1Na kafnge én, lêmangu linge i talù gambet talù i bong dee dad to stifun déén di langit, mkit ale, manla, “Dnayenito Dwata. Dnayenito kenen i falwà gito, too mdatah kenen, na too mtulus di kdee.
2I kukuman too glut na too matlu. Tafanlayaman i libun mkat lagi, du falmon i dad to di tah tanà fagu di too sasè knayè i lawehan. Na tagbalas Dwata litè i dad saligan tafnati i libun ani.”
3Na mkit ale lêman, manla, “Dnayenito Dwata. I buk mdà di ksakuf i banwe én tatì mbuk kel di landè sen.”
4Kafnge én, i lwe falò fat ulu di dad to faglut, na i fat gambet lmanaf i too mto, lkuad di muna Dwata, i sudeng di gusudeng i gumdatah, du mangamfù ale di kenen, na manla, “Too glut sa. Dnayenito Dwata.”
5Na mdà di gusudeng i gumdatah nun talù, manan, “Dnayenito Dwataito, i kdeeyu dad lifanan, gamu dad to mafè kenen, dad to mdanà na dad to mdatah.”
6Na kafnge én, lêmangu linge i talù gambet talù i bong dee dad to, i unin gambet luk i bong fikong, na uni i bong kilet. Na lingegu i kitla, manla, “Dnayenito Dwata. Du Amuito Dwata Too Mtulus i magot i kdee.
7Na kdeeito flehew, dnayenito na fdatahito kenen. Du takel nan i bang kasdeme i Tingà Bilibili, na tafatlagad i libun nwean.
8Na gablé di libun i klaweh too bukay, i too mneng na too mlaneb na lsakan.” Na i gumtatek i mabtas klaweh ani, dunan i kdee dad matlu nimò mgimò i dad to tanfun Dwata.
9Na man i kasaligan Dwata di deg, “Sulatam ani. ‘Too nun kafye di dad to nlak di kasdeme i Tingà Bilibili.’ ” Na lêman manan di deg, “I mangu ani, too glut tnalù Dwata.”
10Kafnge én, lkuad agu di muna i kasaligan du fan agu mangamfù di kenen. Kabay balingan man di deg, “Nang ge mangamfù di deg, du alò agu salig Dwata gambet ge na dad flanekam tmulen i kaglut gablà di ku Dyisas. Alò Dwata gumangamfuam.” I kaglut tagtulen gablà di ku Dyisas én sa i tafgadè di dad tugad Dwata.
11Na kafnge én, teengu i langit malwa, na déén di munagu nun bukay kudà na i dagit i to smakay i kudà ani, dunan Gsalig na Glut, na too matlu i kukuman na keben i kasfati.
12I matan gambet i lifoh dminè, na di tah ulun nun dee kyangenan. Na nun dagit i gsulat di kenen, na kenen alò i gmadè dun.
13Na i klawehan taalam di litè, na i dagitan Tnalù Dwata.
14Na too dee sundalu di langit mlalò kenen, na lamsak ale i klaweh bukay na mlaneb, na smakay ale i dad kudà bukay.
15Na lamwà mdà di baan i too gamban sundang, du ani fisanan i dad to di sahal banwe. Na i kagotan dale landè gamfisan kenen. Nlék ale Dwata Too Mtulus gambet i kaflà bunge grép, du toon ale fanlayam, mdà di kaflabean dale.
16Na nun dagit gsulat di klawehan na di fuadan, manan, “Harì di kdee harì na Amu di kdee amu.”
17Na teengu satu kasaligan Dwata tadag ditù di duh, na falbongan i taluan, du tlon i kdee anuk mayeng ditù di tah, manan, “Salu gamu dini na stifun gamu, du nun bong fkaan Dwata gamu.
18I fkaanan gamu i ungad i dad harì, na i dad ulu di dad sundalu, na i dad sundalu, na i dad kudà na i dad smakay i kudà, na ungad i kdee dad to, balù dad to fasak ku demen ise fasak, na balù dad to mdanà ku demen mdatah to.”
19Kafnge én, lêgu teen i bong kanlikò na teengu dad harì di tah tanà, na dad sundalula. Stifun ale du sanfatila i to smakay i kudà bukay na i dad sundalun.
20Kabay baling gakfè i bong kanlikò na i tugad Satanas, dunan i gal mimò dad tnikeng gfaloh i bong kanlikò. Na fagu di dad gamtikeng ani tafangawan i dad to tagamdawat ilè i bong kanlikò na i gal mangamfù di kafbawehan. Na i bong kanlikò na i tugad Satanas sdulê ale bat mto ditù di lanaw lifoh dminè sandawà.
21Na i dad sundalula mati ale fagu di sundang lamwà di bà i to smakay i kudà bukay. Na i kdee dad anuk di bnas, too ale fabsol kmaan dad ungad i dad to mati.
