimaqarana dóo óosana araséenoo úriqaránoo máridanoo.

⁷Tatúfirana áruaninna sipsipa anaaqifa Yísuna amundárafara foora dóo animáridanoo, minára maasá susúiqa asasíaqa miná úriqararana amooqiaqa. Miná ánaaqara foora Ánutufa fúka siara éekara árimarúna áminoo maa-siarána íraannee qufanoo irasée deedaqinóo máridanoo. Mi-eekara siaráfa Ánutuna maqásaa fasiqa anaasee andeeqára óosana kíkiqamusinoo máridanoo.

⁹Mi-ufána qímasoofanoo mi-qangiroofá qiní Yoohaneesa qímaqiminoo qinau. Yoohanee maa-ufána ákara rúa. Maa-ufáusa Ánutuna kúqaa ánoona ufa máridanoo. Ánutufa sipsípa ánaaqi amundára qóomaqara náaree márisa susúida asasímariasa máridaqa.

¹⁰Miqí qímasoofaqa qiní dáaquqoofaqa mi-qangirooná áikuki dóorindari áqufumáfi amooqianéeriafananoo mifá qáoo qímaseenoo qinau. Óo anée sía miqía. Aiqáma Yísufa kooroo íra ánoona ufa qumáree maríasa aní faqa aní ákaqaafasaauqa faqa moodáa ainainímarunausa máridaqara anée sía qiní qimooqia Ánutuna kai amooqía. Yísufa narí máru aukuana narí ánoona ufa koorooináu. Mi-ufáfa kai Yísufa sía kambíqoo aukuana tamummáqara fasiqauqa náakufufaqa qímannimufaqa ákara ríqau.

¹¹Mi-qangiroofá miqí qímasoofaqa innaarúnai márida qáfaafananoo innaarúna rakéemámbufaqa akooqóo máriqau. Qinée minakí qóosa moo éekara árirana qáfaqiafana. Miná ataufakaaqá Yísufa óoqufaaqée máridanoo miná áuqu qaara auqu faqáafa. Moo áuqu ámiqirafa mapukúsee miqóo kai mári fasiqanee qinau. Moo áuqu kúqaa ufa qímari fasiqanee qiqau. Narí andeeqára íriranannai kai faiqí ánaasee ufa rainánnímaqaidanoo minánnai kai mandóosana máree maríasa rákirana marannímidanoo.

¹²Miná áfu idáuru miqírafa qéemarinau. Miná ákiaqasaa karaambáiqa qafee moómoo afisínoo márinau. Mi-fasiqána áuqu narí afaaqaí ákara rínoo máridanoo sía moó fannoo qáfaidanoo narí kai qáfaidanoo.

¹³Miná qamunna afisímarufa fidíka ánaaqi márinau. Misá miná áuquara Ánutuna ufafée qímariqau.

¹⁴Mifá narí qóosasaa áiqaróofanoo miná ánaaqianna Ánutuna innaarúnaindaraa rákira ámmiuqa aiqáma nári éekara qóosasaa náriqa qamunna éekara qamunna ánukara qamunna afisírausa miná ánaaqianna miná áfaqee fiqau.

¹⁵Miná óokiqari aseema raiqárafa ani márinau. Minánnai aiqáma máqannaa rafáaqafuannoo, qáinna samu úqirafa nídanoo rakísinnimaqaannoo. Mifá úriqarara afeeka Ánutuna áanooqirafa áranandaki idára foora aiqáma maa-maqánasaaqaraasa miná ufa sía írimariasa afapíta qumáreenoo moodáanaki afapíta rapidaú ínanoo faiqí fidíka fannoo sáuna tatíra fára foommíannoo.

¹⁶Miná qamunnasáa faqa miná áikusaa faqa miná áuqu moó maaqí qímasee ákara rírafa Karaambáiquaqa karaambáiqa úriqararausa úriqararafa máridanoo.

¹⁷Qinée Yoohaneesa miná qáfamaseeqa quándaki qangiroo moo súanisaa kikíqinoo márina qáfeeqa. Mifá aiqáma ufini innaarúna ámeemaanai nímariasa firaa kari naméera qímasee qímanniminoo qinau. Ínnee suqúfiqa Ánutuna firaa qoomaqa sakasée naaqa.

¹⁸Ínnee suqúfiqa karaambáiqauqa faqa sundíauqa faqa misá kiatéenauqa faqa qóosauqa faqa minásaa akaraqá maríasa faqa aiqáma fasiqa rumbée maríasa faqa idukí máriasa faqa káiqeesa faqa úriqararausa faqa Ánutufa misá aiqáma narusáinaqa misá nimaqí aniréeqa Ánutufa qoomáqa sakaséenoo misá nimaqí anirée naaqa.

¹⁹Súanisaa máru qangiroofa miqí qímasoofaqa quandáfi firaa rakirana qáfaqiafana. Mandá káasau aandau faqa maa-maqa maaqánasaa karaambáiqauqa faqa nári rákira sundiauqa moómoo faqa suqúfi éekara qóosasaa márufa narí ammí sundía námufaqa náruannee qímasoofaqa rákirana uqéeraqau.

²⁰Qóosasaa márufa mandá kaasau aandau úraaqaramáfinoo rumbá quqáseenoo ínaaqianna káasau aandau námufaqa rumbá quqánau. Mi-inaaqianaa kaasau aandauná moo áuqu únna qíra tamummaqara fasiqa. Mi-unna qira tamummaqaráfa indaarúqaa káasau aandau óorisaa faiqí sía áuqaaqaa íra ainaina áuquqoofa mi-ainainnánnai mifá faiqí ánaasee níkaru qufaqa akaqáusa níqinaaqa faqa nísauku uqannái faqa mandá kaasau aandau ákara máraqau. Akaqáusa mi-kaasau aandaunára innaaru qímariqau. Éekara qóosasaa nímarufa mifá káasau aandau maréeqee únna qíra tamummaqara fasiqa faqa káqi kási maríafaqa qumáreeqee idá fárumaki áqinau. Mi-idáfa firaaqóo aurukandaá kandaa ídanoo áfunda mandáikammímarinau.

²¹Éekara qóosasaa nímarufa narí óokiqari áni maru qaseemafa káasau aandau ammí sundíauqa faqa maa-maqa maaqána karaambáiqa ammí sundíauqa faqa aiqáma náru taikásoofaqa innaarúnai ufiniuqá qumurée aiqáma misá nimaqí noofanoo nímuaqufaqa minnísaqau.